Yesu Waubilenga Bya Kukumya Na Bulume Bwa Kwa Ñanyi?

Panyuma ya kwamba pa kulekelako mambo ku nzubo ya kwa Shimona Mufaliseo, Yesu watatwile lwendo lwanji lwa bubiji lwa kusapwila mu Ngalilea. Pa luno lwendo lwanji lwa bubiji, kechi wajinga bunke ne. Wayijile pamo na batumwa banji 12 ne banabakazhi bamo ‘bo apangilemo mipashi yatama ne bo abukile bikola.’ (Luka 8:2) Pa bano banabakazhi pajinga Maliya Mangadala, Susana, ne Yoana wasongwelwe ku kalama wa nzubo ya Mfumu Heloda Antipasa.

Bantu baumvwinenga nkuwa ya kwa Yesu byo bavujijilengako, ne mapata nao pa mambo a mwingilo wanji abayijilengako. Kino kyamwekele patoka kimye Yesu kyo abukile mwanamulume ye bamuletejile wajinga na ndemona, wajinga mpofu kabiji wajinga kamaama. Ndemona wamumanyikilenga wafuminemo kabiji uno mwanamulume watatwile kwamba ne kumona. Bantu bonse bakuminye bingi kabiji batatwile kwamba’mba: “Nanchi uno kechi ye mwana Davida nenyi?”—Mateo 12:23.

Bantu bavula bakonkenejile ku nzubo kwaikelenga Yesu kya kuba aye ne baana banji ba bwanga bakankelwe ne kuja. Nangwa byonkabyo, kechi bonse balangulukilenga’mba Yesu ye “Mwana Davida,” walailwe ne. Banembeshi ne Bafaliseo bamo baishile kufuma ku Yelusalema, bino kechi baishile’mba bafunde kwi Yesu nangwa kutundaika mwingilo wanji ne. Batendekele kubuula bantu amba: “Uno muntu uji na Belezebuba,” onkao mambo, ubena kwingijila pamo na “mukulumpe wa bandemona.” (Mako 3:22) Balongo banji byo baumvwine’mba kuji Yesu kuji kiwowo, baishile’mba bamukwate. Mambo ka?

Pa kyokya kimye bankasanji Yesu kechi bakimwitabijile’mba Mwana Lesa ne. (Yoano 7:5) Kwesakana na byubilo byo bamuyukijilemo kimye kyo akomenenga mu Nazala, kechi baketekejile’mba Yesu wakonsha kuleta kiwowo ne. Onkao mambo, byo baumvwine’mba ye waleta kiwowo, baambilenga’mba: “Wakonya.”—Mako 3:21.

Pano bino, bishinka byamwesheshenga ka? Yesu wabukile muntu wajinga na ndemona ne kumulengela kwamba ne kumona, kabiji kafwako wakonsheshe kukana kino kishinka ne. Onkao mambo, banembeshi ne Bafaliseo batendekele kulengulula Yesu kupichila mu kumupamo mambo a bubela ne kwamba’mba: “Uno muntu upanga bandemona na bulume bwa kwa Belezebuba, mukulumpe wa bandemona”—Mateo 12:24.

Byo ayukile milanguluko yabo, Yesu waichile banembeshi ne Bafaliseo ne kwibambila’mba: “Bufumu bonaika umvwe bene benabo bealukamo, kabiji muzhi nangwa nzubo yonaika umvwe bene mulwabo bealukamo. Byonkabyo, umvwe Satana upangamo Satana, ko kuba’mba wialukilamo mwine; pano nga bufumu bwanji bukakosa byepi?”—Mateo 12:25, 26.

Kine, kafwako wakonsha kukana bishinka byalumbulwile Yesu ne. Bafaliseo bayukile kuba’mba Bayudea bamo bapanganga bandemona. (Byubilo 19:13) Onkao mambo, Yesu waipwizhe’mba: “Umvwe amiwa mpanga bandemona na bulume bwa kwa Belezebuba, nga baana benu bapanga bandemona na bulume bwa kwa ñanyi?” Mu jishinda jikwabo, ne abo bafwainwe kwibapamo mambo onka o bapelengamo Yesu. Yesu watwajijile na kwamba’mba: “Bino umvwe mpanga bandemona na bulume bwa mupashi wa Lesa, ko kuba’mba Bufumu bwa Lesa bwaiya kwi anweba kwa kubula kuyuka.”—Mateo 12:27, 28.

Pa kumwesha’mba bulume bwanji bwa kupangamo bandemona bwakila bwa kwa Satana, Yesu waambile’mba: “Nanchi muntu wakonsha kutwela mu nzubo ya kilobo ne kumwangata bipe kwa kubula patanshi kukimukasa nyi? Inge wauba bino po po akonsha kwangata bipe bya mu nzubo yanji. Yense wabula ku lubaji lwami ye mulwanyi wami, ne yense ubula kukonkanya pamo ne amiwa upalañanya.” (Mateo 12:29, 30) Banembeshi ne Bafaliseo kine bamushikilwe Yesu kabiji bamwesheshe’mba bajinga bamingilo ba kwa Satana. Bapalañenyenga bantu kufuma ku Mwana Lesa waingijilenga mingilo na bukwasho bwa Yehoba.

Onkao mambo, Yesu wajimwine bamingilo ba kwa Satana amba: “Bantu bakalekelwa mambo onse o balenga nangwa mwenga yense ye bamba. Pakuba yense uba mwenga mupashi wazhila kechi bakamulekelako mambo ne, bino walenga mambo a myaka ne myaka.” (Mako 3:28, 29) Bano bantu balengelenga mambo abula kulekelwa byo baambilenga’mba bya kukumya byaubilwenga na lutangijilo lwa mupashi wa Lesa amba byafuminenga kwi Satana.