Kitango 131

Wamwekele Japelako, Pentekosita mu 33 C.E.

PA KIMYE kimo Yesu wanengezhezhe amba batumwa banji 11 bakasambakene nanji ku mutumba mu Ngalilea. Kyamweka ne baana ba bwanga bakwabo bebabujile pa mambo a kuno kusambakana. Bonse bakonkene bakijile pa 500. Akwa kushonkena kwawamine bingi kimye Yesu kyo amwekele ne kutatula kwibafunjisha!

Pa bintu bikwabo byo ebabujile, Yesu walumbulwijile jibumba amba Lesa wamupa lūsa pa bintu byonse bya mwiulu ne bya pano pa ntanda. Wibakambizhe amba: “Onkao mambo, yainga na kufunjisha bantu ba mu bisaka byonse kwikala ke baana bami ba bwanga, ne kwibabatizha mu jizhina ja Tata ne ja Mwana ne ja mupashi wazhila, ne kwibafunjisha kulamanga bintu byonse byo nemukambizha.”

Akikilangulukaipotu! Banabalume, banabakazhi ne baana, bonse batambwijile mukambizho umo wa kwingilako mwingilo wakukwasha bantu kwikala baana ba bwanga. Balwanyi bakesekesha kwibakanya kusapwila ne kufunjisha, bino Yesu wibatekeneshe’mba: “Kabiji yukai amba nji nenu moba onse kukafikatu ne ku mpelo ya buno bwikalo.” Yesu wikala na bamulondela kupichila mu mupashi wazhila kwibakwasha kwingila mwingilo wabo.

Yesu wamwekele ku baana banji ba bwanga pa moba 40 kufuma po asangukile. Pa bibye bimye byo amwekelenga, wibafunjishenga pa mambo a Bufumu bwa Lesa kabiji waambishepo pa mwingilo wabo byo bajinga baana banji ba bwanga. Juba jimo wamwekele kwi Yakoba bankasa ne kolo ne Yesu wa mu jivumo jikwabo kabiji pa kikye kimye waesekele kumubula amba Yesu ye Kilishitu.

Batumwa byo bakijinga mu Ngalilea, Yesu wibabujile kubwela ku Yelusalema. Byo ebataine kokwa, wibambijile’mba: “Kechi mukafumemo mu Yelusalema ne, mukapembelenga akya kyalayile Batata kabiji kyo mwaumvwine; mambo Yoano wabatizhenga mu mema, bino anweba bakemubatizha na mupashi wazhila kabiji kwashalatu moba acheche.”

Palutwe kacheche, Yesu wasambakene jibiji na batumwa ne kwibatangijila kufuma mu muzhi ne kuya nabo ku Betani, wajinga ku musela wa Mutumba wa Olebeta. Nangwa kya kuba wibabujile’mba wabwelelenga mwiulu, abo bakiketekejile amba Bufumu bwanji ukebwikazha pano pa ntanda. Onkao mambo, bamushikishe amba: “Nkambo, nanchi mubena kubwezha bufumu ku bena Isalela pa kyonka kino kimye nyi?”

Mu kifulo kya kwibololako byo balangulukilenga, Yesu wibakumbwile’mba: “Batata ba mwiulu bo baji na lūsa lwa kutongola kimye kikamwekelamo bino bintu, pakuba anweba kechi kyo kyenu kya kuyuka akya kimye ne.” Kepo aambile pa mwingilo ye bafwainwe kwingila, amba: “Mukatambula bulume kimye mupashi wazhila kyo akemwikijila kabiji mukekala batumonyi bami mu Yelusalema, mu Yudea ne mu Samaliya monse, ne monse mwapela ntanda.”

Byo bakimutajilenga, Yesu watatwile kuya mwiulu ne jikumbi jamuvwetele kabiji wazhimañene. Panyuma ya kufuma mu mubiji wa bumuntu, waalukile ke kilengwa kya mupashi mwiulu. Aba batumwa 11 byo batajilenga mwiulu, kwi abo kwamwekele banabalume babiji bavwajile bivwalo bitoka. Bano bamalaika baalukile mu mubiji wa bumuntu, bashikishe’mba: “Anweba bena Ngalilea, mambo ka o mwaimena na kutala mwiulu? Uno Yesu, ye batambula kwi Lesa kufuma kwi anweba, ukabwela byonka byo mwaji kumumona saka aya.”

Yesu pa kufuma pano pa ntanda kechi bamumwene ku bantu bonse ne, bamumwenetu ku baana banji ba bwanga bakishinka bacheche. Abino byo byo akabwela kwa kubula kumumona ku bantu bonse, posotu baana banji ba bwanga bakishinka bo bakayuka amba wabwela kabiji waikala kala pa Bufumu.

Batumwa bafumineko ku Mutumba wa Olebeta ne kukilañanya Kinkunenke kya Kidelona ne kukatwela mu Yelusalema jibiji. Baikele monka mu Yelusalema byonka Yesu byo ebakambizhe. Byo papichile moba jikumi, pa Kijiilo kya Bayudea kya Pentekosita mu 33 C.E., baana ba bwanga 120 saka bakonkena pamo mu kibamba kya peulu mu Yelusalema, kwaumvwanyikile kilulumo nobe kya kinkunkwila kikatampe kabiji kyakumbene nzubo yonse. Bamwene mujilo wamwekelenga nobe njimi waabene ne kwikala pa muntu pa muntu. Kabiji baana ba bwanga bonse batatwile kwamba mu milaka yapusana pusana. Kuno kwajinga kwitululwa kwa mupashi wazhila Yesu ye ebalayile! Mateo 28:16-20; Luka 24:49-52; 1 Kolinda 15:5-7; Byubilo 1:3-15; 2:1-4.

▪ Kimye Yesu kyo ayilenga, bañanyi bo apele mikambizho byo bajinga ku mutumba mu Ngalilea, kabiji yajinga ñanyi mikambizho?

▪ Yesu watekeneshe byepi baana banji ba bwanga, kabiji ukekala byepi nabo?

▪ Yesu wamwekele bimye binga ku baana banji ba bwanga panyuma ya lusanguko lwanji kabiji ñanyi bintu byo ebafunjishe?

▪ Ñanyi muntu wabujile mwana wa bwanga Yesu saka akyangye kufwa ye amwekeleko?

▪ Ñanyi kusambakana kwapeleleko kubiji Yesu ko asambakene na batumwa banji, kabiji bi ka byamwekele pa kuno kusambakana?

▪ Yesu ukabwela byepi byonka byo ayile?

▪ Ñanyi kintu kyamwekele pa Pentekosita mu 33 C.E.?