Kitango 69

Shanji Kechi Bamuyukile Ne

MWISAMBO Yesu ye esambilenga na bantangi ba Bayudea mu kimye kya kijiilo, wakosele bingi. Wibambijile’mba: “Nayuka namba mwi baana ba kwa Abalahama, bino mubena kukeba kungipaya, mambo kechi mwaitabila byo mfunjisha ne. Bintu byonka byo namwene kwi Batata byo byo ñamba; byonkabyo, ne anweba ubai bintu byo mwaumvwine kwi shenu.”

Nangwa kya kuba kechi bamubujile shabo ne, Yesu wibabujile patoka amba shabo kechi waesakana pamo na shanji ne. Bantangi ba Bayudea byo babujile kuyuka muntu Yesu ye aambilengapo, bamukumbwile’mba: “Abalahama ye shetu.” Abo balangulukilenga amba bajinga na lwitabilo lwajingapo na Abalahama watelwanga’mba mulunda na Lesa.

Nangwa byonkabyo, Yesu wibakumishe bingi byo ebambijile’mba: “Umvwe mwi baana ba kwa Abalahama, ubai mingilo ya kwa Abalahama.” Ibyo mwana wakine ulondela byonka byuba shanji. Yesu waambile’mba: “Bino anweba mubena kukeba kungipaya, amiwa muntu wimubula bukine bo naumvwine kwi Lesa. Abalahama kechi waubile bino ne.” Onkao mambo, Yesu waambile jibiji amba: “Anweba ubai mingilo ya shenu.”

Abo kechi bakwatakenye muntu Yesu ye aambilengapo ne. Abo bakoselepotu amba bo baana ba kwa Abalahama, byo baambile’mba: “Atweba kechi twasemekelwe mu bulalelale ne.” Onkao mambo, byo betelelenga amba bajinga bapopweshi bakine byonka byajinga Abalahama, baambile’mba: “Tuji na Shetu umo, Lesa.”

Nanchi kine Lesa wajinga Shabo nyi? Yesu wibambijile’mba: “Umvwe Lesa wajinga Shenu, inge mwantemwa, mambo amiwa nafumine kwi Lesa ne kwiya pano. Kechi neishijile ami mwine ne, bino bantumine kwi aye. Mambo ka o mwabujila kuyuka kyo mbena kwamba?”

Yesu wabujile bano bantangi ba bupopweshi bintu byatama byakonsheshe kufumamo na mambo a kumukana. Bino wibambijile kipasu amba: “Anweba mwafuma kwi shenu Diabola, ne bintu bisaka shenu mwibyuba.” Nanchi Diabola shabo wa mutundu ka? Yesu wamuyukanyikishe amba mbanzhi kabiji waambile’mba: “Ye wa bubela kabiji ye shanja bubela.” Onkao mambo, Yesu wapezhezheko kwamba’mba: “Awa wafuma kwi Lesa, umvwa byamba Lesa. O ene mambo o mubujila kumvwa, mambo kechi mwafuma kwi Lesa ne.”

Bayudea byo bazhingijile na bibambijile Yesu, baambile’mba: “Nanchi kechi twaamba kine amba obewa wi mwina Samaliya kabiji uji na ndemona nenyi?” Kyambo kya kuba’mba “mwina Samaliya” bekingijishanga kulengulwilamo bantu ne kwiboba mwenga, mambo Bayudea bashikilwe bingi bena Samaliya.

Yesu byo abujile kutako muchima ku byo bamwambijilenga amba mwina Samaliya, wibambijile’mba: “Amiwa kechi nji na ndemona ne, bino nemeka Batata, pakuba anweba mwampelula.” Yesu byo atwajijile kwamba, walayile amba: “Umvwe muntu walama byambo byami, kechi ukafwa ne.” Ibyo Yesu kechi walumbulwilenga’mba bonse bamulondela kechi bakafwa ne. Bino watazhizhe mu kuba’mba kechi bakafwa lufu lwa myaka ne myaka nangwa amba “lufu lwa bubiji,” lwa kubula kusanguka ne.

Nangwa byonkabyo, Bayudea kechi baumvwine mwatazhizhe Yesu ne. Onkao mambo, bamwambijile’mba: “Pano po po twayuka namba uji na ndemona. Abalahama wafwile, ne bangauzhi nabo; bino ubena kwamba amba, ‘Umvwe muntu walama byambo byami, kechi ukafwa ne.’ Nanchi obewa wakila shetu Abalahama wafwile nyi? Kabiji bangauzhi nabo bafwile. Nanchi obewa witela amba wi ñanyi?”

Mu uno mwisambo yense, kyamweka Yesu wakebelenga kukwasha bano banabalume kuyuka’mba ye Mesiasa walayilwe. Bino mu kifulo kya kwibabula mu kushinkamika amba ye Mesiasa, Yesu waambile’mba: “Umvwe netumbijika ami mwine, ko kuba amba kwitumbijika kwami kwatu. Batata bo bantumbijika, bonka bo mutela amba ye Lesa wenu; bino anweba kechi mwibayuka ne. Pakuba amiwa nebayuka. Kabiji inge naamba amba kechi nebayuka ne, ko kuba amba nsakwikala wa bubela nobe anweba.”

Yesu watwajijile kwamba pe Abalahama wajinga wakishinka amba: “Shenu Abalahama wasekejile bingi pa kuketekela kumona juba jami, kabiji wijimwene ne kusekela wasekejile.” Na mambo a lwitabilo, Abalahama watajile kulutwe ku kufika kwa Mesiasa walayilwe. Bayudea byo babujile kuswa kino, bamushikishe’mba: “Obewa ukyangye ne kufikizha myaka makumi atanu, nga Abalahama wamumwene byepi?”

Yesu wibakumbwile amba: “Kine nemwambila namba, Abalahama saka akyangye kusemwa, amiwa najinga konka.” Yesu waambilenga pa byo ajinga saka akyangye kwiya pano pa ntanda kabiji wajinga kilengwa kya bulume kya mupashi mwiulu.

Bayudea byo bazhingijile pa byaambile Yesu amba wajingako Abalahama saka akyangye kusemwa, batolele mabwe amba bamwase. Bino aye wafyamine ne kulupukamo mu nzubo ya Lesa kwa kubula kumukozha. Yoano 8:37-59; Lumwekesho 3:14; 21:8.

▪ Yesu wamwesheshe byepi amba aye ne balwanyi banji kechi bajinga na shabo umo ne?

▪ Bayudea byo batelelenga Yesu amba mwina Samaliya batazhizhenga mu ka?

▪ Yesu walumbulwilenga ka byo aambile’mba aba bamulondela kechi bakafwa ne?