Kitango 22

Waichile Baana ba Bwanga Bana

BANTU byo bakebele kwipaya Yesu mu Nazala muzhi mo aikalanga, wayile na kwikala mu Kapenama uji kwipi na Kalunga ka Ngalilea. Kino kyafikizhe bungauzhi bukwabo bwaambilepo Isaya. Uno ye yewa waambile’mba bantu ba mu Ngalilea baikajilenga ku musezho wa kalunga ka mema bakamona kyeya kikatampe.

Yesu byo atwajijile kusamisha kyeya kya kusapwila pa Bufumu, wamwene baana ba bwanga bana. Bano baingijilepo kala nanji, bino bamushile ne kubwela ku mwingilo wabo wa kukwata masabi kimye kyo bafumine ne Yesu ku Yudea. Kyamweka Yesu wibakebelenga, mambo kimye kyafikile kya kwikala na bamingilo ba kimye kyonse amba ebafunjishe mwingilo kuba’mba byo akaya mwiulu bakashale na kumwingila.

Onkao mambo, Yesu byo apichilenga ku musezho wa kalunga ka mema, wamwene Shimona Petelo ne balunda nanji na kovwa makonde abo, kabiji wayile ko bajinga. Byo akanjijile mu bwato bwajinga bwa kwa Petelo, wamwambijile kwibushinjikako pacheche kufuma ku kitulu. Byo bafuminemo ne kuya palepako byobya, Yesu waikele mu bwato ne kutatula kufunjisha jibumba ku kitulu.

Panyuma ya kino, Yesu waambijile Petelo amba: “Butwale kwazhika ne kwikizha makonde enu mu mema.”

Petelo waambile’mba: “Mufunjishi, twaeseka bufuku bonse kafwako nangwatu jimo jo twakwatapo ne, pano bino na mambo a byambo byenu, nsakwikizha makonde.”

Byo beekizhe, bakwachile masabi avula bingi, ne makonde abo atatwile kuchibaika. Ponkapo baambijile bakwabo bajinga mu bwato bukwabo kwiya na kwibakwashako. Kabiji bayuzhizhe mato abo onse kya kuba atatwile ne kuloba. Petelo byo amwene kino, wafukamine kwi Yesu ne kwamba’mba: “Nkambo, fumai kwi amiwa, mambo amiwa ne ndengamambo.”

Yesu wamwambijile’mba: “Ndondelai kabiji nkemwalula ke bakukwata bantu.”

Kabiji Yesu waichile Andeleo bankasa ne kolo ne Petelo. Wibambijile’mba: “Ndondelai kabiji nkemwalula ke bakukwata bantu.” Bakwabo mo bakwachilanga masabi abo ba Yakoba ne Yoano baana ba kwa Zebede wibechile kabiji ponkapotu batatwile kumulondela. Onkao mambo, abano bana bashile mwingilo wabo wa kukwata masabi kabiji baikajile baana ba bwanga batanshi ba kwa Yesu. Luka 5:1-11; Mateo 4:13-22; Mako 1:16-20; Isaya 9:1, 2.

▪ Mambo ka Yesu o aichile baana banji ba bwanga kumulondela, kabiji bano bo bañanyi?

▪ Ñanyi kya kukumya kyalengejile Petelo kwakamwa?

▪ Ñanyi mwingilo ye aichijile baana banji ba bwanga?