Kitango 108

Yesu Bakankelwe Kumukwata

NA MAMBO a kuba Yesu wafunjishenga mu nzubo ya Lesa kabiji wafuminetu na kwelela bishimpi bisatu balwanyi banji ba mu bupopweshi byasolwele bubi bwabo, Bafaliseo bazhingijile kabiji bayile na kumumvwañena kuba’mba bamutane na mambo mu ñambilo yanji a kumukwachilapo. Baumvwañene ne kutuma baana babo ba bwanga pamo na baana ba bwanga ba kwa Heloda na kumweseka.

Bano bantu bamushikishe amba: “Mufunjishi, twayuka amba mwi bakishinka, mufunjisha jishinda ja Lesa mu bukine kabiji kechi mulomba bukwasho ku muntu ne, mambo anweba kechi mutala ku bilungi bya bantu ne. Tubulai, Mwalangulukapo amba ka? Nanchi kyawama kupana nangwa kubula kupana misonko kwi Kesala nyi?”

Yesu kechi wajimbaikwanga na byambo byamulambisha ne. Wayukile amba umvwe ambe’mba, ‘Kechi kyawama nangwa amba kyawama kupana misonko ne,’ usakufwa na mambo a kusatukila bena Loma. Kabiji umvwe ambe’mba, ‘Ee, mwafwainwa kupana misonko,’ Bayudea balengululanga bena Loma bebatangijilanga, umvwe bamushikilwe. Onkao mambo, wibashikishe amba: “Mambo ka o mubena kungesekela anweba bakamfutumfutu? Mmweshai mali a musonko.”

Byo bamuletejile imo, wibashikishe amba: “Akye kipasha ne byambo bijipo bya kwa ñanyi?”

Abo bakumbwile’mba: “Bya kwa Kesala.”

“Panai bintu bya kwa Kesala kwi Kesala kabiji bintu bya kwa Lesa, kwi Lesa.” Aba banabalume byo baumvwine mwakumbwijile Yesu, bakuminye bingi. Kabiji bamushile ke baye ne kuya.

Basadusea babujile kwitabila mu lusanguko byo bamwene’mba Bafaliseo bakankalwa kumutana na mambo Yesu, bamusolomokele ne kumushikisha amba: “Mufunjishi, Mosesa waambile amba: ‘Umvwe wamulume wafwa kwa kubula kushapo baana, nkasanji wafwainwa kumuswana muka kolojanji ne kusemenamo baana kwikala bakolojanji.’ Mwi atweba mwajinga bankasa ne kolo batanu na babiji, mubeji wasongwele kabiji wafwile kwa kubula kusemenamo baana, bino nkasanji wamuswaine muka kolojanji. Bino byo byo kyamwekele ne ku wa bubiji, wa busatu kufikatu ne ku wa butanu na bubiji. Kyapeleleko ne mwanamukazhi naye wafwile. Pano pa kusanguka, ñanyi ukekala mwina mukazhi? Mambo bonse batanu na babiji bamusongwele.”

Yesu wibakumbwile amba: “Anweba mwaya mungi, mambo kechi mwayuka Binembelo nangwa bulume bwa Lesa ne. Mambo mu lusanguko banabalume nangwa banabakazhi kechi bakasongola nangwa kusongolwa ne, bino bakekala nobe bamalaika ba mwiulu. Pa mambo a kusangula bafu, nanchi kechi mwatangapo kala Lesa byo emwambijile amba: ‘Amiwa ne Lesa wa Abalahama, Lesa wa Izaka ne Lesa wa Yakoba nenyi’? Aye kechi Lesa wa bafu ne, ke wa bomi.”

Jibumba jakuminye jibiji mwakumbwijile Yesu. Ne banembeshi bamo baambile’mba: “Mufunjishi, mwaamba bingi bulongo.”

Bafaliseo byo baumvwine amba Yesu wibashinkisha bulaka Basadusea, baishile jibumba kwi aye. Pa kuba’mba bamweseke, umo munembeshi wamushikishe amba: “Mufunjishi, nanchi mukambizho mukatampe wa mu Mizhilo ye wepi?”

Yesu wakumbwile amba: “Mutanshi ke uno, ‘Umvwa obewa Isalela, Yehoba Lesa wetu ke Yehoba umotu, kabiji wafwainwa kutemwa Yehoba Lesa wobe na muchima wobe yense, na mweo wobe yense, na maana obe onse, ne na bulume bobe bonse.’ Wa bubiji ke uno, ‘Wafwainwa kutemwa mukwenu byonka byo witemwa obe mwine.’ Kafwako mukambizho mukwabo wakila ino ne.” Kabiji Yesu wanungilepo amba: “Pa ino mikambizho yonse ibiji, po paimena Mizhilo ne byambo byaawile bangauzhi.”

Munembeshi waitabizhe amba: “Mufunjishi, mwaamba kine byo mwaamba amba, ‘Aye ye umo kabiji kafwako mukwabo uji nobe aye ne,’ kabiji kuno kumutemwa na muchima wobe yense, na mweo wobe yense, na maana obe onse, ne na bulume bobe bonse ne kutemwa mukwenu byonka byo witemwa obe mwine, kwanema bingi kukila milambo yonse ya kusoka ne bitapisho.”

Yesu byo amwene’mba uno munembeshi wakumbula bulongo, wamwambijile amba: “Kechi uji kwalepa na Bufumu bwa Lesa ne.”

Pa moba asatu ko kuba’mba pa Mulungu, pa Kimo ne pa Kibiji, Yesu wafunjishenga mu nzubo ya Lesa. Bantu bamutelekelenga bingi, pano bino bantangi ba bupopweshi bakebelenga kumwipaya. Nangwa byonkabyo, kufikatu ne pa kyokya kimye kechi bakonsheshe kumwipaya ne. Mateo 22:15-40; Mako 12:13-34; Luka 20:20-40.

▪ Bafaliseo baumvwañene byepi kuba’mba bakwate Yesu, kabiji ñanyi kintu kyakonsheshe kufumamo umvwe Yesu wakumbwile amba ee nangwa ine?

▪ Yesu washinkishe byepi bulaka Basadusea bamwesekelenga?

▪ Bafaliseo bakebele byepi jikwabo kumweseka Yesu kabiji ki ka kyafuminemo?

▪ Ku mpelo ya mwingilo wa kwa Yesu mu Yelusalema, moba anga o afunjishe mu nzubo ya Lesa kabiji bantu baubilepo byepi?