Kitango 123

“Talai! Uno Muntu!”

PILATO byo atemenwe na mambo a byo amwene Yesu amba kechi waakamwa ne, kabiji amba mambo ufwao, wakebelepo jishinda jikwabo jakumukasulwilamo. Waambijile jibumba amba: “Kwesakana na byo muba anwe bene nafwainwa kwimukasulwila muntu umo pa juba ja kijiilo kya lupitailo.”

Balabasa mbanzhi wajinga mu kaleya. Onkao mambo, Pilato wibashikishe’mba: “Wepi ye mubena kukeba amba ne mukasulwileye, Balabasa nyi, inyi Yesu ye batela amba Kilishitu?”

Bantu byo bebakambizhe ku bañanga bakatampe, baambile’mba bebakasulwile Balabasa, pakuba Yesu bamwipaye. Pilato kechi wikilekele ne, wibashikishe jibiji amba: “Pa bano babiji wepi ye mubena kukeba amba ne mukasulwileye?”

Abo babikijile’mba: “Balabasa.”

Pilato washikishe’mba: “Pano nsakuba byepi na Yesu utelwa amba Kilishitu?”

Bonse babijikijile pamo amba: “Mupopai pa kichi!” “Mupopai! Mupopai pa kichi!”

Pilato byo ayukile’mba babena kukeba kwipaya muntu wabula mambo, wibasashijile’mba: “Ñanyi kintu kyatama kyauba uno muntu? Kechi namutana na mambo a kumwipayila ne; onkao mambo nsakumuzhipaula ne kumukasulula.”

Nangwa kya kuba waesekele bingi kukeba kumukasulula, jibumba byo jazhingijile na mambo a bantangi ba bupopweshi jakoselepotu na kubijika amba: “Mupopai pa kichi!” Na mambo a ndangulukilo yatama ya bañanga, jibumba jakebele amba bamwipaye. Moba atanu apichilepo, bamo bajinga pa jino jibumba kampe batambwijile Yesu kimye kyo atwelele mu Yelusalema nobe Mfumu! Kabiji pa kikye kimye umvwe baana banji ba bwanga bajingapo bafwainwa bazhindaminetu nzoo ne kwifya.

Pilato byo amwene’mba bantu kechi babena kumvwa ne, babena kuwowakanatu, watolele mema ne kowa ku maboko ku meso a jibumba ne kwijambila’mba: “Amiwa nafumamo mu mambo a mashi a uno muntu. Ano ke mambo enu anwe bene.” Ponkapo bantu baambile’mba: “Mashi anji etushinkamane atweba ne baana betu.”

Onkao mambo, byo akebelenga kwibobila kyo bakebelenga ne kwibatokesha ku muchima mu kifulo kya kuba kintu kyaoloka, wibakasulwijile Balabasa. Wasendele Yesu ne kumuvula kabiji bamuzhipawile. Kuno kuzhipaula kechi kwajingatu konkakwe ne. Buku umo walumbulula bena Loma byo bazhipaulanga bantu amba:

“Kikote kyo baingijishanga bekipikwile na tumyai twapusana pusana twalepa ko bakashile tubyela twakapotwe twanzhingwile nangwa na bikupa byatwa bya mukooko. . . . Bashilikale bena Loma byo bazhipaulanga muntu munyuma, tubyela twakapotwe twanzhingwile twalenganga bizhizhi kabiji tumyai ne bikupa bya mukooko byachibanga kikoba ne kusha minkakamba. Byo batwajijilanga na kuzhipaula muntu kikoba kyaabananga kufika pa kikupa ne kulengela mubiji kupokomoka mashi.” (The Journal of the American Medical Association)

Panyuma ya kumuzhipaula kyabaya bingi, Yesu bamutwajile mu kipango kya mfumu kabiji baichile bashilikale bonse. Amwa bashilikale bamwendelekelenga kupichila mu kulenga munchinya wa miba ne kumuchichimikaye ku mutwe. Bamubikile jitete mu kuboko kwanji kwa kilujo ne kumuvwika kivwalo kyachiluluka kyavwalangapo bamfumu. Kepo batatwile kumwendeleka amba: “Mutende mwane, anweba Mfumu wa Bayudea!” Kabiji bamushipijile mate ne kumupuma ku meso. Byo bamutambwile jitete jajinga mu kuboko kwanji bamupuminejo ku mutwe. Kino kyalengejile miba yajinga ku “munchinya” ye bamuvwikile kutwela mu mutwe.

Pilato byo amwene kuchinchika kwa kwa Yesu pa byo bamumanyikilenga, wakebelepo jishinda jikwabo jakumukasulwilamo. Wabujile jibumba amba: “Talai! Mbena kumuleta kwi anweba kuba amba muyuke amba amiwa kechi namutana na mambo ne.” Kampe walangulukilenga amba byo basakumona Yesu byo bamupuma basakumvwa lusa. Yesu byo aimene kulutwe ya bano bantu bakanamine saka bamuvwika munchinya wa miba ne kivwalo kya peulu kyachiluluka ne mashi saka abena kukunkuluka ku meso saka omvwa kukola, Pilato wabijikile’mba: “Talai! Uno muntu!”

Nangwa kya kuba bamukozhezhe bingi, kine Yesu wajinga muntu waya nkuwa wajingako pano pa ntanda! Yesu wamwesheshe kuchinchika ne kukoka muchima kwalengejile ne Pilato kwamba byambo biji peulupo bimwesha mushingi ne lusa. Yoano 18:39–19:5; Mateo 27:15-17, 20-30; Mako 15:6-19; Luka 23:18-25.

▪ Pilato wakebele byepi kukasulula Yesu?

▪ Pilato waubile byepi pa kuba’mba efumye aye mwine mu mambo?

▪ Ñanyi kintu kyavwangwamo mu kuzhipaulwa?

▪ Yesu bamwendelekelenga byepi panyuma ya kumuzhipaula?

▪ Pilato waesekele byepi jikwabo kuba’mba akasulule Yesu?