Kitango 25

Nanchi Aba Boba Bintu Byatama Bakonsha Kwibileka Nyi?

KYAKONSHA kuwama bingi umvwe bantu bonse ke bobe bintu byawama, ke ibyo nenyi?— Pano bino kafwako uba byawama kimye kyonse ne. Nanchi wayuka kimye kimo atweba bonse kyo tubila bintu byatama bino saka tubena kukeba kuba kyawama nyi?— Mambo atweba bonse twaswana bundengamambo. Pano bino bantu bamo boba bingi bintu byatama. Bashikwa bakwabo ne kwibakozha pa kubula nangwa mambo ne. Nanchi bano bantu bakonsha kwaluluka ne kwikala bantu bawama nyi?—

Akimona mwanamulume ubena kusopa bya kuvwala bya boba babena kwasa Setepena mabwe. Jizhina janji ja Kihebelu ke Saulo, pano bino ja ki Loma ke Paulo. Uno mwanamulume waumvwa bingi bulongo kuba’mba Setepena mwana wa bwanga wa Mufunjishi Wayukisha, epayiwe. Akitwaya tumone Saulo kyo aubilanga bintu byatama.

Saulo wajinga Mufaliseo wa mu jibumba ja bupopweshi bwa Bayudea. Bafaliseo bayukile Byambo bya Lesa, pano bino batele maana ku byafunjishanga bantangi babo babupopweshi. Kino kyo kyamulengelanga Saulo kuba bintu byatama.

Setepena byo bamukwachile mu Yelusalema, Saulo naye wajinga ponka. Kabiji bamutwajile mu kije mwajinga bamitonyi, bamo pa bano bajinga Bafaliseo. Nangwa kya kuba Setepena bamwambijile bintu byatama, kechi waumvwine moyo ne. Wachinchikile ne kwibasapwila bamitonyi pa mambo a Yehoba Lesa ne Yesu.

Pano bino aba bamitonyi kechi bebitemenwe byambo byo baumvwine ne. Bayukile byavula pe Yesu, mambo panyuma kacheche, bo bamwipayile. Pano bino, Yehoba wamusangwile Yesu ne kumutwala mwiulu. Mu kifulo kya kupimpula byubilo byabo, bamitonyi bamanyikilengatu baana ba bwanga ba kwa Yesu.

Bamitonyi bamutajangizhe Setepena pangye ya muzhi. Bamunakwile panshi ne kumwasa mabwe. Byonka byo ubena kumona pa kikye kipikichala, Saulo naye wajinga ponka saka amona. Mu muchima wanji walangulukilenga’mba bauba bingi bulongo pa kumwipaya Setepena.

Nanchi wayuka Saulo kyo alangulukijilenga bino nyi?— Mu bwikalo bwanji bonsetu, Saulo wajinga Mufaliseo, kabiji waitabijile’mba mafunjisho a Bafaliseo o aoloka. Onkao mambo wamonanga Bafaliseo amba kyo kya kumwenako kyawama, kabiji bobo alondanga.—Byubilo 7:54-60.

Panyuma ya kuba Setepena waipaiwa, Saulo waubilepo ka?— Wailenga na kufumpila baana ba bwanga bonse ba kwa Yesu amba ebavizhe! Wakatwelelenga mu mazubo abo ne kwibakulumunamo banabalume ne banabakazhi. Kabiji wibelelenga mu kaleya. Baana ba bwanga bavula banyemenemo mu Yelusalema, pano bino kechi balekele kushimuna pe Yesu ne.—Byubilo 8:1-4.

Kino kyamulengejile Saulo kushikwa bingi baana ba bwanga ba kwa Yesu. Onkao mambo wayile kwi Ñanga Mukatampe aye Kaifasa ne kutambula makalata a kuya na kukwata bena Kilishitu bajinga mu muzhi wa Damasakasa. Saulo wakebelenga’mba ebakwate ne kwibataya mu kaleya mu Yelusalema. Pano bino, byo ajinga pa lwendo lwa kuya ku Damasakasa, kwamwekele kintu kyakukumya.

Kyeya kyasamine kufuma mwiulu, ne jiwi jaambile’mba: “Saulo, Saulo, kyo wampachila i ki ka?” Yesu ye waambilenga mwiulu! Kyeya kyasamine bingi kya kuba meso a kwa Saulo apofwile, kabiji bantu bo ajinga nabo bo bamutwajile ku Damasakasa.

Panyuma ya moba asatu, Yesu wamwekele mu kimwesho ku mwananji wa bwanga aye Ananyasa. Yesu waambijile Ananyasa kuya na kumona Saulo kuba’mba amubuke meso anji, ne kumusapwila. Ananyasa byo amusapwijile, waumvwijile bukine bwaamba pe Yesu. Meso anji abukilwe. Bwikalo bwanji bonsetu bwaalulukile, kabiji waikele ke kalume wa Lesa wakishinka.—Byubilo 9:1-22.

Pano wamona kyamulengelanga Saulo kuba bintu byatama nyi?— Mambo a kuba’mba bamufunjishe bintu byatama. Walondelanga bantu babujile bukishinka kwi Lesa. Kabiji wajinga pa jibumba ja bantu janemekele milanguluko ya bantu kukila Byambo bya Lesa. Pano nga mambo ka Saulo kyo aalulukijile ne kutendeka kuba bintu byawama, nangwa kya kuba Bafaliseo batwajijiletu kulwa na Lesa?— Mambo a kuba’mba Saulo kechi washikilwe bukine ne. Byo afunjile bukine, wibukokejile.

Nanchi wayuka Saulo byo aikele palutwe kacheche nyi?— Ee, watendekele kutelwa’mba mutumwa Paulo, mutumwa wa kwa Yesu. Kabiji vuluka kuba’mba Paulo wanembele mabuku a mu Baibolo avula bingi kukila uji yense.

Kobaji bantu bavula bingi baji byonka byajinga Saulo bakonsha kwaluluka. Pano bino kechi kyapela ne, mambo kuji umo ubena kwingila bingi na ngovu kuba’mba bantu bobenga bintu byatama. Nanchi wamuyuka nyi?— Yesu wamwambilepo kimye kyo amwekele kwi Saulo mu jishinda jiya ku Damasakasa. Yesu waambañene ne Saulo kufuma mwiulu amba: ‘Mbena kukutuma mu kwibalabisha bantu meso, wibafumye ku mfishi wibalulwile ku kyeya, bafume mu lūsa lwa Satana balulukile kwi Lesa.’—Byubilo 26:17, 18.

Ee, Satana Diabola ye ulengela bantu bonse kuba bintu byatama. Nanchi kimye kimo ki kukatazha kuba byawama nyi?— Atweba bonse kitukatazha bingi. Satana ye ulengela’mba kikatazhenga. Pano bino kuji ne kintu kikwabo kilengela’mba kikatazhenga kuba bintu byawama. Nanchi wikiyuka nyi?— Bundengamambo bo tusemwa nabo.

Buno bundengamambo bo bulengela’mba tubenga bintu byatama mu kifulo kya kuba byawama. Onkao mambo, nanchi twafwainwa kuba byepi?— Ee, twafwainwa kwibikangako mu kuba byawama. Umvwe ke tube bino, Yesu witukwasha mambo witutemwa bingi.

Yesu byo ajinga panopantanda, watemenwe bingi bantu baalulukile ne kuleka kuba bintu byatama. Wayukile kuba’mba kwaluluka kwakatazha bingi. Kya kumwenako, kwajinga banabakazhi bamo balaalanga na banabalume bavula. Kino kyatamine bingi. Baibolo utela bano banabakazhi amba bankende nangwa’mba bapite.

Kwajinga mwanamukazhi umo pite waumvwine amba kuji Yesu, kabiji waishile na kumumona mu nzubo ya Mufaliseo mo ajinga. Waitulwijile manyi ku maulu a kwa Yesu ne kushimuna mipolo yanji yaponejile ku maulu a kwa Yesu na nsuki yanji. Waubile bingi bulanda na mambo a bundengamambo bwanji, kabiji Yesu wamulekejileko mambo anji. Pano bino Mufaliseo walangulukilenga’mba kechi wafwainwa kulekelwa mambo ne.—Luka 7:36-50.

Nanchi wayuka Yesu byo ebambijile Bafaliseo bamo nyi?— Wibambijile’mba: “Bankende bakemukila kukatwela mu bufumu bwa Lesa.” (Mateo 21:31) Yesu waambile bino mambo bano bapite bamwitabijile, kabiji baalulukile ne kusha mashinda abo atama. Bafaliseo abo batwajijiletu na kwiboba byatama baana ba bwanga ba kwa Yesu.

Onkao mambo, umvwe Baibolo waamba’mba byo tubena kuba byatama, ponkapotu twafwainwa kwibileka. Kabiji umvwe twayuka bikeba Yehoba amba tube, twafwainwa kwibyuba. Inge ke tube bino, tukatokeshanga Yehoba pa muchima kabiji uketupa bumi bwa myaka ne myaka.

Pa kuba’mba tuchinuzhuke kuba byatama, twaya tutange Salamo 119:9-11; Byambo bya Mana 3:5-7; ne 12:15.

[Kipikichala pa jipa 133]

Mambo ka Saulo o alangulukijilenga’mba baubatu bulongo pa kumwipaya Setepena?

[Kipikichala pa jipa 135]

Ñanyi waambilenga na Saulo, kabiji wamutumine amba akobe ka?

[Kipikichala pa jipa 136]

Mambo ka Yesu o amulekejileko mambo uno mwanamukazhi waubanga bintu byatama?