Kitango 75

Kintu Kilengela Kwikala na Lusekelo

YESU byo aingijilenga mwingilo wanji mu Ngalilea waubilenga bya kukumya, kabiji wibyubile ne mu Yudea. Kyakumwenako, wapangile ndemona walengejile muntu kwikala kamaama. Jibumba jakuminye bingi, bino aba bamulengulwilenga bakaine byonka byaubile aba bajinga mu Ngalilea. Baambile’mba: “Uno muntu upanga bandemona na bulume bwa Belezebuba mukulumpe wa bandemona.” Bakwabo nabo bakebelenga amba Yesu ebamweshe kiyukilo kikatampe kya kwiyukisha aye mwine kabiji bamwesekele byo bamushikishe amba amweshepo kiyukilo kufuma mwiulu.

Yesu byo ayukile byalangulukilenga aba bamulengulwilenga bajinga mu Yudea, wibakumbwile byonkatu byo akumbwile aba bajinga mu Ngalilea. Yesu walumbulwile amba bufumu bwakonsha konaika umvwe bene benabo bealukamo. Wibashikishe’mba: “Umvwe Satana wialukilamo mwine, bufumu bwanji bukakosa byepi?” Kabiji wamwesheshe kizumba kyajingamo aba bamulengulwilenga byo aambile’mba: “Umvwe mpanga bandemona na munwe wa Lesa, ko kuba amba Bufumu bwa Lesa bwaiya kwi anweba kwa kubula kuyuka.”

Aba bamwene bya kukumya byaubilenga Yesu bafwainwe kubila mu jishinda jimotu byonka byaubile bantu kala kimye Mosesa kyo aubile kya kukumya. Babijikile’mba: “Munwe wa Lesa.” Wajinga “munwe wa Lesa” wanembele Mikambizho Jikumi pa mabwe apapakana. Kabiji “munwe wa Lesa” ko kuba’mba mupashi wazhila nangwa’mba bulume bwingila, bo bwalengejile Yesu kupanga bandemona ne kubuka bakolwa. Onkao mambo, Bufumu bwa Lesa bwaishile kwa kubula kuyuka pa aba bamulengulwilenga, mambo Yesu byo aji Mfumu watongolwa wa Bufumu, wajinga pakachi kabo.

Kepo Yesu alumbulwile bulume bwanji bwa kupanga bandemona kuba’mba bwakila bwa kwa Satana, byonkatu kitonzhi byo eya ne kushinda muntu uji na bilwilo ubena kulama kipango kyanji. Wabwezhezhepo kyakumwenako kyo aambile mu Ngalilea pa mambo a ndemona. Uno ndemona walupukile mu muntu, bino muntu byo abujile kuyuzha mu muchima wanji bintu byawama, ndemona wabwelele na bandemona bakwabo batanu na babiji, kabiji uno muntu watamine bingi kukila byo ajinga kala.

Byo batelekelenga ku byo afunjishenga, mwanamukazhi umo mu luonde wabijikile’mba: “Jatokwa jivumo mo waimichilwe ne mabele o waaminweko!” Byo kiji kuba’mba mwanamukazhi yense Muyudea wakebeshanga bingi kwikala inanja ngauzhi kikatakata Mesiasa, kyajingatu bulongo uno mwanamukazhi kwamba bino. Kyamweka walangulukilenga amba Maliya wajinga bingi na lusekelo na mambo a kwikala inanja Yesu.

Nangwa byonkabyo, Yesu ponkapotu waolweleko awa mwanamukazhi pa mambo a kintu kine kilengela kwikala na lusekelo. Waambile’mba: “Batokwa ke boba bomvwa mambo a Lesa ne kwialama!” Yesu pa kwamba bino, kechi walumbulwilenga amba inanji aye Maliya bafwainwe kumupa munema wakila ne. Mu kifulo kya kuba bino, Yesu waambilenga amba lusekelo lwa kine lufuma mu kwikala kalume wakishinka wa Lesa, kechi lufuma mu kwikala na bulunda bwa ku mubiji nangwa mingilo ya ku mubiji ne.

Byonka byo aubile mu Ngalilea, Yesu wakajipijile bantu bajinga mu Yudea na mambo a kukeba kiyukilo kufuma mwiulu. Wibabujile’mba kafwako kiyukilo kya kwibamwesha ne, poso kyonka kya kwa Yona. Yona waikele kiyukilo byo ajinga moba asatu mu jisabi ne byo asapwijilenga na kuchinchika, kino kyalengejile bena Ninevwa kulapila. Yesu waambile’mba: “Bino, muntu wakila Yona uji ponka pano.” Kabiji mfumu wamukazhi wa ku Sheba wakuminye pa maana a kwa Solomone. Yesu waambile’mba: “Bino muntu wakila Solomone uji pano ponka.”

Yesu walumbulwile’mba umvwe muntu waambula lampi, kechi umubika mwafyamika nangwa kuzhikapo ntumbe ne, bino umubika pa kya kutulapo lampi pa kuba’mba bantu bamone kyeya. Kampe waesakenye amba kufunjisha ne kuba bya kukumya ku aba bantu bakosele michima bajinga mu jibumba jo aambilengako, kwajinga nobe kufya kyeya kya lampi. Meso a boba bamwenenga kechi ajinga atuntulu nangwa’mba kechi azanzhile pa kintu kimo ne. Onkao mambo, nkebelo ya bya kukumya byo aubilenga kechi yaingijilwe ne.

Yesu po po afuminetu na kupanga ndemona ne kulengela muntu wajinga kamaama kwamba. Kino kintu kyafwainwe kulengela bantu kwikala na jiso jijitu nangwa’mba jazanzatu pa kintu kimo kuba’mba batumbijike kintu kyawama kyo aubile ne kusapwila mambo awama! Pano bino, na mambo a boba bamulengulwilenga, kino kechi kyaubiwe ne. Onkao mambo, Yesu wapezhezheko amba: “Umvwe mubiji wenu yense waikala watoka kwa kubula mfishi, ukatokatu too byonkatu lampi byo emupa kyeya.” Luka 11:14-36; Kulupuka 8:18, 19; 31:18; Mateo 12:22, 28.

▪ Bantu baubilepo byepi Yesu byo abukile muntu?

▪ “Munwe wa Lesa” ye mu ka, kabiji Bufumu bwa Lesa bwafikile byepi kwa kubula kuyuka bantu batelekelenga Yesu?

▪ Ñanyi kintu kilengela kwikala na lusekelo lwa kine?

▪ Muntu wakonsha kwikala byepi na jiso jijitu?