Kitango 6

Mwana Walayilwe

MU KIFULO kya kubwelamo ku Nazala, ba Yosefwa ne Maliya baikajile mu Betelema. Yesu byo afikizhe moba atanu na asatu, bamutwajile ku mukanda monka mwakambizhizhe Mizhilo ya Lesa yo apele Mosesa. Kyamweka kyajinga kisho kya kutumba mwana jizhina pa juba ja butanu na busatu. Onkao mambo, bamutumbile uno mwana amba Yesu byonkatu byaambile malaika Ngabaliela.

Kukila pa ñondo umo, Yesu wafikizhe moba 40. Bansemi banji bamutwajile kwepi? Bamutwajile ku nzubo ya Lesa mu Yelusalema kabiji kechi palepele na po baikalanga ne. Kwesakana na Mizhilo ya Lesa yo apele Mosesa, pakupitapo moba 40 panyuma ya kusema mwana wamulume, inanji bamukambizhe kupana mulambo pa nzubo ya Lesa wa kwitokesha.

Abino byo byaubile Maliya. Waletele tuñonyi tubiji kwikala mulambo. Kino kimwesha byajinga bwikalo bwa ba Yosefwa ne Maliya. Mizhilo ya Mosesa imwesha’mba mukooko mulume wanema kukila bañonyi, ye wafwainwe kulambulwa. Bino umvwe inetu wakankalwa kuba kino, walambulanga bankunda babiji nangwa twana twa nkunda tubiji.

Mu nzubo ya Lesa mwajinga mwanamulume mukote watambwile Yesu mu maboko anji. Jizhina janji wajinga Shimeona. Lesa wamusolwejile amba kechi ukafwa saka akyangye kumona Kilishitu wa Yehoba walayilwe nangwa’mba Mesiasa ne. Shimeona byo aishile mu nzubo ya Lesa pa jino juba, mupashi wazhila wamutangijile ku mwana wasendele ba Yosefwa ne Maliya.

Shimeona byo atambwile Yesu wasanchijile Lesa ne kwamba’mba: “Anweba Nkambo Mfumu, pano namumona mwana monka mo mwaambijile, onkao mambo nakonsha kufwa na lusekelo mambo namona kala jishinda jo mukaletelamo lupulukilo jo mwanengezhezha kala bantu bonse, ye kyeya kikafumyapo kintu kilengela meso a bantu ba mu bisaka kubula kumona kabiji lo lukumo ku bantu benu bena Isalela.”

Ba Yosefwa ne Maliya bakuminye bingi pa kumvwa kino. Kepo Shimeona ebapesheshe ne kwambila Maliya amba, na mambo a mwanobe “bamo baketuntula kabiji bakwabo nabo bakemana,” ne kuba’mba mweo wobe ukekala na bulanda uba nobe bakwasa mpoko.

Kabiji ponka pano pajinga ne mwanamukazhi wa myaka 84 ngauzhi wamukazhi wa jizhina ja Ana. Kechi wazhikilwanga ku nzubo ya Lesa ne. Pa kyonkakya kimye waishile kwipi ne kutatula kusanchila Lesa ne kwamba pe Yesu ku bonse bakamuteleka.

Byo basangalelepo ba Yosefwa ne Maliya pa mambo a bino bintu byamwekele pa nzubo ya Lesa! Abino byonse bimwesha’mba uno mwana wajinga Walayilwe wa Lesa. Luka 2:21-38; Bena Levi 12:1-8.

▪ Kwesakana na kisho, ñanyi juba jo batumbilangamo jizhina mwana wamulume mwina Isalela?

▪ Ñanyi kintu kyo bakebelanga inetu mwina Isalela umvwe mwananji wafikizha moba 40, kabiji kufikizha kwa uno mukambizho kwasolwelepo ka pa bwikalo bwa kwa Maliya?

▪ Pa kikye kimye, bañanyi bayukile Yesu kabiji bamwesheshe byepi kino?