Kya Kukumya Kya Bubiji Kyo Aubile Mu Kena

Yesu byo abwelelenga kwabo ku Ngalilea panyuma ya kwingila mwingilo mukatampe wa kusapwila mu Yudea, waikele moba abiji mu Samaliya. Kechi wabwelelenga kwabo kuba’mba akakookolokepo ne. Bino, watendekele kwingila mwingilo mukatampe wa kusapwila mu kyalo mo akomejile. Kechi waketekejile’mba bakamutambwila bulongo ne, mambo waambijile jimo kuba’mba: “Ngauzhi kechi bamunemeka mu muzhi wanji ne.” (Yoano 4:44) Nangwa byonkabyo, baana banji ba bwanga kechi baikele nanji ne, abo babwelele ku bisemi byabo ne ku mingilo yo baingilanga kala.

Ñanyi byambo Yesu byo atatwile kusapwila? Wasapwijilenga’mba: “Bufumu bwa Lesa bwafwenya pepi. Lapilai, ne kwitabila mambo awama.” (Mako 1:15) Nga bantu baubilepo byepi? Bena Ngalilea bamutambwijile Yesu ne kumunemeka. Kechi bamunemekele na mambotu a byambo byanji ne, bino ne na mambo a kuba bamo bafumine ku Ngalilea bashinkilweko ku kyokya Kijiilo kya Lupitailo mu Yelusalema ne kumona biyukilo byavula byo aubile.—Yoano 2:23.

Kwepi Yesu ko atatwijile mwingilo wanji mukatampe mu Ngalilea? Kyamweka kwajinga ku Kena, konka ko aalwile mema ke binyu pa kijiilo kya masongola kimye kitanshi kyo ayileko. Pa kimye kya bubiji kyo ajinga mu Kena, Yesu waumvwine’mba kuji mwana wakolwa bingi. Uno mwana wajinga wa kinemanga umo wa mu bufumu bwa kwa Heloda Antipasa, mfumu wachibile mutwe wa kwa Yoano Mubatizhi. Byo aumvwine’mba Yesu wafuma kala ku Yudea waiya ku Kena, uno kinemanga wafumine mu muzhi wanji mu Kapenama ne kuya ku Kena na kukeba Yesu. Na mambo a kuba uno kinemanga wajinga bingi na bulanda, wasashijile Yesu amba: “Nkambo, twayai mwanami saka akyangye kufwa.”—Yoano 4:49.

Yesu wamukumbwile na byambo byamulengejile kukumya, bya kuba’mba: “Yanga; mwanobe wabukwa.” (Yoano 4:50) Kinemanga wa kwa Heloda waitabijile bya mubuujile Yesu kabiji watendekele kubwela ku nzubo yanji. Bino byo akijinga mu jishinda, bakalume banji bamutundaijile ne kumubuula sawakya wawama. Bamubuujile’mba mwananji wakosa. Na mambo a kukeba kukwatakanya byonse byamwekele, wibashikishe’mba: ‘Ñanyi kimye kyo aji kukosa?’

Abo bamukumbwile’mba: “Kikola kya mashika kyapwile kesha pa jiola ja butanu na bubiji.”—Yoano 4:52.

Uno kinemanga wayukile kuba’mba kimye kyakosejilepo mwananji kyo kimye Yesu kyo amwambijile’mba: “Mwanobe wabukwa.” Ponkapo, uno kinemanga ne bonse ba mu nzubo yanji baikele baana ba bwanga ba kwa Kilishitu.

Onkao mambo, Kena ye muzhi Yesu mo aubijile bya kukumya bibiji, kwalula mema ke binyu ne kubuka mwana wamulume wajinga mu muzhi mukwabo palepele makilomita 26. Abino bya kukumya kechi byo byonkatu byo aubile ne. Pano bino, kino kya kukumya kya kubuka mwana kyanemene bingi mambo kyajinga kiyukilo kya kubwela kwanji ku Ngalilea. Kyamwekeletu patoka’mba ye ngauzhi watongolwa na Lesa. Pano bino, nanchi uno ‘ngauzhi bamunemekele mu muzhi wanji’ nyi?

Kino kyaishile kuyukanyikwa bulongo kimye Yesu kyo abwelele kwabo ku Nazala. Ñanyi bintu byakamwekele ku Nazala?