Kya Kukumya Kitanshi Kyaubile Yesu Pa Masongola

Jajinga juba ja busatu kufuma kimye Natanela kyo aikele mwana wa bwanga wa kwa Yesu. Yesu ne baana banji ba bwanga batanshi bamo babwelelenga kwabo ku kibunji kya Ngalilea bonse ko baikalanga. Bayilenga ku Kena muzhi mwaikalanga Natanela. Muzhi wa Kena waikejile mu mitumba, ku buyeke bwa Nazala kwakomejile Yesu. Bebechile ku kijiilo kya masongola ku Kena.

Bainanji Yesu nabo baishile ku masongola. Byo ajinga mulunda wa kisemi kya boba batwelelenga mu masongola, Maliya kyamweka waingijilengako mingilo ya kukwasha benyi bavula baishile. Onkao mambo, byo amwene’mba paji bimo bibena kukebewa pa kijiilo, wabuujile Yesu amba: “Binyu byapwa.”—Yoano 2:3.

Maliya wakebelenga’mba Yesu obepo kimo pa binyu byapwile. Bino Yesu washikishe bainanji amba: “Pano kitulamata byepi amiwa ne anweba?” (Yoano 2:4) Byo ajinga Mfumu ye batongola kwi Lesa, balongo banji nangwa balunda nanji kechi bafwainwe kumubuula bya kuba ne. Onkao mambo, Maliya wayukile’mba mwananji usa kuyuka bya kuba kabiji waambijile aba baingijilenga’mba: “Kyonse kyo asakwimwambila, mwikyube.”—Yoano 2:5.

Pajinga milondo ya mabwe itanu na umo mwakulamina mema. Mulondo umo watwezhanga mema malita 40. Yesu waambijile aba baingijilenga’mba: “Yuzhai mema mu milondo.” Kabiji ba mingilo beiyuzhizhe ne pa kanwa. Kepo Yesu aambile’mba: “Tapulaimo, mutwajile mukulumpe wa kijiilo.”—Yoano 2:7, 8.

Mukulumpe wa kijiilo watemenwe bingi na mambo a kuwama kwa binyu, bino aye kechi wayukile’mba abya binyu byalengelwe mu jishinda ja kukumya ne. Onkao mambo, waichile musongoshi ne kumwambila’mba: “Muntu yense patanshi ukisolola binyu byawama, bino umvwe bantu bapendwa, wibapa binyu byatama. Obewa waji kukifya binyu byawama pano po po wibipana.”—Yoano 2:10.

Kino kyo kyajinga kya kukumya kitanshi kyaubile Yesu. Baana banji ba bwanga batanshi byo bamwene kino kya kukumya, lwitabilo lwabo lwakosejileko. Panyuma ya kino, Yesu, bainanji ne bankasanji bayile ku muzhi wa Kapenama kwipi na Kalunga ka Ngalilea.