Kitango 15

Kya Kukumya Kitanshi Kyaubile Yesu

PAPICHILETU juba jimo nangwa abiji ba Andeleo, Petelo, Yoano, Filipa, Natanela kampe ne Yakoba po baikele baana ba bwanga batanshi ba kwa Yesu. Abano babwelelenga kwabo ku kibunji kya Ngalilea bonse ko basemekejilwe. Bayilenga ku Kena muzhi mwaikalanga Natanela wajinga mu mitumba, bino kechi palepele na Nazala kwakomejile Yesu ne. Bebechile ku kijiilo kya masongola ku Kena.

Bainanji Yesu nabo baishile ku masongola. Byo ajinga mulunda wa yewa watwelelenga mu masongola, Maliya kyamweka waingijilengako mingilo ya kukwasha benyi bavula baishile. Onkao mambo, wamwene’mba kuji bintu byabulapo, ne kubula Yesu amba: “Binyu byapwa.”

Maliya byo abujile Yesu kuba’mba obepo kintu kimo pa mambo a binyu byapwile, Yesu wakankazhamine. Yesu washikishe’mba: “Pano nanchi tube byepi amiwa ne anweba?” Byo ajinga Mfumu ye batongola kwi Lesa, balongo banji nangwa balunda nanji kechi bafwainwe kumubula bya kuba ne. Onkao mambo, Maliya walekejile mwananji amba usakuyuka bya kuba ne kwambila aba baingijilenga’mba: “Kyonse kyo asakwimwambila, mwi kyube.”

Pajinga milondo ya mabwe itanu na umo ya mema. Mulondo umo umo wabayile wa kwitulwilamo bandundundu kukila pa jikumi. Yesu waambijile aba baingijilenga’mba: “Yuzhai mema mu milondo.” Kabiji bamwingilo beiyuzhizhe ne pa kanwa. Kepo Yesu aambile’mba: “Tapulaimo, mutwajile mukulumpe wa kijiilo.”

Mukulumpe wa kijiilo watemenwe bingi na mambo a kuwama kwa binyu, bino aye kechi wayukile’mba abya binyu byalengelwe mu jishinda ja kukumya ne. Byo aichile musongoshi wamwambijile’mba: “Muntu yense patanshi ukisolola binyu byawama, bino umvwe benyi bapendwa, wibapa binyu byatama. Waji kufya binyu byawama pano po po wibipana ku benyi.”

Kino kyo kyajinga kya kukumya kitanshi kyaubile Yesu, kabiji baana banji ba bwanga batanshi byo bekimwene, lwitabilo lwabo lwakosejileko. Panyuma ya kino, aye, bainanji ne bankasanji bayile ku muzhi wa Kapenama kwipi na Kalunga ka Ngalilea. Yoano 2:1-12.

▪ Ñanyi kimye mu mwingilo wa kwa Yesu mwaubijilwe masongola mu Kena?

▪ Mambo ka Yesu o akankazhamine pa byamubujile bainanji amba obe?

▪ Ñanyi kya kukumya kyaubile Yesu, kabiji kyakwashishe byepi bantu bakwabo?