Kitango 10
Lwendo lwa ku Yelusalema
KYAJINGA kimye kya mwela wa mebele. Kabiji pa kikye kimye, kisemi kya kwa Yosefwa pamo na balunda ne balongo banji, batatwile kunengezha lwendo lo baikalanga nalo pa mwaka pa mwaka mu kimye kya mwela wa mebele lwa kuya ku Yelusalema ku Kijiilo kya Lupitailo. Byo bayilenga pa lwendo lwalepele makilomita 100, basangalele bingi. Pa kikye kimye Yesu wajinga na myaka 12 kabiji wakebeshe bingi kutanwa ku kino kijiilo.
Kijiilo kya Lupitailo kechi kyajingatu kintu kya juba jimo Yesu, bankasanji ne bansemi banji ko batanwanga ne. Kabiji batainwe ne ku Kijiilo kya moba atanu na abiji kya Bashinkwa Bakubula Mbizho kyo baubanga mu kimye kya Kijiilo kya Lupitailo. Onkao mambo, lwendo lonse kufuma ku nzubo yabo mu Nazala kuvwangakotu ne moba o baikalanga mu Yelusalema, lwaikalanga milungu ibiji. Bino mu iwe mwaka na mambo a kwa Yesu moba avujileko.
Lukatazho lwaikeleko kimye kyo babwelelenga kufuma ku Yelusalema. Ba Yosefwa ne Maliya balangulukile’mba Yesu uji mu balongo ne balunda mo bayijilenga. Nangwa byonkabyo, byo balaajile pakachi kechi bamumwene ne, kabiji bayile na kumukeba mu bayukane mo bayijilenga. Bino kechi bamutaine ne. Onkao mambo, ba Yosefwa ne Maliya babwelelemo ku Yelusalema na kumukeba.
Bamukebele juba jonse, bino kechi bamutaine ne. Kabiji juba jalondejilepo najo kechi bamutaine ne. Pa juba ja busatu bayile ku nzubo ya Lesa. Mu kibamba kimo kya mu nzubo ya Lesa bamwene Yesu saka aikala mukachi ka bafunjishi Bayudea na kuteleka kwi abo ne kwibashikisha mepuzho.
Maliya wamushikishe’mba: “Mwanami, mambo ka o witubila bibye? Bashobe ne amiwa twaji kwakamwa bingi byo tubakukebenga.”
Yesu wakuminye bingi byo babujile kuyuka kwa kumutana. Wibashikishe’mba: “Mambo ka o mubankebelenga? Nanchi kechi mwayuka amba nafwainwa kwikala mu nzubo ya Batata nenyi?”
Yesu wakuminye bingi ene mambo bansemi banji o babujile kuyuka kino. Ponkapo Yesu wabwelele ku muzhi na bansemi banji kabiji watwajijile kwibanekenena. Kabiji wakomenenga mu maana ne mu kimino saka bamutemwa kwi Lesa ne ku bantu. Kufumatu ku bwanyike bwanji, Yesu ye wakumwenako wawama kechi mu kukebatu bintu bya ku mupashi ne, bino ne mu kunemeka bansemi banji. Luka 2:40-52; 22:7.
▪ Ñanyi lwendo mu kimye kya mwela wa mebele Yesu, bankasanji ne bansemi banji lo baikalanga nalo kimye kyonse, kabiji lwalepele byepi?
▪ Ñanyi kintu kyamwekele pa lwendo lwabo kimye Yesu kyo ajinga na myaka 12?
▪ Ñanyi kintu banyike kyo bakonsha kufunjilako kwi Yesu?