Yesu Wakokelanga Kimye Kyonse

Nanchi kyapela kukokela bansemi bobe nyi?— Bimye bimo kikatazha. Abya wayuka kuba’mba Yesu wakokelanga Yehoba ne bansemi banji ba pano pa ntanda nyi?— Inge ke ulondele byo aubanga, ne obewa ukakokelanga bansemi bobe nangwa kya kuba kechi kyapela ne. Twaya tufunde byavula pa lukokelo lwa kwa Yesu.

Yesu saka akyangye kwiya pano pa ntanda, waikalanga ne Shanji aye Yehoba mwiulu. Pano bino, Yesu wajinga ne na bansemi ba pano pa ntanda. Mazhina abo bajinga ba Yosefwa ne Maliya. Wayuka byo kyajinga pa kuba’mba bekale bansemi banji nyi?—

Yehoba wafumishe bumi bwa kwa Yesu mwiulu ne kwibubika munda ya kwa Maliya pa kuba’mba Yesu akasemwe ne kwikala pano pa ntanda. Kino kyajinga kya kukumya. Yesu wakomenenga munda ya kwa Maliya byonka bikoma baana bonse munda mwa bainabo. Byo papichile bañondo 9, Yesu wasemenwe. Bino byo byo kyajinga pa kuba’mba Maliya ne mwatawanji Yosefwa bekale bansemi ba kwa Yesu pano pa ntanda.

Yesu byo afikizhe myaka ya kusemwa 12, waubile kintu kyamwesheshe kuba’mba watemenwe Shanji wa mwiulu Yehoba. Kino kyamwekele kimye Yesu ne bansemi banji kyo baendele lwendo lwalepa bingi kuya ku Yelusalema na kutanwa ku Kijiilo kya Lupitailo. Pa kubwela ku nzubo, ba Yosefwa ne Maliya kechi bayukile kwajinga Yesu ne. Wayuka ko ajinga nyi?—

Ba Yosefwa ne Maliya babwelele bukiji bukiji ku Yelusalema na kukeba Yesu. Baakaminwe bingi mambo kechi bamutaine ne. Bino byo papichile moba asatu, bamutaine mu nzubo ya Lesa. Wayuka kyalengejile Yesu kwikala mu nzubo ya Lesa nyi?— Mambo wafunjilenga pe Shanji wa mwiulu, aye Yehoba. Watemenwe Yehoba kabiji wakebelenga kufunda bya kumutokesha ku muchima. Nangwatu byo akomene, Yesu wakokelanga Yehoba. Yesu wakokejile nangwatu kimye bintu kyo byakatezhe bingi, ko kuba’mba kimye kyo amanaminenga. Nanchi Yesu wakokelanga ne ba Yosefwa ne Maliya nyi?— Ee, Baibolo waamba’mba wibakokelanga.

Wakonsha kufunjilako ka kwi Yesu?— Wafwainwa kukokelanga bansemi bobe, nangwa kya kuba kimye kimo kechi kyapela ne. Nanchi usa kukokelanga nyi?—