Kitango 74

Wafunjileko Mata, Mikambizho pa Mambo a Kulomba

YESU byo aingijilenga mu Yudea, wayile mu muzhi wa Betani. Uno muzhi mo mwaikalanga Mata, Maliya ne kolojabo aye Lazalasa. Kampe Yesu wasambakene na bano bantu basatu kimyetu kitanshi kya mwingilo wanji kabiji waikele mulunda nabo. Yesu wayile ku nzubo ya kwa Mata kabiji wamutambwijile.

Mata wakebeshe bingi kunengezhezha Yesu kajo kawama. Kyajinga kintu kyawama bingi umvwe muntu bamufwakesha kwi Mesiasa walayilwe! Onkao mambo, Mata wapayankene bingi na kunengezha kajo kavula ne kunengezhatu bintu bikwabo byafwainwe kulengela Yesu kwiyowa.

Pakuba nkasanji Mata aye Maliya waikele ku maulu a kwa Yesu saka ateleka ku byo aambilenga. Panyuma ya kupitapo kimye, Mata waishile ne kwambila Yesu amba: “Nkambo, kechi mwamona nkasami byo andekatu na kwingila mingilo bunke nenyi? Mwambilai eye ankwasheko.”

Pano bino, kafwako kintu Yesu kyo aambijile Maliya ne. Bino wafunjileko Mata na mambo a kukizhamo kutesha muchima ku bintu bya ku mubiji. Na kifyele wamufunjileko amba: “Obewa wabambisha muchima ne kutabakana na bintu byavula. Bintutu bicheche byo bibena kukebwatu, nangwa kintutu kimo.” Yesu waambile’mba kechi kikebewa kutaya kimye kyabaya na kunengezha kajo kavula ne. Bintutu bicheche nangwa kimotu byawaina.

Byaubilenga Mata kechi byatamine ne. Wakebele kumwesha’mba watambwijile Yesu bulongo. Pano bino, byo akizhizhemo kutesha muchima ku bintu bya ku mubiji, washajilepo kutambula mikambizho yafunjishenga Mwana Lesa. Onkao mambo, Yesu wapezhezheko amba: “Aye Maliya wasala kintu kyawama kabiji kafwako ukamwangatakyo.”

Pa kimye kikwabo, mwana wa bwanga umo waipwizhe Yesu amba: “Nkambo, tufunjishai bya kulomba, byonkatu Yoano byo afunjishe baana banji ba bwanga.” Kyamweka uno mwana wa bwanga kechi wajingapo kimye Yesu kyo aambile mu Jashi ja pa Mutumba pa lulombelo lwa kumwenako saka papita kala mwaka umo ne kuchika ne. Onkao mambo, Yesu wabwezhezhepo mikambizho ne kwibela kishimpi kyamwesheshenga buneme bwa kutoñamina mu lulombelo.

Yesu watatwile kwamba’mba: “Twambe amba mwi anweba umo uji na mulunda nanji kabiji byo aya kwi aye pakachi ka bufuku wamwambila amba, ‘Mbai, mpepo bashinkwa basatu mambo mulunda nami mukwabo po po aiyatu kufuma pa lwendo kabiji mfwabyo bya kumupa.’ Bino mulunda nanji uji mu nzubo wamukumbula amba: ‘Kunkatazhanga ne. Nashinkako kala ne baana bami balaala; kechi nakonsha kubuka ne kukupa kintu ne.’ Nemwambila namba: Ukabuka ne kumupa bintu byo abena kukeba.”

Yesu byo aingijishe kino kyakumwenako, kechi walumbulwilenga amba Yehoba Lesa kechi ukumbula misashijilo byonka byaubile mulunda ye aambilepo mu jishimikila ne. Bino walumbulwilenga amba umvwe kya kuba awa mulunda wakatezhe waswile kupa bintu byakebelenga mukwabo, ko kuba’mba Shetu wa mwiulu wa butemwe ukakilapo kuba bino. Onkao mambo, Yesu watwajijile kwamba’mba: “Byonkabyo, nemwambila namba: Lombainga, mukekitambula; kebainga, mukekitana; konkonshainga, bakemushinkwilako. Mambo yense ulomba utambula, ne ukeba wikitana, ne yense ukonkonsha bamushinkwilako.”

Kepo Yesu aambile pa bashetu bambulwakulumbuluka amba: “Ñanyi shetu mwi anweba, uba umvwe mwananji wamulomba jisabi, wamupa muloolo mu kifulo kya jisabi? nangwa wamulomba jike wamupa kaminye? Onkao mambo, umvwe anweba byo muji babi mwayuka kupana byawama ku baana benu, ko kuba amba Shenu wa mwiulu ukakilapo kupana mupashi wazhila ku boba bamulomba!” Kine luno ke lutundaiko lwanema bingi Yesu lo atundaikile pa kutoñamina mu lulombelo. Luka 10:38–11:13.

▪ Mambo ka Mata o akizhizhemo na kunengezhezha kajo Yesu?

▪ Ñanyi kintu Maliya kyo aubile, kabiji mambo ka Yesu o amutakaikijile mu kifulo kya kutakaika Mata?

▪ Ñanyi kintu kyalengejile Yesu kubwezhapo mikambizho pa mambo a kulomba?

▪ Ñanyi kishimpi Yesu kyo aambile kumwesha buneme bwa kutoñamina mu lulombelo?