Kitango 5

Yesu Wasemekejilwe Kwepi Kabiji Kimye Ka?

MU BUFUMU bwa Bena Loma, aye mfumu Kesala Augusatusa wakambizhe’mba bantu bonse babwele ku mizhi yabo ko basemekejilwe kuba’mba bakanembeshe mazhina. Onkao mambo, Yosefwa wayile ko asemekejilwe ku muzhi wa Betelema.

Mu Betelema mwajinga bantu bavula bingi baishile na kunembesha mazhina, kabiji mpunzha yafikijilemo ba Yosefwa ne Maliya ke kipaka kya banyama. Yesu wasemekejilwe monka muno mo balaminanga bambongolo ne banyama bakwabo. Maliya wamupombakenye mu bisapi ne kumulaajika mu kijiilamo banyama.

Luno lwajinga lunengezho lwa Lesa kuba’mba Kesala Augusatusa alenge muzhilo wa kunembesha mazhina. Kino kyalengejile Yesu kusemekelwa mu Betelema, muzhi ye baambilepo kala mu Binembelo amba yo mpunzha mukasemekelwa mfumu walayilwe.

Bufuku bwa joja juba bwanemene bingi! Kimye bakafunga kyo bajinga mungye bufuku, kyeya kibasamijile konse konse. Kino kyajinga lukumo lwa Yehoba! Kabiji malaika wa Yehoba wibabujile’mba: “Kuba moyo ne, mambo amiwa naiya na kwimubula mambo awama a lusekelo lukatampe bantu bonse o bakomvwa mambo lelo mu muzhi wa Davida mwimusemenwa Mupulushi, aye Kilishitu Nkambo. Kino kyo kiyukilo kwi anweba: Musakutana mwana bamupomba mu kisapi saka bamulaajika mu kijiilamo banyama.” Ponkapo kwamwekele bamalaika bavula ne kwimba’mba: “Lukumo kwi Lesa mwiulu, ne mutende pano pa ntanda mu bantu baubilwa bibusa kwi aye.”

Bamalaika byo bayile, bakafunga batatwile kwiambila mulwabo amba: “Twayai tuye ku Betelema tukamone kino kintu kyamweka kitusolwela Yehoba.” Ponkapotu bayile kabiji bataine Yesu monka mwibabujile malaika. Bakafunga byo bashimikizhe bibabujile malaika, bonse baumvwine kino bakuminye bingi. Maliya wibilamine bino byambo byonse ne kwibilangulukangapo mu muchima wanji.

Bantu bavula baitabila’mba Yesu wasemekelwe pa 25 December. Bino December, ke ñondo wa mvula ne mashika mu Betelema. Bakafunga kechi bakonsheshe kuya mungye bufuku na matanga abo mu uno ñondo ne. Kabiji Kesala mwina Loma kechi wakonsheshe kwambila bantu bajinga pepi kumusatukila kuba’mba baye mu uno ñondo wa mashika na kunembesha mazhina ne. Kyamweka Yesu wasemekelwe mu kimye kya kuntatwilo ya kibundo. Luka 2:1-20; Mika 5:2.

▪ Mambo ka ba Yosefwa ne Maliya o bayijile ku Betelema?

▪ Ñanyi kintu kyawama kyamwekele bufuku bwa joja juba jasemekelwe Yesu?

▪ Twayuka byepi kuba’mba Yesu kechi wasemekelwe pa 25 December ne?