Kitango 130

Pa Kalunga ka Ngalilea

BATUMWA bayile ku Ngalilea monka mwibakambizhizhe Yesu. Pano bino, kechi bayukile kyo bafwainwe kuba ne. Panyuma ya bino, Petelo wabujile Tomase, Natanela, Yakoba ne nkasanji aye Yoano ne batumwa bakwabo babiji amba: “Naya na kukwata masabi.”

Aba batanu na umo baambile’mba: “Ne atweba tubena kuya nobe.”

Bufuku bonse kechi bakwachilepo jisabi nangwa jimotu ne. Nangwa byonkabyo, byo bwayilenga na kukya, Yesu waimene ku kitulu pakuba batumwa kechi bamuyukile’mba ye iye ne. Wabijikile’mba: “Anweba baana, nanchi muji na kajo ka kuja nyi?”

Abo bakumbwile saka baji pa mema amba: “Ine!”

Wibambijile’mba: “Telai bukonde ku kilujo kya bwato kabiji musakukwata masabi.” Kabiji byo bebutele, bakankelwe kwibukokela mu bwato mambo mwafwile masabi avula.

Yoano waambile’mba: “Nkambo wa!”

Petelo byo aumvwine kino, wavwajile kivwalo kyanji kya peulu kyo avujile ne kwitaya pa mema. Kabiji wafwenkele pa mema mamita 90 kuya ku kitulu. Bino baana ba bwanga bakwabo baishilenga mu bwato bucheche saka bakoka bukonde bwayujile masabi.

Byo batuntukile, bamwene mujilo wa mashanga pajinga jisabi ne shinkwa. Yesu wibambijile’mba: “Letai masabi amo o mwakwata.” Petelo wakanjijile mu bwato ne kukokela bukonde ku kitulu. Buno bukonde bwayujile masabi akatampe 153!

Yesu wibechile amba: “Iyai muje.”

Kafwako nangwa umo wakonsheshe kumushikisha’mba: “Yenu bañanyi?” ne, mambo bonse bayukile’mba ye Yesu. Kino kyajinga kimye kya butanu na bubiji kumweka kufuma po asangukile kabiji kyo kyajinga kimye kya busatu kumweka ku batumwa bonse. Yesu wibanengezhezhe kajo ka kwiaula kabiji wibapele shinkwa ne jisabi.

Byo bapwishishe kuja, kampe Yesu byo atajilenga pa masabi avula o bakwachile, washikishe Petelo amba: “Shimona mwana Yoano, nanchi wantemwa kukila ano masabi nyi?” Mu jishinda jikwabo, wamushikishenga amba, Nanchi watesha muchima ku mwingilo wa busulu bwa masabi kukila mwingilo ye na kunengezhezha kwingila nyi?

Petelo wamukumbwile’mba: “Anweba mwayuka amba nemutemwa.”

Yesu wamwambijile’mba: “Jisha twana twami twa mikooko.”

Kabiji wamushikishe ja bubiji amba: “Shimona mwana Yoano, nanchi wantemwa amiwa nyi?”

Petelo wakumbwile na muchima yense amba: “Ee Nkambo, anweba mwayuka amba nemutemwa.”

Yesu wamukambizhe jibiji amba: “Lama twana twami twa mikooko byonka byuba kafunga.”

Kepo amushikishe ja busatu amba: “Shimona mwana Yoano, nanchi wantemwa nyi?”

Petelo waubile bulanda. Kyamweka walangulukilenga amba kampe Yesu ubena kuzhinauka bukishinka bwanji. Kimye Yesu kyo bamuchibijilenga mambo, Petelo wamukaine bimye bisatu amba kechi wamuyuka ne. Onkao mambo, Petelo waambile’mba: “Nkambo, mwayuka bintu byonse; kabiji mwayuka amba nemutemwa.”

Yesu wamukambizhe ja busatu amba: “Jisha twana twami twa mikooko.”

Onkao mambo, Yesu waingijishe Petelo kufunjishishamo bakwabo buneme bwa kwingila mwingilo ye ebapele kwingila. Wafuminepo pano pa ntanda kabiji wakebelenga amba bakengijilenga aba bonse bo bakakokela mu kipaka kya mikooko ya Lesa.

Byonkatu Yesu byo bamukashile ne kumwipaya na mambo a kwingila mwingilo Lesa ye amukambizhe, Yesu wasolwele amba Petelo ukapita mu bya malwa bintutu bimo. Yesu wamubujile’mba: “Byo wakijinga mwanyike, wavwalanga ne kuya konse ko wakebanga kuya. Bino byo ukakota ukatanyikanga maboko obe ne muntu mukwabo ukakuvwikanga ne kukutwala ko ukabula kukeba kuya.” Nangwa kya kuba lufu lwapembelejilenga Petelo, Yesu wamukambizhe amba: “Ndondelenga.”

Petelo byo aalulukile wamwene Yoano kabiji washikishe’mba: “Nkambo, uno muntu ukoba byepi?”

Yesu wamukumbwile’mba: “Umvwe kyo kyaswa muchima wami kuba amba ekale posotu ne byo nkeya, pano obewa waakaminwa ka? Obewa ndondelengatu.” Bino byambo byaambile Yesu, baana ba bwanga bavula bebyumvwijile mu kuba’mba mutumwa Yoano kechi ukafwa ne. Nangwa byonkabyo, byonkatu byalumbulwile mutumwa Yoano, Yesu kechi waambilenga amba Yoano kechi ukafwa ne, bino waambile’mba: “Umvwe kyo kyaswa muchima wami kuba amba ekale posotu ne byo nkeya, pano obewa waakaminwa ka?”

Palutwe kacheche, Yoano naye waambile bino byambo byanema amba: “Kuji bintu byavula bingi Yesu byo aubile, umvwe bino bintu byonse byanembelwe, kine pano pa ntanda inge pabula ne pa kwiabika aa mabuku.” Yoano 21:1-25; Mateo 26:32; 28:7, 10.

▪ Ñanyi kintu kyamwesheshe amba batumwa kechi bayukile kintu kyo bafwainwe kuba mu Ngalilea ne?

▪ Batumwa byo bajinga pa Kalunga ka Ngalilea bamuyukile byepi Yesu?

▪ Bimye binga Yesu byo amwekele kufuma po asangukile?

▪ Yesu waambishepo byepi pa mwingilo ye akebele batumwa banji kwingila?

▪ Yesu wamwesheshe byepi musango wafwijilemo Petelo?

▪ Ñanyi byambo Yesu byo aambile pe Yoano byo baumvwijile mungi baana ba bwanga bavula?