Nanchi Bika Bakamonyi Bakwa Yehoba Byo Baitabila?

“Byonkabyo atweba tubenakusaka kwimumvwa mo mwalangulukila: mambo twayuka namba luno lwipatulo lunenwa bibi konse, konse.” (Byubilo 28:22) Abe bantangi bajinga mu Loma kimye kya myaka kitota kitanshi bamwesheshe kyakumwenako kyawama. Bakebelenga kumvwa ku batumwa, kukila kumvwatu kubakalengulula.

Byonkabyo, Bakamonyi bakwa Yehoba mu ano moba banenwa bibi, kabiji kyakonsha kwikala kilubo kuketekela kufunda kine pe abo kufuma ku bantu bebashikwa. Onkao mambo twatemwa kulondolola kwi anweba bimo bya mu byotwaitabila bikatampe.

Baibolo, Yesu Kilishitu, ne Lesa

Twaitabila kuba mba “Binembelo byonse byanembeshiwa kwi Lesa, kabiji byo byawamina mu kwibafunjisha bantu.” (2 Timoti 3:16) Kabiji nangwatu bantu bamo bamba kuba mba kechi twibena Kilishitu ba kine ne, kechi bamba kine ne. Twaitabila mupwilapo busapwishi bwakwa mutumwa Petelo kutazha kwi Yesu Kilishitu kuba mba: “Pakuba kechi paji jizhina jikwabo muno munshi, japewa mu bantu, jo twafwainwa kupulukilamo ne.”—Byubilo 4:12.

Nangwa kikale byonkabyo, Yesu byo aambile kuba’mba aye ye “Mwana Lesa” ne kuba’mba ‘Batata bo bantumine,’ Bakamonyi bakwa Yehoba baitabila kuba’mba Lesa wakila Yesu bulume. (Yoano 10:36; 6:57) Yesu ye mwine waambile kuba mba: “Batata bo bankila.” (Yoano 14:28; 8:28) Mu jojo jishinda kechi twaitabila kuba mba Yesu waesakana pamo ne Shanji, byonka byamba lufunjisho lwa Balesa Basatu ne. Mukifulo kya byobyo, twaitabila kuba mba walengelwe kwi Lesa ne kuba mba ye wakibiji kwi Aye.—Kolose 1:15; 1 Kolinda 11:3.

Mu mulaka wa Kikaonde, jizhina jakwa Lesa ke Yehoba. Baibolo yamba kuba mba: “Anweba yenka, wajizhina ja Yehoba, Yenu Mwine Wakila wa panopantanda ponse.” (Masalamo 83:18) Mukumvwañana na ano mawi, Yesu waambishepo na mukoyo mukatampe pa jizhina jakwa Lesa, kufunjisha bana banji ba bwanga kulomba kuba mba: “Tata wetu wa mwiulu, jizhina jenu jizhile.” Kabiji ne aye mwine walombele kwi Lesa mba: “Namwesheshe jizhina jenu kwi aba bantu bomwampele.”—Mateo 6:9; Yoano 17:6.

Bakamonyi bakwa Yehoba baitabila kuba mba bafwainwa kwikala nobe Yesu mu kulenga jizhina jakwa Lesa ne nkebelo yanji kuyukanyikwa ku bakwabo. Onkao mambo tuji na jizhina ja Bakamonyi bakwa Yehoba mambo tulondela Yesu, “kamonyi wa kishinka.” (Lumwekesho 1:5; 3:14) Mu kufwainwa, ku bantu bemenako jizhina jakwa Lesa, Isaya 43:10 waamba kuba mba: “Yehoba waamba’mba Anweba bantu bami yenu batumonyi bami, kabiji mwi bami ba mwingilo bo nasalulula.”

Bufumu Bwakwa Lesa

Yesu wafunjishe bana banji babwanga kulomba kuba mba, “Bufumu bwenu bufike,” kabiji walengele bobo Bufumu kwi kala mutwe mukatampe mu kufunjisha kwanji. (Mateo 6:10; Luka 4:43) Bakamonyi bakwa Yehoba baitabila kuba mba Bufumu ye kamfulumende wa kine wa mwiulu, ukalama ntanda yonse, ne kuba mba Yesu Kilishitu ye Mfumu wabo ubula kumweka. Baibolo yamba kuba mba, “Bundamakyalo bukekala pe aye. Bufumu bwanji bukayanga na kubaya kikupu kabiji mutende ye akaleta kechi ukapwa ne.”—Isaya 9:6, 7.

Nangwa kikale byonkabyo, Yesu Kilishitu kechi yeyenkatu ukekala mfumu wa kamfulumende yakwa Lesa ne. Ukekala na bantangi bakwabo mwiulu. Mutumwa Paulo wanembele’mba, “Inge twakosela mu bya malwa, tukekala nanji mu bufumu pamo.” (2 Timoti 2:12) Baibolo imwesha kuba mba abo bantu ba sangulwa kulama ne Kilishitu mwiulu baji mu mpendwa ichechetu yafika ku “biumbi makumi jikumi ne ana ne biumbi bina.”—Lumwekesho 14:1, 3.

Nepano, kamfulumende yense wafwainwa kwikala na bantu bakulama, kabiji Bakamonyi bakwa Yehoba baitabila kuba mba mabilyoni avula pa mbaji ya bobo bakekala mu bufumu mwiulu bakatambula bumi bwa myaka ne myaka. Kikapelako ntanda, ikalulwa ke paladisa wabuuya, wayula bantu bawama ba mu Bufumu bwakwa Lesa, bonse babena kukokela buntangi bwakwa Kilishitu ne bantangi bakwabo. Mu jonkajo jishinda Bakamonyi bakwa Yehoba bashiinwa na ngovu kuba mba ntanda kechi ikonaunwane ne kuba mba mulaye wa Baibolo wakuba’mba: “Baoloka bakaswana ntanda, Ne kwikalamo myaka ne myaka” ukafikizhiwa.—Masalamo 37:29; 104:5.

Nanchi Bufumu bwakwa Lesa bukeya byepi? Nanchi bukeya kupichila mukukokela kwa bantu bonse ku kamfulumende wakwa Lesa mu kwitemenwa nyi? Mukupusanako, Baibolo imwesha kuba mba kwiya kwa Bufumu kukakabila kunyantukilamo kwakwa Lesa mu mambo a panopantanda: “Lesa wa mwiulu ukaleta bufumu bo bakabula konauna myaka ne myaka, nangwa pachechetu ne kabiji abwa bufumu . . . bukalalaula buno bufumu bonse ne kwibupwishatu shata! Pakuba abo bukekala myaka ne myaka.”—Danyela 2:44.

Ñanyi kimye kikeya Bufumu bwakwa Lesa? Pa kishina kya bungauzhi bwa Baibolo bubena kufikizhiwa bukumo, Bakamonyi bakwa Yehoba baitabila kuba mba bukapelawizha kwiya. Twimulomba kulanguluka pa bungauzhi bumo bubena kwamba pa mbaji ya ‘moba akapelako’ a bino byubilo bya bintu bibi. Yanembwa pa Mateo 24:3-14; Luka 21:7-13, 25-31; ne 2 Timoti 3:1-5.

Na mambo a ‘kutemwa Yehoba Lesa wetu na muchima yense, mweo, mana, ne na bulume bwetu bonse, ne mukwetu byonka byo twitemwa atweba bene,’ kechi twisalulula na mambo akupusana kwa byalo, mitundu, ne kwikala pamo ne. (Mako 12:30, 31) Twayukanyikwa bingi na mambo a butemwe bo tumwesha pakachi ka balongo betu babwina Kilishitu baji mu byalo byonse. (Yoano 13:35; 1 Yoano 3:10-12) Mujojo jishinda kechi twikalamo na lubaji mu bya bumulwilantanda bwa mu byobyo byalo ne. Tweseka kupasha bana babwanga batanshi bakwa Yesu, abo boaambileko kuba mba: “Abo kechi bo ba panopantanda ne, byonka byo nji amiwa kechi ne wa panopantanda ne.”(Yoano 17:16) Twaitabila kuba mba kwipatula ku ino ntanda kulumbulula kuchinuzhuka ñendelo yatama yaseeka ano moba, ivwangamo bubela, kwiba, bulalelale, bukende, kulalañana kwa ba bwamba bumo, kwingijisha mashi mu jishinda jatama, kupopwela bankishi, ne bintu bikwabo bya yenka uno mutundu byobakanya mu Baibolo.—1 Kolinda 6:9-11; Efisesa 5:3-5; Byubilo 15:28, 29.

Luketekelo Lwa Kimye Kya Kulutwe

Bakamonyi bakwa Yehoba baitabila kuba mba bumi bwa kino kimye kechi bobonkatu bujiko ne. Twaitabila kuba mba Yehoba watumine Kilishitu panopantanda na kwichila mashi a bumi bwanji kwikala nkuulo pa kuba mba bantu bakonshe kwimana baoloka ku meso a Lesa ne kutambula bumi bwa myaka ne myaka mu byubilo bya bintu bipya. Byonkatu byaambile mutumwa wakwa Yesu kuba mba: “Twabingishiwa na mashi anji.” (Loma 5:9; Mateo 20:28) Bakamonyi bakwa Yehoba mukukizhamo basanchila Lesa ne mwananji pa kukokozha nkuulo ilengela bumi bwa kimye kya kulutwe kwikalako.

Bakamonyi bakwa Yehoba baji na luketekelo lwa pwijijika mu bumi bwa kimye kya kulutwe, bwaimena pa kusanguka kufuma ku bafwa mu Bufumu bwakwa Lesa. Twaitabila byonkatu bifunjisha Baibolo kuba mba, muntu byo afwa kinekine kwikalako kwanji kupwa, ne kuba mba “mu jonkaja juba milanguluko yanji yaonaika.” (Masalamo 146:3, 4; Ezikyo 18:4; Musapwishi 9:5) Ee, bumi bwa kimye kya kulutwe bwa bafwa bwaimena pa kuvulukwa kwabo kwi Lesa mu lusanguko.—Yoano 5:28, 29.

Nangwa kikale byonkabyo, Bakamonyi bakwa Yehoba bashiinwa kuba mba bavula bakiji bomi pakino kimye bakapuluka kimye Bufumu bwakwa Lesa kyo bukaleta mpelo ku makamfulumende onse ajipo kabiji, nobetu bya pulukile Nowa ne kisemi kyanji ku muyulo, bakekala na kwilemena bumi myaka ne myaka mu ntanda yatokeshiwa. (Mateo 24:36-39; 2 Petelo 3:5-7, 13) Bino twaitabila kuba mba kupuluka kwaimena pa kuba bintu Yehoba byoakeba, byonkatu byamba Baibolo kuba mba: “Kabiji panopantanda pakapita . . . pakuba aye uba kyaswa muchima wa Lesa ukekala myaka ne myaka.”—1 Yoano 2:17; Masalamo 37:11; Lumwekesho 7:9, 13-15; 21:1-5.

Kwakubula kuzhinaukane, byaitabila Bakamonyi bakwa Yehoba byonse kuba byanembwa pano byonse ne, bino twimulomba kuyukilako byavula.

Binembelo byotwaingijisha muno byafuma mu Baibolo ya Luba-Kaonde version 1975, kanatu twamwesha ingi. Inge mwamona mawi aambulwa alondankana na NW, yukai’mba kuno kutuntulula kwafuma mu New World Translation of the Holy Scriptures—With References.

[Mabulañano pa peja 4]

Tuji na jizhina ja Bakamonyi bakwa Yehoba mambo tulondela Yesu