Kitango 132

Waikala ku Kuboko kwa Kilujo kya Lesa

KWITULULWA kwa mupashi wazhila pa Pentekosita kwamwesheshe amba Yesu wafika mwiulu. Kabiji kimwesho kyamwene mwana wa bwanga aye Setepena nakyo kyamwesheshe amba Yesu wafika mwiulu. Setepena saka bakyangye kumwasa mabwe na mambo a kusapwila mu bukishinka, waambile’mba: “Talai! Namona jiulu jashinkuka ne Mwana muntu waimana ku kuboko kwa kilujo kya Lesa.”

Yesu byo ajinga ku kuboko kwa kilujo kya Lesa wapembelejilenga mukambizho kufuma kwi Shanji wa kuba’mba: ‘Wikale ke mfumu ubena kushinda mukachi ka balwanyi bobe.’ Ñanyi kintu Yesu kyo aubilenga, byo apembelejilenga kushinda balwanyi banji? Walaminenga baana banji ba bwanga bashingwa na mupashi ne kwibatangijila mu mwingilo wabo wa kusapwila ne kwibanengezha kwikala bamfumu pamo ne aye mu Bufumu bwa Shanji kupichila mu kwibasangula.

Kyakumwenako, Yesu wasalulwile Saulo (wayukanyikilwe palutwe kacheche na jizhina ja ki Loma ja kuba’mba Paulo) amba akatwalenga palutwe mwingilo wa kulenga baana ba bwanga mu byalo bikwabo. Saulo wajinga wa mukoyo pa Mizhilo ya Lesa, pano bino bantangi ba bupopweshi bwa Bayudea bamutwajile mungi. Na mambo a kino, Saulo kechi waswishishetu amba Setepena bamwipaye ne, bino wayile ne ku Damasakasa byo bamuswishishe kwi ñanga mwine mukatampe aye Kaifasa kuba’mba akakwate banabalume ne banabakazhi bajinga baana ba bwanga ba kwa Yesu ne kwibaleta ku Yelusalema. Nangwa byonkabyo, Saulo byo ajinga mu jishinda, ponkapotu kyeya kufuma mwiulu kyamusamijile ne aye waponene panshi.

Jiwi jamushikishe’mba: “Saulo, Saulo, mambo ka o ubena kumanyikila?” Saulo washikishe’mba: “Nanchi yenu bañanyi, Nkambo?”

Wamukumbwile’mba: “Amiwa ne Yesu ye ubena kumanyika.”

Saulo walekele kumona na mambo a kyeya kya kukumya kyo amwene, Yesu wamubujile kutwela mu Damasakasa ne kupembelela kumubula bya kuba. Kepo Yesu amwekele mu kimwesho kwi Ananyasa mwananji wa bwanga. Pa mambo a kwa Saulo, Yesu wabujile Ananyasa amba: “Uno muntu ye ye nasalulula kuba amba akanshimune ku bisaka bikwabo ne ku bamfumu ne ku bena Isalela.”

Na mambo a bukwasho bwa kwa Yesu, Saulo (wayukanyikilwe palutwe kacheche amba Paulo) ne bakwabo basapwishi baingijile bingi bulongo mwingilo wabo wa kusapwila ne kufunjisha. Pa myaka 25 yapichilepo kufuma po amwekele kwi Paulo mu jishinda jaya ku Damasakasa, Paulo wanembele’mba “mambo awama” ‘asapwilwa ku bilengwa byonse biji pano panshi.’

Byo papichile myaka yavula, Yesu wamwesheshe bimwesho byavula ku mutumwa wanji ye atemenwe aye Yoano. Kupichila mu bino bimwesho Yoano byo alumbulula mu buku wa mu Baibolo wa Lumwekesho, wamwene mu kifwanyikizho Yesu saka abwela ne kwikala pa Bufumu. Yoano waambile’mba “na mambo a mupashi wazhila” bamutwajile mu “juba ja Nkambo.” Nanchi jino “juba” jo ji ka?

Kupesapesa bulongo bungauzhi bwa mu Baibolo kuvwangakotu ne bungauzhi bwaambilepo Yesu pa mambo a moba akupelako, kumwesha’mba “juba ja Nkambo” jatatwile mu mwaka wa 1914. Onkao mambo, mu mwaka wa 1914 mo mo abwelele kwa kubula kumweka ku bantu, kabiji bakalume banji bakishinka bo bonkatu bayukile’mba wabwela. Mu yenka uno mwaka Yehoba mo mo akambizhe Yesu kwikala mfumu ubena kushinda mukachi ka balwanyi banji!

Na mambo a kukokela Shanji, Yesu watokeshe mwiulu kupichila mu kupangamo Satana ne bandemona banji ne kwibela pano pa ntanda. Yoano byo amwene kino kimwesho, waumvwine jiwi kufuma mwiulu amba: “Talai! Lesa wetu waleta lupulukilo ku bantu, bulume bwanji bwasoloka kabiji bufumu bwanji bwaikajikwa ne Kilishitu wanji watatula kwingijisha lūsa lwanji!” Kine, Kilishitu waikele Mfumu mu 1914!

Ano ajinga mambo awama bingi ku bapopweshi ba Yehoba baji mwiulu! Bebakambizhe amba: “Sekelai anweba meulu ne anweba mwikalamo!” Pano kyajinga byepi ku boba bekala pano pa ntanda? Jiwi kufuma mwiulu jatwajijile kwamba’mba: “Malwa enu anweba ntanda ne kalunga ka mema, mambo Diabola waikila ko muji kabiji wazhingila bingi, mambo wayuka amba ujitu na kakimye kacheche.”

Mu konka kano kakimye kacheche mo mo tubena kwikala. Pa kino kimye bintu bibena kuba bantu byo bibena kumwesha umvwe bakakonsha kutwela mu ntanda ipya ya Lesa nangwa kufwa. Kishinka ke kya kuba’mba, bwikalo bwenu bwa kulutwe bwaimena pa byo mubena kubapo pa mambo awama a Bufumu bwa Lesa abena kusapwilwa ntanda yonse na lutangijilo lwa Kilishitu.

Panyuma ya bino, Yesu Kilishitu ukekala Wakwimenako Lesa mu kufumyapo pano pa ntanda bwikalo bonse bwa kwa Satana ne bonse bamutundaika. Yesu ukapwisha uno mwingilo kupichila mu kufumyapo bubi bonse mu nkondo itelwa mu Baibolo amba, Amagedonyi. Byo akapwisha kuba bino, Yesu Muntu waya nkuwa mu kulengwa konse wa kibiji kwi Yehoba Lesa, ukakwata Satana ne bandemona banji ne kwibakasa myaka kiumbi mu “kalengwa kabula kupela” ko kuba’mba bakekala nobe bantu bafwa, kwa kubula bulume. Byubilo 7:55-60; 8:1-3; 9:1-19; 16:6-10; Salamo 110:1, 2; Bahebelu 10:12, 13; 1 Petelo 3:22; Luka 22:28-30; Kolose 1:13, 23; Lumwekesho 1:1, 10; 12:7-12; 16:14-16; 20:1-3; Mateo 24:14.

▪ Yesu byo ayile mwiulu, waikele kwepi kabiji wapembelejilenga ka?

▪ Panyuma ya kuya mwiulu, bañanyi Yesu bo alaminenga kabiji bukalama bwanji bwayukanyikilwe byepi?

▪ Ñanyi kimye kyatatwile “juba ja Nkambo,” kabiji ñanyi kintu kyamwekele byo jatatwile?

▪ Mwingilo wa kusapwila ubena kwingijiwa mu ano moba witukunza byepi pa muntu pa muntu?

▪ Umvwe uno mwingilo wa kusapwila akapwe, ñanyi bintu bikamweka?