Bantu Bavula Bamumwene Kijiilo Kya Pentekosita Saka Kikyangye Kufika

Yesu byo asangwilwe, wanengezhezhe’mba batumwa banji 11 bakasambakane nanji ku mutumba mu Ngalilea. Baana ba bwanga bakwabo nabo bataainwepo. Bonse bakonkene bakijile pa 500, kabiji bamo bakizhinaukilenga. (Mateo 28:17; 1 Kolinda 15:6) Bino byaambile Yesu pa kikye kimye bibakwashishe bonse kushiinwa’mba kine Yesu wasangulwa.

Yesu walumbulwile’mba Lesa wamupa luusa pa bintu byonse bya mwiulu ne bya pano pa ntanda. Yesu wibakambizhe’mba: “Onkao mambo, yainga na kufunjisha bantu ba mu bisaka byonse bya bantu kwikala ke baana bami ba bwanga, ne kwibabatizha mu jizhina ja Tata ne ja Mwana ne ja mupashi wazhila, ne kwibafunjisha kulama bintu byonse byo nemukambizha.” (Mateo 28:18-20) Kya kine, Yesu wasangwilwe kabiji watwajijile kukebesha kuba’mba mambo awama asapwilwe.

Baana ba bwanga ba kwa Yesu bonse, banabalume, banabakazhi ne baana batambula uno mukambizho wa kufunjisha bantu kwikala baana ba bwanga. Balwanyi bakonsha kukeba kulekesha mwingilo wabo wa kusapwila ne kufunjisha, pano bino, Yesu walayile’mba: “Lesa wampa luusa lonse pa bintu bya mwiulu ne bya pano pa ntanda.” Pano kino kilumbulula ka ku baana banji ba bwanga? Yesu waambile’mba: “Yukai’mba nji nenu moba onse kukafikatu ne ku mpelo ya buno bwikalo.” Yesu kechi waambilenga’mba bonse bakasapwilanga mambo awama bakebapa bulume bwa kuba bya kukumya ne. Pano bino, bebakwasha ku mupashi wazhila.

Yesu wamwekele ku baana banji ba bwanga “pa moba 40” kufuma po asangukile. Wamwekele mu mibiji yapusana pusana ne na “bishiino bya kine byavula,” ne kwibafunjisha “pa Bufumu bwa Lesa.”—Byubilo 1:3; 1 Kolinda 15:7.

Kyamweka batumwa byo bakijinga mu Ngalilea, Yesu wibambijile kubwela ku Yelusalema. Byo ebataaine mu muzhi, wibambijile’mba: “Kange mukafumemo mu Yelusalema ne, mukapembelenga akya kyalayile Batata kabiji kyo mwaumvwine kwi amiwa; mambo Yoano wabatizhenga mu mema, bino anweba bakemubatizha na mupashi wazhila kabiji kwashalatu moba acheche.”—Byubilo 1:4, 5.

Palutwe kacheche, Yesu wasambakene jibiji na batumwa. Kabiji “wibatwajile kwipi na ku Betani,” muzhi wajinga ku musela wa Mutumba wa Maolivi. (Luka 24:50) Nangwa kya kuba wibabuujile’mba wabwelelenga mwiulu, abo bakiketekejile’mba Bufumu bwanji ukebwikazha pano pa ntanda.—Luka 22:16, 18, 30; Yoano 14:2, 3.

Batumwa baipwizhe Yesu amba: “Nkambo, nanchi mubena kubwezha bufumu ku bena Isalela pa kyonka kino kimye nyi?” Aye wibakumbwile’mba: “Kechi kyo kyenu kya kuyuka kimye ne, pakuba Batata ba mwiulu bo baji na luusa lwa kutongola kimye kikamwekelamo bino bintu.” Kabiji byo abwezhezhepo kwamba pa mwingilo ye bafwainwe kwingilanga, waambile’mba: “Mukatambula bulume kimye mupashi wazhila kyo akemwikijila, kabiji mukekala bakamonyi bami mu Yelusalema, monse mu Yudea ne mu Samaliya, ne monse mwapela ntanda.”—Byubilo 1:6-8.

Batumwa bajinga pa Mutumba wa Maolivi ne Yesu wasangwilwe kimye kyo atendekele kuya mwiulu. Kechi papichile ne kimye kyabaya ne, jikumbi jamuvwetele kabiji wazhimañene ku meso abo. Panyuma ya lusanguko lwanji, waalukile mu mibiji yapusana pusana ya bumuntu. Bino pa kikye kimye Yesu wafumine mu mubiji wa bumuntu ne kwikala ke kilengwa kya mupashi ne kuya mwiulu. (1 Kolinda 15:44, 50; 1 Petelo 3:18) Batumwa ba kishinka byo batajilenga mwiulu saka aya, “kwamwekele banabalume babiji baimene saka bavwala bivwalo bitoka.” Bano banabalume baalukile mu mubiji wa bumuntu bajinga bamalaika, kabiji baipwizhe’mba: “Anweba banabalume bena Ngalilea, mambo ka o mwaimena na kutala mwiulu? Uno Yesu, ye batwala mwiulu kufuma kwi anweba, ukabwela byonka byo mwaji kumumona saka aya.”—Byubilo 1:10, 11.

Yesu pa kufuma pano pa ntanda kechi bamumwene ku bantu bavula ne, bamumwenetu ku baana banji ba bwanga ba kishinka. Kabiji ukabwela ‘byonka byo bamumwene saka aya’ kwa kubula kumumona ku bantu bavula ne, kanatu baana banji ba bwanga ba kishinka bo bayuka kwikalapo kwanji pa Bufumu.

Batumwa babwelele ku Yelusalema. Moba alondejilepo, bakonkene pamo na baana ba bwanga bakwabo, kubikapo ne “Maliya inanji Yesu ne bankasanji” Yesu. (Byubilo 1:14) Jino jibumba jalombelenga na mukoyo. Kintu kimo kyo balombelengapo ke kusala mwana wa bwanga wa kupingizha pe Yudasa Isakaliota, pa kuba’mba bekale 12 byonka byo bajinga kala. (Mateo 19:28) Bakebelenga mwana wa bwanga wamweneko mingilo ya kwa Yesu ne lusanguko lwanji. Kino kyo kimye kyapelako Baibolo po aamba pa kuta bubale pa kuba’mba bayuke kyaswa muchima wa Lesa. (Salamo 109:8; Byambo bya Maana 16:33) Matiasa, kyamweka wajinga pa boba 70 Yesu bo atumine, ye ye basajile kabiji “bamubajijile ku batumwa 11.”—Byubilo 1:26.

Byo papichile moba jikumi kufuma kimye Yesu kyo ayile mwiulu, Kijiilo kya Bayudea kya Pentekosta mu 33 C.E. kyatendekele. Baana ba bwanga 120 bakonkene pamo mu kibamba kya peulu mu Yelusalema. Ponkapotu kwaumvwanyikile kilulumo nobe kya kinkunkwila kikatampe kabiji kyakumbene nzubo yonse. Bamwene mujilo wamwekelenga nobe njimi waikele pa bonse bajingamo. Baana ba bwanga bonse batatwile kwamba milaka yapusana pusana. Kuno kwajinga kwitululwa kwa mupashi wazhila Yesu ye ebalayile!—Yoano 14:26.