Kitango 21

Yesu mu Nshinagoga Yajinga mu Muzhi mo Aikalanga

KWA KUBULA nangwa kuzhinaukatu ne, bantu mu Nazala basangalele bingi kimye Yesu kyo abwelele. Byo papichile mwaka umo saka akyangye kuya kwi Yoano amba akamubatizhe, Yesu wayukanyikilwe amba kalipentala. Bino pa kikye kimye wayukanyikilwe amba uba bya kukumya. Bangikazhi basakishe bingi kuba’mba ebobilepo bya kukumya.

Yesu byo atwelele mu nshinagoga byonka byo aubanga kimye kyonse, po po bakijishemo kukeba kumona byavula. Kimye byo kyafikile kuba’mba atange Binembelo, Yesu waimene kabiji bamupele muvungilo wa ngauzhi Isaya. Wataine po kyanembwa pa mambo a Mushingwa ye bashingile na mupashi wa Yehoba, lelo jino bino byambo bitanwa mu Baibolo mu kitango 61.

Panyuma ya kupwisha kutanga pa mambo a uno Mushingwa byo akasapwila kukasululwa kwa bo bakwata buzha, kulabisha meso a bampofu ne kwibabula kimye kyo bakobilwa bibusa kwi Yehoba, Yesu wavungile muvungilo ne kumubwezha ku wamwingilo kabiji waikele. Bantu bonse bamwimbwijile meso. Kepo atatwile kwamba kampe pa kimye kyabaya amba: “Lelo jino kino kinembelo kyo mwafumatu na kumvwa, kyafika.”

Bantu bakuminye bingi pa “byambo bya bupe byafuminenga mu kanwa kanji” ne kwiambila mulwabo amba: “Nanchi uno kechi ye mwana Yosefwa nenyi?” Bino byo ayukile’mba basakilenga amba obepo bya kukumya, Yesu wibambijile’mba: “Kwa kubula kuzhinauka ne, musakuñambila bino byambo amba: ‘Anweba shayuka wa michi, ibukai,’ kabiji musakwamba amba: ‘Twaumvwine byamwekele mu Kapenama, onkao mambo, byubai ne muno mu nyaunda yenu.’” Bantu mo baikelanga nyaunda imo ne Yesu balangulukile’mba kubuka kwafwainwe kutatwila mu muzhi wanji kuba’mba bantu banji patanshi bamwenemo. Onkao mambo, bekimwene’mba Yesu wibalengulula.

Yesu byo ayukile ndangulukilo yabo wibashimikizhepo byakumwenako bimo. Waambile’mba, mu bena Isalela mwajinga banabakazhi bavula bafwijilwe mu moba a Elaija, bino Elaija kechi bamutumine ku bano bantu ne. Bamutumine ku mwanamukazhi wafwijilwe wabujile mwina Isalela wajinga mu kyalo kya Shidona. Akwa ko ko akobijile kya kukumya. Kabiji mu moba a Elisha mwajinga bambumba bavula, bino Elisha wabukile Nemani mwina Silya.

Aba bajinga mu nshinagoga byo baumvwine bino bintu byasolwele byajinga mu michima yabo ne kubula lwitabilo kwabo, bamuzhingijile bingi Yesu kabiji bamuvundumukijile ne kumutwala pangye ya muzhi. Akwa bamutwajile kunsa ya mutumba po bashimikijile muzhi wa Nazala kuba’mba bamushinjikile munshi. Bino Yesu wibaposomokele ne kunyema wanyemene kwa kubula kumukozha. Luka 4:16-30; 1 Bamfumu 17:8-16; 2 Bamfumu 5:8-14.

▪ Mambo ka bantu o basangalejile mu Nazala?

▪ Bantu balangulukilepo amba ka pa byaambile Yesu, bino ñanyi kintu kibalengejile kuzhingila?

▪ Ñanyi kintu bantu kyo bakebele kumuba Yesu?