Kitango 48

Wafumineko ku Nzubo ya kwa Yelusa ne Kubwela Jibiji ku Nazala

PA JIJE juba Yesu wapayankene bingi, wafumine na bwato ku Ndekapoli, wabukile mwanamukazhi wajinga na mukunko wa mashi ne kusangula mwana wamukazhi wa kwa Yelusa. Abino kechi byo byonkatu byo aubile ne. Yesu byo afumine ku nzubo ya kwa Yelusa, banabalume babiji bampofu bamulondejilenga saka babijika’mba: “Anweba Mwana Davida, tubilai lusa.”

Byo batelele Yesu amba “Mwana Davida,” bano banabalume balumbulwilenga byo baitabijile kuba amba Yesu ye ukaswana pa jitanda ja kwa Davida, ko kuba’mba ye Mesiasa walayilwe. Nangwa byonkabyo, Yesu kechi wateleko muchima ku byo babijikilenga’mba ebakwashe ne, kampe waubile kino kukeba kwibeseka kuyuka mukoyo wabo. Bino bano banabalume kechi bekilekele ne. Bamulondejile Yesu ko aikelenga kabiji byo atwelele mu nzubo ne abo batwelele.

Yesu wibashikishe’mba: “Nanchi muji na lwitabilo kuba amba nakonsha kuba kino nyi?”

Abo bakumbwile na muchima yense amba: “Ee, Nkambo.”

Byo ebakwachile pa meso, Yesu wibambijile’mba: “Kyubiwe monka mwayila lwitabilo lwenu.” Ponkapotu batatwile kumona. Kepo Yesu ebakambizhe kyakosa amba: “Kange mubulepotu muntu nangwa umo ne.” Bino na mambo a lusekelo, kechi bakokejile bibakambizhe Yesu ne, bakumbenye mu yoya mpunzha yonse akya kyo aubile.

Bano banabalume byo bafuminekotu, bantu bamuletejile mwanamulume kamaama ye bakatazhanga ku ndemona. Yesu wamupangilemo uno ndemona, ponkapotu uno mwanamulume watatwile kwamba. Jibumba jakuminye bingi ne kwamba’mba: “Mu Isalela mukyangye kumwekapo kintu kya uno mutundu.”

Kabiji Bafaliseo nabo bajinga ponka. Kechi bakonsheshe kukana bino bya kukumya ne, bino na mambo a michima yabo yatamine yabujile lwitabilo baambilenga pe Yesu ko afumishenga bulume bwa kuba bya kukumya amba: “Uno muntu upanga bandemona na bulume bwa mukulumpe wa bandemona.”

Panyuma ya bino bintu byamwekele, Yesu wabwelele kwabo ku Nazala, pa kikye kimye wayijile pamo na baana banji ba bwanga. Papichile mwaka umo kufuma po afwakashijile yoya nshinagoga ne kufunjisha monka. Nangwa kya kuba kimye kitanshi bantu bakuminye pa byambo byanji byawama, palutwe kacheche bazhingijile mo afunjishishenga kabiji basakile ne kumwipaya. Na mambo a lusa, Yesu waesekele jibiji kuba’mba akwashe bantu mo baikelanga kala kipikipi.

Nangwa kya kuba mu mapunzha akwabo bantu bavula baishilenga kwi Yesu, kuno kechi baishile koaji ne. Onkao mambo, pa juba ja Sabado watwelele mu nshinagoga na kufunjisha. Bantu bavula bamutelekelenga bakuminye bingi. Beshikishenga mulwabo amba: “Nanchi uno muntu wafunjijile kwepi ano maana ne ino mingilo ya kukumya?” “Nanchi kechi ye mwana kalipentala nenyi? Inanji kechi bamutela amba Maliya nenyi? Ne bankasanji kechi bo ba Yakoba, Yosefwa, Shimona ne Yudasa nenyi? Ne banyenga yanji bonse kechi tuji nabo monka muno nenyi? Nanchi kwepi uno muntu ko afunjile bino bintu byonse?”

Baambilenga’mba ‘Yesu ke muntutu byonka byo tuji.’ ‘Wakomejile mu meso etu kabiji kisemi kyanji twikiyuka. Nanchi wakonsha kwikala byepi Mesiasa?’ Onkao mambo, nangwa kya kuba pajinga bishiino byamwesheshenga maana anji ne bya kukumya byo aubile, bamukaine. Na mambo a kwikala nanji, ne balongo banji bamulengulwile, kino kyo kyalengejile ne Yesu kwamba’mba: “Ngauzhi bamunemeka ku bantu bangi kechi ku ba mu muzhi wanji, ku balongo banji ne ku ba mu nzubo yanji ne.”

Kine Yesu wakuminye bingi pa kubula lwitabilo kwabo. Onkao mambo, kuno kechi waubileko mingilo ya kukumya ne, kana kutenteka maboko anji pa bamo bakolelwe ne kwibabuka. Mateo 9:27-34; 13:54-58; Mako 6:1-6; Isaya 9:7.

▪ Pa kutela Yesu amba “Mwana Davida,” aba banabalume bampofu bamwesheshe’mba baitabijile mu ka?

▪ Bafaliseo baambilenga amba Yesu waubilenga bya kukumya na bulume bwa kwa ñanyi?

▪ Mambo ka o kyaikejile lusa kwi Yesu kubwela na kukwasha aba bajinga mu Nazala?

▪ Bantu bamutambwijile byepi Yesu mu Nazala, kabiji mambo ka?