Baana Ba Bwanga Bana Baikele Ba Kukwata Bantu

Bantu ba mu Nazala byo bakebele ku mwipaya, Yesu wafumineko ne kuya ku Kapenama, muzhi uji kwipi na Kalunga ka Ngalilea, katelwa ne kuba’mba “kizhiba kya Ngenesaleta.” (Luka 5:1) Kino kyafikizhe bungauzhi bwa kwa Isaya bwa kuba’mba bantu ba mu Ngalilea baikajilenga ku musezho wa kalunga ka mema bakamona kyeya kikatampe.—Isaya 9:1, 2.

Yesu byo ajinga mu Ngalilea watwajijile kusapwila’mba: “Bufumu bwa mwiulu bwafwenya pepi.” (Mateo 4:17) Kuno Yesu koko ataine baana banji ba bwanga bana. Bano baingijilepo kala nanji, bino kimye kyo bafumine ne Yesu ku Yudea, babwelele ku mwingilo wabo wa kukwata masabi. (Yoano 1:35-42) Pano kimye kyafikile kya kutanwa pamo ne Yesu kimye kyonse kuba’mba ebafunjishe mwingilo wa kusapwila ye bakashala na kwingila kimye kyo akaya mwiulu.

Yesu byo apichilenga ku musezho wa kalunga ka mema, wamwene bankasa ne kolo babiji ba Shimona Petelo ne Andeleo, ne balunda nabo saka bovwa makonde abo. Yesu wayile ko bajinga. Byo akanjijile mu bwato bwa kwa Petelo, wamwambijile kwibushinjikako pacheche kufuma ku kitulu. Byo bafuminemo ne kuya palepako byobya, Yesu watendekele kufunjisha mabumba a bantu bukine pa Bufumu saka aji mu bwato ku kitulu.

Byo apwishishe kufunjisha bantu, Yesu waambijile Petelo amba: “Butwalai kwazhika ne kuta makonde enu mu mema.” Bino Petelo waambile’mba: “Mufunjishi, twaeseka bufuku bonse kafwako nangwatu jimo jo twakwatapo ne, pano bino na mambo a byambo byenu, nsakuta makonde.”—Luka 5:4, 5.

Byo beatele, bakwachile masabi avula bingi. Ne makonde abo atendekele kuchibaika. Onkao mambo, baambijile bakwabo bajinga mu bwato bukwabo kwiya na kwibakwashako. Bayuzhizhe maato onse abiji na masabi avula kya kuba atendekele ne kuloba. Petelo byo amwene kino, wafukamine ku manungo a kwa Yesu ne kwamba’mba: “Nkambo, fumai kwi amiwa, mambo amiwa nendengamambo.” Bino Yesu waambile’mba: “Kileke kuba moyo. Kufuma lelo usakukwatanga bantu bomi.”—Luka 5:8, 10.

Yesu waambijile ba Petelo ne Andeleo amba: “Ndondelai, kabiji nsakwimwalula ke ba kukwata bantu.” (Mateo 4:19) Bakwabo mo bakwachilanga masabi, ba Yakoba ne Yoano baana ba kwa Zebede, nabo wibechile. Ponkapotu batatwile kumulondela. Onkao mambo, abano bana bashile mwingilo wabo wa kukwata masabi kabiji baikele baana ba bwanga ba kwa Yesu batanshi kutendeka kumulondela kimye kyonse.