Kitango 133

Yesu Ukapwisha Kwingila Bintu Byonse Lesa byo Amubula

KIKALETA bingi lusekelo kimye Yesu Kilishitu aye Mfumu Wakosa mu Nkondo kyo akafumyapo Satana ne ntanda yanji yatama! Kepo Bukalama bwa Myaka Kiumbi bwa kwa Yesu po po bukatatula!

Kupichila mu lutangijilo lwa kwa Yesu ne boba mo bakalaminanga mu Bufumu, aba bakapuluka pa Amagedonyi bakawamisha bintu bikashala na mambo a yoya nkondo ya bololoke. Kyamweka aba bakapuluka pano pa ntanda bakasema baana kabiji bano bakengila mwingilo wa kuwamisha ntanda kwikala ke mpunzha yawama bingi.

Mu kuya kwa moba, Yesu ukasangula bantu bavula bingi kufuma mu bilende ne kwikala mu Paladisa wawama. Ukoba kino mu kufikizha mulaye ye aambile’mba: ‘Kimye kibena kwiya aba bonse baji mu bilende kyo . . . bakafumamo.’

Pa boba Yesu bo akasangula pakekala ne yewa ngubabibi wapopelwe ne Yesu pa kichi kyalumanamo. Vulukai amba Yesu wamulayile amba: “Kine nakwambila lelo namba, Ukekala ne amiwa mu paladisa.” Awa muntu kechi ukaya mwiulu ne kulamina pamo ne Yesu mu Bufumu ne. Kabiji Yesu kechi ukekala jibiji muntu ne kwikala na yewa muntu mu Paladisa pano pa ntanda ne. Nangwa byonkabyo, Yesu ukekala na yewa ngubabibi kupichila mu kumusangwila mu Paladisa ne kumupa bintu bya ku mubiji ne ku mupashi byonka byo kyamweshiwa mu kipikichala kiji pa jipa jalondelapo.

Akikilangulukaipotu! Kupichila mu lutangijilo lwa butemwe bwa kwa Yesu, bisemi byonse bya bantu, ko kuba’mba aba bakapuluka pa Amagedonyi, baana babo ne bantu bavula bingi bakasangulwa bamukokela, mu kuya kwa kimye bakekala ke balumbuluka. Yehoba ukekala na bantu kupichila mu Mwananji aye mfumu Yesu Kilishitu. Yoano waumvwine jiwi kufuma mwiulu amba: “Kabiji ukebashimuna mipolo yonse ku meso abo, ne lufu, mabingo, kujila nangwa misongo kechi bikekalako jibiji ne. Bintu bya kala byapichijila.” Kafwako muntu nangwa umo ukamanama nangwa kukolwa ne.

Ku mpelo ya Bukalama bwa Myaka Kiumbi bwa kwa Yesu, bintu bikekala byonkatu Lesa byo akebele ku ntendekelo kimye kyo abujile bantu batanshi ba Adama ne Evwa kusema ne kuyuzha ntanda. Kine ntanda ikayula na bantu baoloka balumbuluka. Kino kikekala bino mambo kitapisho kya bukuzhi bwa kwa Yesu kikalengela bantu bonse kumwenamo. Lufu lwaiyako na mambo a bundengamambo bwa kwa Adama kechi lukekalako jibiji ne!

Onkao mambo, Yesu ukapwisha kwingila bintu byonse Yehoba byo amubujile kuba. Kabiji ku mpelo ya myaka kiumbi, ukalubula Bufumu ne bantu balumbuluka kwi Shanji. Kepo Lesa akakasulula Satana ne bandemona banji kufuma mu kalengwa kabula kupela mo bajinga nobe bantu bafwa babula bulume. Mambo ka o akebakasulwila?

Mambo ku mpelo ya myaka kiumbi, bavula bakekala mu Paladisa ke boba bakasangulwa bo babujile kwesekapo lwitabilo lwabo. Saka bakyangye kufwa, kechi bayukile milaye ya Lesa ne, onkao mambo kechi beitabijile ne. Kepo panyuma ya kwibasangula ne kwibafunjisha bukine bwa mu Baibolo, kikapela bingi mu Paladisa kwingijila Lesa kwa kubula wa kwibakanya. Bino umvwe Satana bamuswishishe kwibeseka kuleka kwingijila Lesa, nanchi inge bamwesheshe bukishinka nyi? Pa kuba’mba buno bwipuzho bukumbulwe, Satana bakamukasulula.

Lumwekesho lo bapele Yoano lwasolwele amba panyuma ya Bukalama bwa Myaka Kiumbi bwa kwa Yesu, Satana ukalengela bantu bavula bingi kuleka kwingijila Lesa. Lweseko lwapelako byo lukapwa, Satana, bandemona banji ne bonse bo akajimbaika bakebonaunatu bonse. Pakuba aba bakesekwa ne kwikala bakishinka bakatwajijila kwikala myaka ne myaka ne kwiyowa bintu byawama bya Shabo wa mwiulu.

Kine, Yesu waingila kabiji ukatwajijila kwingila mwingilo wanema bingi mu kufikizha nkebelo ya Lesa ya lukumo. Tukeyowa bintu byawama bingi biji kulutwe na mambo a bintu byonse byaingila Mfumu wa Lesa waya nkuwa wa mwiulu aye Yesu. Pano bino, kechi twakonsha kuvulama bintu byonse byo aubile kimye kyo ajinga pano pa ntanda ne.

Yesu wipaine kwiya pano pa ntanda ne kwitufunjisha pe Shanji. Kabiji wamwesheshe byubilo byawama bya Lesa. Tusangalala bingi umvwe ke tulanguluke pa byo achinchikile, pa maana anji akatampe, byo ajinga mufunjishi wayukisha kufunjisha, buntangi bwanji bwa kubula moyo, kifyele ne lusa. Umvwe twavuluka byo amanamine pa kupana bukuzhi buketulengela kwikala na bumi, kine, tumusanchila bingi!

Kine twafunda bintu byavula bingi pa bwikalo bwa kwa Yesu! Kuya kwanji nkuwa kwamweka kabiji kwitukosesha bingi. Ne atweba kitulengela kwamba byambo byaambile kitumbafumo aye mwina Loma Pontiusa Pilato amba: “Talai! Uno muntu!” Kine “Uno muntu,” waya nkuwa wajingako pano pa ntanda!

Kupichila mu kuswa lunengezho lwa kitapisho kya bukuzhi, bundengamambo ne lufu byo twaswana kufuma kwi Adama bakonsha kwibifumyapo pe atweba kabiji Yesu wakonsha kwikala ‘Shetu wa myaka.’ Bonse bakeba kwikala na bumi bwa myaka ne myaka kechi bafwainwa kuyukatu Lesa ne, bino bafwainwa kuyuka ne Mwananji aye Yesu Kilishitu. Mwane kine byo mwatanga ne kufunda mu uno buku bimukwashe kwikala na ano maana alengela kukekala na bumi! 1 Yoano 2:17; 1:7; Yoano 5:28, 29; 3:16; 17:3; 19:5; Luka 23:43; Ntendekelo 1:28; 1 Kolinda 15:24-28; Lumwekesho 20:1-3, 6-10; 21:3, 4; Isaya 9:6.

▪ Ñanyi mwingilo ukengila aba bakapuluka pa Amagedonyi ne baana babo?

▪ Bañanyi bakekala mu Paladisa kununga pa bakapuluka Amagedonyi ne baana babo, kabiji Yesu ukekala nabo byepi?

▪ Bintu bikekala byepi ku mpelo ya myaka kiumbi kabiji Yesu ukoba ka?

▪ Mambo ka Satana o bakamukasulwila mu kalengwa kabula kupela, kabiji ñanyi kintu kikamumwekela ne bonse bakamulondela?

▪ Yesu wakonsha kwikala byepi ‘Shetu wa Myaka’?