Kitango 9
Yesu byo Akomenenga
YESU wakomenenga mu Nazala muzhi mucheche ye balengulwile ku bantu. Waikajile mu kyalo kya mitumba kyatelwanga’mba Ngalilea, kabiji kechi palepele na kimpachiko kyawama kya Yezelela ne.
Yesu byo afikizhe kampe myaka ibiji, ba Yosefwa ne Maliya bamuletele mu muzhi wa Nazala kufuma ku Ijipita, kyamweka pa kyokya kimye ye wakijingatu mwana wa kwa Maliya. Bino kechi watwajijile kwikala na mwana umotu ne. Mu kuya kwa moba, ba Maliya ne Yosefwa basemene Yakoba, Yosefwa, Shimona, Yudasa ne baana babakazhi. Onkao mambo, Yesu wajinga na bankasanji batanu na umo babalume ne babakazhi.
Yesu wajinga ne na balongo bakwabo. Twayukako kala Yoano kolojanji wa mu jivumo jikwabo, waikalanga kwalepa na Yudea. Bino Salome waikalanga kwipi na Ngalilea. Kabiji bajinga bankasa ne kolo ne Maliya. Salome wasongwelwe kwi Zebede kabiji bajinga na baana babalume babiji, Yakoba ne Yoano bankasa ne kolo ne Yesu mu jivumo jikwabo. Kana Yesu byo akomenenga wakayilanga pamo na bano baana babalume, kechi twayuka ne. Bino mu kuya kwa moba baikajile balunda nanji.
Yosefwa waingijilenga kyakosa bingi kumwena bintu ba mu kisemi kyanji. Wajinga kalipentala. Yosefwa wakomeshe Yesu nobe mwananji wa kwisemena. Onkao mambo, Yesu kyo kyo bamutelelanga’mba “mwana kalipentala.” Yosefwa wafunjishe Yesu kwikala kalipentala, kabiji wayukile bingi uno mwingilo. O ene mambo bantu o baambilanga pe Yesu amba, “Uno ye kalipentala.”
Yosefwa ne kisemi kyanji bapopwelanga Yehoba Lesa. Na mambo a kulama mizhilo ya Lesa, ba Yosefwa ne Maliya bafunjishanga baana babo bintu bya ku mupashi ‘kimye kyo bajinga mu nzubo yabo, pa kwenda mu jishinda, pa kulaala ne pa kubuka.’ Mu Nazala mwajinga nshinagoga kabiji twakonsha kuketekela’mba Yosefwa kimye kyonse wayanga konka pamo na kisemi kyanji na kupopwela. Bino kwa kubula nangwa kuzhinaukatu ne, basangalalanga bingi kimye kyonse kyo bayanga ku nzubo ya Yehoba mu Yelusalema. Mateo 13:55, 56; 27:56; Mako 15:40; 6:3; Mpitulukilo ya mu mizhilo 6:6-9.
▪ Yesu wajinga na bankasanji babalume ne babakazhi banga, kabiji bañanyi mazhina?
▪ Bañanyi bankasa ne kolo ne Yesu basatu ba mu jivumo jikwabo bayukanyikwa?
▪ Ñanyi mwingilo wa ku mubiji Yesu ye aingijilenga kabiji mambo ka?
▪ Ñanyi lufunjisho lwanema Yosefwa lo afunjishenga kisemi kyanji?