Funjishainga Baana Benu

Yesu Wafunjile Kukokela

NANCHI ne obewa kimye kimo kikukatazha kukokela nyi? —a Kechi wafwainwa kukumya umvwe kyaikala bino ne. Muntu yensetu kimye kimo kimukatazha kukokela. Nanchi wayuka’mba nangwatu Yesu naye wafunjile kukokela nyi? —

Nanchi wayuka muntu baana bonse ye bafwainwa kukokela nyi? — Ee, bashetu ne bainetu. Baibolo waamba’mba: “Kokelai bemusema monka mwaswila Nkambo.” (Efisesa 6:1) Shanji Yesu ñanyi? — Yehoba Lesa, kabiji ye Shetu ne atweba. (Mateo 6:9, 10) Bino umvwe waamba’mba Yosefwa ye shanji Yesu kabiji amba Maliya ye inanji, kechi watamisha ne. Nanchi wayuka byo baishile kwikala bansemi banji nyi? —

Malaika Ngabaliela wabujile Maliya byo afwainwe kwikala inanji Yesu nangwatu kya kuba kechi wasambakenepo na mwanamulume ne. Yehoba wamulengejile kwimita kupichila mu kuba kya kukumya kikatampe. Ngabaliela walumbulwijile Maliya kuba’mba: “Bulume bwa Mwine Wakila bukakunyeñamina: onkao mambo awa mwana ukasemekwa ukatelwa’mba wazhila, Mwana Lesa.”—Luka 1:30-35.

Lesa wavilwile bumi bwa Mwananji kufuma mwiulu kwiya munda mwa kwa Maliya. Kepo akomejile munda mwa kwa Maliya byonka bikoma baana bonse munda mwa bainabo. Byo papichile bañondo batanu na bana, Yesu wasemenwe. Pa kikye kimye, Yosefwa saka asongola kala Maliya, kabiji bantu bavula baambilenga’mba Yosefwa ye shanja Yesu. Kwambatu kine, Yosefwa wajinga shanji wa kushinda. Kwesakana na bino bishinka, twakonsha kwamba’mba Yesu wajinga na bashanji babiji!

Yesu byo afikizhe myaka 12, waubile kintu kyanema kyamwesheshe byo atemwisha Shanji wa mwiulu, aye Yehoba. Pa kyokya kimye, byo kyajinga kisho kyabo, kisemi kya kwa Yesu kyaendele musinso walepa kuya ku Yelusalema ku Kijiilo kya Lupitailo. Panyuma ya kino, byo babwelelenga ku Nazala, Yosefwa ne Maliya kechi bayukile’mba Yesu washala ne. Wakonsha kuyuka kyalengejile’mba bamulubeko nyi? —

Mambo pa kikye kimye, ba Yosefwa ne Maliya bajinga ne na baana bakwabo. (Mateo 13:55, 56) Kyamweka bayijilenga pamo ne na bakilongo, nabiji Yakoba, Yoano ne shabo Zebede ne inabo aye Salome, kampe uno wajinga kolojanji Maliya. Onkao mambo, kyamweka Maliya walangulukile’mba Yesu wajinga na balongo banji bakwabo mu kipanyi.—Mateo 27:56; Mako 15:40; Yoano 19:25.

Kimye Yosefwa ne Maliya kyo bamwene’mba Yesu kechi bajinga nanji ne, babwelele ku Yelusalema. Bamufumpijile bingi mwanabo. Pa juba ja busatu, bamutaine mu nzubo ya Lesa. Maliya wamwambijile’mba: “I ki ka kyo witubila bibye? Bashobe ne amiwa tubakukebenga na kijikila.” Bino Yesu wibakumbwile’mba: “Mwajikunsakilanga ka? Kechi mwajikuyuka’mba, nafwainwa kwikala mu nzubo ya Batata nenyi?”—Luka 2:45-50.

Nanchi walanguluka’mba Yesu watamishe pa kukumbula bainanji bino nyi? — Bansemi banji bayukile’mba watemenwe kupopwela mu nzubo ya Lesa. (Salamo 122:1) Onkao mambo, kyawamine bingi Yesu byo afuukwilepo kuba’mba bamutane mu nzubo ya Lesa — Maliya watwajijiletu na kulanguluka pa byambo byamwambijile Yesu.

Yesu wamonanga byepi ba Yosefwa ne Maliya? — Baibolo waamba’mba: “[Yesu] wayilenga nabo ne kufika wafikile ku Nazala; kasa ebanekenena.” (Luka 2:51, 52) Twakonsha kufunjilako ka, ku byaubile Yesu? — Ee, twafwainwa ne atweba kukokelanga bansemi betu.

Pano bino, Yesu kechi kyamupelejile kukokela bansemi banji, nangwatu Shanji wa mwiulu ne.

Saka akyangye kufwa, Yesu waipwizhe Yehoba umvwe Wakonsheshe kupimpula mulanguluko Wanji pa bintu byo Amukebele’mba obe. (Luka 22:42) Pano bino, Yesu wakokejile Lesa nangwatu kyakatezhe kuba bino. Baibolo waamba’mba, “wafunjile lukokelo ku byonkabya bintu byo amanamine.” (Bahebelu 5:8) Nanchi walanguluka’mba ne atweba twakonsha kuba byonka bino nyi? —

[Tubyambo twa mushi]

MEPUZHO:

▪ Maliya waikele byepi inanji Yesu, kabiji mu ñanyi jishinda Yesu mo aikejile na bashanji babiji?

▪ Mambo ka bansemi ba kwa Yesu o babujile kuyuka’mba Yesu washala?

▪ Kwepi Yesu ko aketekejile bansemi banji kumukebela?

▪ Kintu ka kyo wakonsha kufunjilako ku byaubile Yesu?

[Kipikichala pa peja 31]

Mambo ka o walangulukila’mba ba Yosefwa ne Maliya bafwainwe patanshi kukebela Yesu mu nzubo ya Lesa?