Kitango 16

Lupata lwa Kupopwela Yehoba

BANKASANJI Yesu, ko kuba’mba baana babalume ba kwa Maliya bajinga ba Yakoba, Yosefwa, Shimona ne Yudasa. Abano bonse saka bakyangye kuya ne Yesu ne baana banji ba bwanga ku Kapenama muzhi wajinga kwipi na Kalunga ka Ngalilea, kyamweka bakikeleko ku nzubo yabo mu Nazala kuba’mba kisemi kinengezhe bintu byo bakebelenga.

Pano mambo ka Yesu o ayijile ku Kapenama mu kifulo kya kutwajijila kwingila mwingilo wanji mu Kena, mu Nazala nangwa mu mapunzhatu akwabo a mu mitumba ya Ngalilea? Kapenama wajinga muzhi wayukanyikilwe kabiji wabayile bingi. Kabiji baana ba bwanga bamo ba kwa Yesu batanshi baikalanga kwipi na Kapenama nangwa mu Kapenama, onkao mambo kechi bafwainwe kusha mazubo abo kuba’mba akebafunjishe ne.

Byo akijinga mu Kapenama, Yesu waubile mingilo ya kukumya, byonkatu mwine byo aambile mu bañondo balondejilepo. Bino Yesu ne balunda nanji baimene lwendo jibiji. Kyajinga kimye kya mwela wa mebele, bayilenga ku Yelusalema na kutanwa ku Kijiilo kya Lupitailo mu 30 C.E. Byo ajinga kokwa, baana banji ba bwanga bamwene kintu kyaubile Yesu kampe kyo babujile kumonapo kala.

Kwesakana na Mizhilo ya Lesa, bena Isalela bebakambizhe kulambula banyama. Onkao mambo, na mambo a kubula kukeba kuya kwalepa, bapoteshi ba mu Yelusalema bapoteshanga banyama nangwa bañonyi kuba’mba bantu bebalambulenga. Bino bapoteshanga monka mukachi ka nzubo ya Lesa kabiji bajiilanga bantu kupichila mwi kwibapotesha pa mutengo wabaya.

Yesu byo azhingijile, walengele bwembya bwa mizhinge ne kupangamo basulu. Waichijile mali a boba beapimpwilenga ne kupinuna matebulu abo. Wabijikile ne kwambila aba bapoteshenga bankunda amba: “Bifumyaimo bino bintu muno! Kilekai kwalula nzubo ya Batata ke nzubo ya kubilamo busulu!”

Baana ba bwanga ba kwa Yesu byo bamwene kino, bavulukile bungauzhi bwaamba pa Mwana Lesa amba: “Lupata lwa nzubo yenu, lukangikala ku muchima.” Bino Bayudea bamushikishe’mba: “Ñanyi kiyukilo kyo usakwitumwesha pa kuba amba tuyuke amba uji na lūsa lwa kuba bino bintu kwi atweba?” Yesu wibakumbwile’mba: “Onaunai ino nzubo ya Lesa, ne amiwa nkeimika mu moba asatu.”

Bayudea balangulukilenga’mba Yesu ubena kwamba pa nzubo ya Lesa yonkaye, onkao mambo bamushikishe’mba: “Ino nzubo ya Lesa yashimikilwe pa myaka makumi ana ne myaka itanu na umo, nanchi ukakonsha kwiimika mu moba asatu nyi?” Nangwa byonkabyo, nzubo ya Lesa Yesu yo ambilengapo yajinga mubiji wanji. Kabiji panyuma ya myaka isatu, baana banji ba bwanga bavulukile bino byambo byanji kimye kyo asangukile ku bafu. Yoano 2:12-22; Mateo 13:55; Luka 4:23.

▪ Panyuma ya masongola mu Kena, ñanyi mapunzha Yesu o ayileko?

▪ Mambo ka Yesu o azhingijile, kabiji ñanyi kintu kyo aubile?

▪ Ñanyi kintu baana ba bwanga ba kwa Yesu kyo bavulukile pa kumona kintu kyo aubile?

▪ Ñanyi kintu Yesu kyo aambile pa “nzubo ya Lesa,” kabiji watazhizhe mu ka?