Kitango 126

“Kine, Uno Wajinga Mwana Lesa”

YESU saka akyangye kwikalapo kimye kyabaya pa kichi, mute kwamwekele kintu kya kukumya, mfishi yasendele maola asatu. Ino kechi yajinga mfishi ikalako umvwe ñondo waikala pakachi ka ntanda ne juba ne, mambo ayo ikalako umvwe ñondo watentama kabiji pa kikye kimye kya Kijiilo kya Lupitailo wajinga wa kizhingu. Kabiji ino mfishi ikalatu ya kakimye kacheche. Onkao mambo, aya mfishi yafumine kwi Lesa! Kampe ino mfishi yalengejile aba baendelekelenga Yesu kutulumana ne kwikileka kumwendeleka.

Umvwe akya kya kukumya kyamwekele awa ngubabibi saka akyangye kukajipila mukwabo ne kwambila Yesu amba akamuvuluke, kampe kyo kyalengejile awa ngubabibi kulapila. Kabiji kampe kimye kyajingako aya mfishi banabakazhi bana ko kuba’mba inanja Yesu, Salome bankasa ne kolo ne inanja Yesu, Maliya Magadala ne Maliya inanja mutumwa Yakoba Mucheche po po bayile kwipi na kichi kyalumanamo. Yoano mutumwa ye batemenwe kwi Yesu naye wajinga nabo.

Inanja Yesu waubile nobe ‘bamwasa mpoko’ ku muchima byo atajilenga mwananji ye amwishenga ne kukomesha saka amanama pa kichi! Pano bino, Yesu kechi watele muchima pa misongo yo ajingamo ne, watele muchima ku bwikalo bwa inanji. Nangwa kya kuba wajinga mu misongo ikatampe, wazhalulukile ne kutala Yoano ne kwambila bainanji amba: “Mama, talai mwanenu wo!” Kepo azhalulukile ne kutala Maliya ne kwambila Yoano amba: “Tala! Bainobe bo!”

Onkao mambo, Yesu washijile mutumwa wanji ye atemenwe mwingilo wa kulama bainanji, kyamweka pa kikye kimye saka aji mwanamukazhi wafwilwa. Waambile bino mambo baana bakwabo ba kwa Maliya pa kyokya kimye kechi bakimwitabijile ne. Onkao mambo, wamwesheshe kuba’mba kechi kyanematu kunengezhezha bainanji bintu bya ku mubiji ne, poso ne bya ku mupashi.

Ku ma 3 koloko a mute, Yesu waambile’mba: “Nafwa kilaka.” Yesu wayukile mu kifwanyikizho amba Shanji waleka kumuzhikijila pa kuba’mba bulumbuluke bwanji bwesekwe. Onkao mambo, wabijikile’mba: “Lesa wami, Lesa wami, mambo ka o mwanshila bunke?” Bantu baimene kwipi byo baumvwine kino, baambile’mba: “Umvwai! Ubena kwita Elaija.” Ponkapo umo wayile lubilo ne kutumpa kimvwambai mu binyu byasasa ne kwikisomeka ku jitete amba afyompeko. Bino bakwabo baambile’mba: “Mulekai! Tumone inge Elaija usakwiya kumwikizhapo.”

Kabiji Yesu byo atompelepo pa binyu byasasa waambile’mba: “Kyapwa!” Wapwishishe kuba bintu byonse Shanji byo amutumijile pano pa ntanda. Kepo aambile’mba: “Tata, napana bumi bwami kwi anweba.” Ko kuba’mba Yesu wapaine bumi bwanji kwi Lesa ne kuketekela’mba Lesa ukamusangula jibiji. Kepo akunyikile mutwe ne kufwa wafwile.

Aku Yesu ufwatu, kwamwekele kitentanshi kikatampe kyalengejile ne mabwe akatampe kulalaika. Kino kitentanshi kyabayile bingi kya kuba ne bilende byajinga pangye ya Yelusalema byashinkukile ne mibiji ya bafu yazhikukile. Bantu bapichilenga bamwene ino mibiji ya bafu yazhikukile batwelele mu muzhi ne kubulañana kyamwekele.

Kabiji pa kimye Yesu kyo afwile, kipembe kya mu nzubo ya Lesa kyaabenye Mwazhila ne Mwazhijisha kyaabene pabiji kufuma peulu kufika panshi. Kampe kino kipembe kyalepele mamita 18 kabiji kyanemene bingi! Kino kya kukumya kechi kyamwesheshengatu bukaji bwa Lesa bwa kuzhingijila aba baipayile Mwananji ne, bino kyamwesheshenga ne kuba’mba kutwela Mwazhijisha, ko kuba’mba mwiulu kwafwainwetu kubiwa kupichila mu lufu lwa kwa Yesu.

Bantu byo bamwene kitentanshi ne bintu byamwekelenga, baubile bingi moyo. Mukulumpe wa bashilikale watajilenga pa boba bapopelenga Yesu byo amwene kyamwekele, watatwile kutumbijika Lesa. Waambile’mba: “Kine, uno muntu wajinga Mwana Lesa.” Kyamweka wajinga ponka kimye Yesu kyo bamutotolwesheshenga kwi Pilato ne byo aambilenga amba ye mwana Lesa. Kabiji pa kikye kimye washiinwe’mba Yesu ye Mwana Lesa kabiji amba ye muntu waya nkuwa wajingako pano pa ntanda.

Bakwabo nabo kibakankamikile bingi pa kumona bino bintu bya kukumya, kabiji bafumineko saka bepumpaula na mambo a bulanda ne bumvu. Kabiji banabakazhi bavula baana ba bwanga ba kwa Yesu bamwenejilenga kino kya kukumya palepa byobya, baubile bingi bulanda na mambo a bino bintu byamwekele. Ne mutumwa Yoano wajinga ponka. Mateo 27:45-56; Mako 15:33-41; Luka 23:44-49; 2:34, 35; Yoano 19:25-30.

▪ Mambo ka aya mfishi yasendele maola asatu o yabujile kwikala mfishi ikalako umvwe ñondo waikala pakachi ka ntanda ne juba?

▪ Saka akyangye kufwa, ñanyi kyakumwenako Yesu kyo ashile kyafwainwa kulondela aba baji na bansemi babo bakoma?

▪ Ñanyi kyambo Yesu kyo aambile saka akyangye kufwa?

▪ Pa kimye kya kitentanshi, ñanyi bintu byamwekele, kabiji kwabana pabiji kwa kipembe kya mu nzubo ya Lesa kwatajile mu ka?

▪ Bya kukumya byamwekele byalengejile mukulumpe wa bashilikale watajilenga pa boba bapopelenga Yesu kubapo ka?