Yesu Wamwesheshe Mukoyo Wa Kutundaika Mpopwelo Ya Kine

Kijiilo kya masongola mu Kena byo kyapwile, Yesu waimene lwendo kuya ku Kapenama. Wayijile pamo ne bainanji ne bankasanji, ba Yakoba, Yosefwa, Shimona ne Yudasa.

Pano mambo ka Yesu o ayijile ku Kapenama? Kapenama wajinga muzhi wayukanyikilwe kabiji wabayile bingi kukila muzhi wa Nazala ne Kena. Kabiji baana ba bwanga ba kwa Yesu batanshi bamo baikalanga mu Kapenama nangwa kwipi na Kapenama. Onkao mambo, Yesu wakebelenga’mba aye na kwibafunjishisha mu muzhi mo baikalanga.

Byo ajinga mu Kapenama, Yesu waubile mingilo ya kukumya yavula. Onkao mambo, bantu bavula ba mu uno muzhi ne mizhi yazhokolokeleko baumvwine byo aubile ko ino mpunzha. Bino Yesu waimene lwendo lwa kuya ku Yelusalema na kutanwa ku Kijiilo kya Lupitailo mu 30 C.E. Wayijile pamo na baana banji ba bwanga, bajinga Bayudea balamanga mizhilo.

Byo bafikile pa nzubo ya Lesa mu Yelusalema, baana banji ba bwanga bamwene kintu kyaubile Yesu kyo babujile kumonapo kala.

Mizhilo ya Lesa yakambizhe bena Isalela kulambula banyama pa nzubo ya Lesa, kabiji benyi bakebewanga kajo kimye kyo baikalanga mu Yelusalema. Onkao mambo, Mizhilo yaswishishe bantu baiyanga mu Yelusalema bafumanga kwalepa kwiya na mali a kupotamo “bañombe, mikooko, bambuzhi” ne bintu bikwabo bya kwingijisha kimye kyo baikalanga mu uno muzhi. (Mpitulukilo ya mu Mizhilo 14:24-26) Na mambo a kino, basulu ba mu Yelusalema bapoteshanga banyama nangwa bañonyi monka mukachi ka kipango kikatampe kya nzubo ya Lesa. Kabiji bamo bajiilanga bantu kupichila mu kwibapotesha bintu pa mutengo wabaya.

Yesu byo azhingijile, waichijile mali a boba beapimpwilenga, kupinuna matebulu abo ne kwibapangamo. Kepo aambile’mba: “Fumyai bino bintu muno! Kilekai kwalula nzubo ya Batata ke nzubo ya kubilamo busulu!”—Yoano 2:16.

Baana ba bwanga ba kwa Yesu byo bamwene kino, bavulukile bungauzhi bwaamba pa Mwana Lesa amba: “Mukoyo wa nzubo yenu, ukangikala ku muchima.” Bino, Bayudea bamwipwizhe’mba: “Ñanyi kiyukilo kyo usakwitumwesha, byo ubena kuba bino bintu?” Yesu wibakumbwile’mba: “Kundulai ino nzubo ya Lesa, ne amiwa nkeimika mu moba asatu.”—Yoano 2:17-19; Salamo 69:9.

Bayudea balangulukilenga’mba Yesu ubena kwamba pa nzubo ya Lesa yonka yajinga mu Yelusalema, onkao mambo, bamwipwizhe’mba: “Ino nzubo ya Lesa yashimikilwe pa myaka 46, nanchi ukakonsha kwiimika mu moba asatu nyi?” (Yoano 2:20) Bino, nzubo ya Lesa yaambilengapo Yesu wajinga mubiji wanji. Kabiji pakupitapo myaka isatu, baana banji ba bwanga bavulukile bino byambo byanji kimye kyo asangukile.