FUNJISHAINGA BAANA BENU
Yesu Kilishitu Twakonsha Kumuvulukanga Byepi?
Mu December bantu bavula mwaya ntanda bamona bipikichala bya kwa Yesu saka akiji lukeke. Bamubika mu kijiilamo banyama, kibokoshi kikatampe mo babika nsono ya kuja banyama. Nanchi twafwainwa kuvulukanga Yesu byo akijinga lukeke nyi?—a Twaya twisambe pa jishinda jawama ja kumuvulukilamo. Twakonsha kufunjilako ku kyamwekele ku bakafunga bajinga mungye bufuku kwipi na Betelema.
Malaika wamweka ku bakafunga kwakubula kuketekela. Wibabula’mba: “Mambo lelo mu muzhi . . . , mwimusemenwa Mupulushi, aye Kilishitu Nkambo.” Malaika wibabula kuba’mba basakutana Yesu “bamupomba mu kisapi saka bamulaajika mu kijiilamo banyama.” Ponkapotu, bamalaika bakwabo bavula bamwekele ne kutendeka ‘kutota Lesa.’
Wakonsha kumvwa byepi umvwe waumvwine bamalaika saka batota Lesa?— Bakafunga baji bingi na lusekelo! Baambile’mba “Twayai tuye ku Betelema tukamone kino kintu kyamweka.” Byo baya, batana “Maliya, Yosefwa ne mwana saka bamulaajika mu kijiilamo banyama.”
Mu kimyetu kicheche, bantu bakwabo baiya ku Betelema kwajinga Maliya ne Yosefwa. Byo bebabula byamwekele ku bakafunga, bonse bakumya. Nanchi waumvwa bulongo pa kuyuka bino bya kukumya byaubiwe nyi?— Atweba bonse twatemwa Lesa tuji na lusekelo. Pano twaya tumone kusemwa kwa kwa Yesu o kwitusangajikila. Pa kuba’mba tuyuke bulongo byo kyajinga, twafwainwa kubwela kunyuma Maliya saka akyangye kusongolwa.
Juba jimo, Malaika wa jizhina ja Ngabaliela waishile na kufwakesha Maliya. Wamulaya kuba’mba ukasema mwana “ukanema bingi kabiji ukatelwa amba Mwana wa Mwine Wakila. Kabiji ukekala mfumu, ne bufumu bwanji kechi bukapwa ne.”
Maliya ubena kukeba kuyuka kino byo kikobiwa mambo kechi wakisambakanapo kala na mwanamulume ne. Ngabaliela wa mulumbulwila kuba’mba: “Bulume bwa Mwine Wakila bukakuzhikijila,” ne kuba’mba “awa ukasemwa ukatelwa amba wazhila, Mwana Lesa.” Kuvilula bumi bwa Mwana Lesa kufuma mwiulu ne kwibubika munda mwa kwa Maliya ne kukoma nobe lukeke, kyajinga kintu kya kukumya bingi.
Nanchi wakimonapo kala bipikichala paji “ba maana” basatu nakupempula Yesu uji lukeke pamo na bakafunga nyi?— Bino bipikichala javula bimweka kimye kya Kiminshiminshi. Bino kechi bya kine ne. Aba “ba maana” bajinga bamfunji batubangabanga, byubilo byashikwa Lesa. Twaya tumone kyamwekele kimye kyo bafikile. Baibolo waamba’mba: “Byo batwelele mu nzubo, bataine mwana saka aji na inanji aye Maliya.” Ko kuba’mba Yesu pa kikye kimye kechi wajinga lukeke ye balaajikile mu kijiilamo banyama ne, wajinga mwanyike waikelenga ne Yosefwa ne Maliya.
Nga bamfunji batubangabanga bataine byepi Yesu?—Bebatangijile ku “kabangabanga,” kechi ku Betelema ne, bino kebatangijile patanshi ku Yelusalema kwajinga Mfumu Heloda. Baibolo wamba’mba Heloda wakebelenga Yesu kuba’mba amwipaye. Pano akilanguluka pa kino. Ñanyi ye ubena kulanguluka walengele kano kabangabanga katangijilenga bamfunji ba tubangabanga kwi Heloda?— Kechi wajinga Lesa wa kine aye Yehoba ne, bino wajinga mulwanyi wanji Satana Diabola.
Satana lelo jino, ubena kulengela bantu kulanguluka kuba’mba Yesu ukijitu lukeke. Bino malaika Ngabaliela wabujile Maliya amba: “Ukekala mfumu . . . ne Bufumu bwanji kechi bukapwa ne.” Luno Yesu ke Mfumu mwiulu kabiji katatakatu akonaune bonse balwanyi ba Lesa. Bino byobyo twafwainwa kuvulukanga Yesu ne kubulako bantu bakwabo pe aye.
Tangai mu Baibolo Wenu
Lumwekesho 19:19-21; 1 Yoano 2:17
[Tubyambo twa mushi]
a Inge mubena kutanga na mwana, kakishilwa kabena kwimubula’mba mwafwainwa kutulumanako ne kwambila mwana amba akumbule