Kitango 36

Bañanyi Bakasangulwa? Bakekalanga Pi?

MU BITANGO bibiji byo twatanga, bantu banga basangwilwe?— Batanu. Banyike bajinga banga?— Bajinga basatu. Kabiji wabuna wajinga nsongwalume. Kino kimwesha ka?—

Kino kimweshatu patoka’mba Lesa watemwa banyike ne bansongwalume. Pano bino ukasangula ne bantu bakwabo. Nanchi Lesa ukasangulatu aba baubanga byawama nyi?— Byo byo twakonsha kulanguluka. Pano bino, bantu bavula kechi bafunjile bukine bwa Yehoba Lesa ne Mwananji ne. Onkao mambo, baubanga bintu byatama mambo bebafunjishe bintu byabula kufwainwa. Nanchi Lesa ukasangula bantu ba uno mutundu nyi?—

Baibolo washimuna’mba: “Kukekala lusanguko lwa baoloka ne babula koloka.” (Byubilo 24:15) Mambo ka aba babula koloka, kyo bakasangwilwa?— Mambo kechi bajinga na kimye kya kufunda pe Yehoba ne byo akeba’mba bantu bobenga ne.

Kimye ka bantu kyo bakasangulwa?— Vuluka kimye kyafwile Lazalasa, Yesu waambijile Mata nyenga yanji amba: “Kolojenu ukasanguka.” Mata wakumbwile’mba: ‘Nayuka ukasangulwa mu juba jikapelako.’ (Yoano 11:23, 24) Mata watazhizhe mwepi byo aambile’mba Lazalasa ukasangulwa “mu juba jikapelako”?—

Mata wafwainwa waumvwine byambo byaambile Yesu bya kuba’mba: ‘Bonse baji mu bilende bakafumamo.’ (Yoano 5:28, 29) Onkao mambo, “juba jikapelako” ke kimye kikasangulwa aba bonse Lesa bo avuluka. Jino juba jikapelako kechi juba jimotu ne. Ke myaka kiumbi kimo. Mu jino juba, Baibolo waamba’mba, ‘Lesa ukebachibila mambo ba panopantanda.’ Pa boba boakachibila mambo pakekala ne bakasangulwa.—Byubilo 17:31; 2 Petelo 3:8.

Jino byo jikekalapo juba ja lusekelo! Kimye kya myaka kiumbi kimo, bantu bavula bafwa bakasangulwa ne kwikala na bumi jibiji. Yesu watelele mpunzha mo bakekalanga’mba Paladisa. Akitwaya twisambe kukekela Paladisa kabiji ne byo kikekala.

Byo kwashajile maawala asatu Yesu kuba’mba afwe pa kichi kya lumanamo, waambile pa Paladisa ku muntu wajinga pa kichi kipikipi ne aye. Awa muntu bamwipayile mambo walengele mambo. Pano bino uno muntu byo atajilenga Yesu ne kumvwa byo aambilenga pe aye, wamwitabijile Yesu. Waambile’mba: ‘Mukandanguluke byo mukeya mu bufumu bwenu.’ Yesu wakumbwile’mba: ‘Kine, nemwambila namba, Mukekala ne amiwa mu Paladisa.’—Luka 23:42, 43.

Bino byambo Yesu wibitazhizhe mwepi? Paladisa uji pi?— Akilangulukapo pa kino. Paladisa patanshi wajinga pi?— Vuluka kuba’mba, Lesa wabikile muntu mutanshi Adama ne mukazhanji mu muzhi wa paladisa mo baikalanga panopantanda. Watelwanga’mba bujimi bwa Edena. Mu buno bujimi mwajinga banyama, pano bino kechi bakozhanga bantu ne. Kabiji mwajinga bichi byavula bingi byapanganga bipangwa byawama ne mikola ikatampe. Yajinga mpunzha yawama bingi kwikalamo!—Ntendekelo 2:8-10.

Onkao mambo umvwe ke tutange pa yewa kapondo ukekala mu Paladisa, twafwainwa kulanguluka pa ino ntanda saka yawamishiwa bulongo mwafwainwa kwikala bantu. Nanchi Yesu ukekala panopantanda na yewa kapondo mu Paladisa nyi?— Ine. Abya wayuka kyo akabujila kwikelamo nyi?—

Yesu byo aji Mfumu, ukekala mwiulu na kulama bantu bakekala mu Paladisa panopantanda. Onkao mambo, Yesu ukekala na yewa muntu mambo ukamusangula ne kumupa bintu bikebewa mu bwikalo. Pano nga mambo ka Yesu kyo akalekela awa kapondo kwikala mu Paladisa?— Akitwaya tumone byo kikekala.

Uno kapondo saka akyangye kwamba ne Yesu, nanchi wayukile nkebelo ya Lesa nyi?— Ine, kechi wiiyukile ne. Waubanga bintu byatama mambo kechi wayukile bukine bwa Lesa ne. Mu Paladisa mo mo akafunda nkebelo ya Lesa. Pano po po akamwesha’mba kine watemwa Lesa umvwe akobenga kyaswa muchima wa Lesa.

Nanchi aba bonse bakasangulwa bakekalanga mu Paladisa panopantanda nyi?— Ine. Nanchi wayuka kine kintu kyo twaambila’mba ine nyi?— Mambo bamo bakasangulwa kuba’mba bakekalenga ne Yesu mwiulu. Bakekala ke bamfumu pamo ne aye mu kulama bantu mu Paladisa panopantanda. Twaya tumone ene mambo o twaambila bino.

Yesu saka akyangye kufwa ne, waambijile batumwa banji amba: ‘Mu nzubo ya Batata muji mwakwikala mwavula; onkao mambo mbena kuya na kwimumwena kuntu.’ Kabiji Yesu wibalayile’mba: “Nkeya jibiji, ne kwimutambula kwami ami mwine, namba akwa ko nji amiwa, ne anweba mukekale konka.”—Yoano 14:2, 3.

Nga Yesu wayile pi panyuma ya lusanguko?— Ee, wayile mwiulu na kwikala ne Shanji. (Yoano 17:4, 5) Onkao mambo, Yesu walailenga batumwa ne baana banji ba bwanga bamo amba ukebasangula kuba’mba bakekalenga nanji mwiulu. Nga mwiulu mo bakekalanga ne Yesu bakobangamo ka?— Baibolo waamba’mba baana banji ba bwanga bakasangulwa mu “lusanguko lutanshi” bakekala “nanji na bufumu myaka kiumbi kimo” na kulama ino ntanda.—Lumwekesho 5:10; 20:6; 2 Timoti 2:12.

Bantu banga bakasangulwa mu “lusanguko lutanshi” bakalamanga ne Kilishitu?— Yesu waambijile baana banji ba bwanga amba: “Kange mube moyo ne, anweba kajitanga kacheche, pakuba kyo kyawama ku muchima wa Shenu kya kwimupa bufumu.” (Luka 12:32) Bantu ba mu kano “kajitanga kacheche” bakasangulwa kuba’mba bakalamenga ne Yesu mu Bufumu bwa mwiulu, ke bachechetu. Baibolo wamweshatu patoka’mba ke bantu “biumbi makumi jikumi ne ana ne biumbi bina” bo bakasangulwa kufuma panopantanda.—Lumwekesho 14:1, 3.

Nga aba bakekalanga mu Paladisa panopantanda bakekala banga?— Baibolo kechi waambapo ne. Bino Lesa waambijile ba Adama ne Evwa kimye kyo bakikalanga mu bujimi bwa Edena kuba’mba baseme baana ne kuyuzha ntanda. Pano bino, bakankelwe kuba bino. Bino Lesa ukafikizha mulanguluko wanji wa kuyuzha ntanda na bantu bawama.—Ntendekelo 1:28; Isaya 45:18; 55:11.

Byo kikawamapo kwikala mu Paladisa! Ntanda yonse ikekala ke bujimi bwa kitambo. Ikawama bingi mambo mukekala bañonyi, banyama, bichi byawama ne maluba apusana pusana. Kafwako ukabelanga nangwa kufwa ne. Bantu bonse bakekala balunda na muntu. Umvwe tukeba’mba tukekale mu Paladisa myaka ne myaka, kino kyo kimye kya kubapo kimo.

Tanga byambo bikwabo byaamba pa nkebelo ya Lesa mu Byambo bya Mana 2:21, 22; Musapwishi 1:4; Isaya 2:4; 11:6-9; 35:5, 6 ne 65:21-24

[Kipikichala pa jipa 187]

Mambo ka Lesa kyo akasangwila bantu bamo babulanga kuba byawama?

[Kipikichala pa jipa 188]

Nga Paladisa Yesu yo abujilenga iwe mwanamulume iji pi?

[Kipikichala pa jipa 189]

Umvwe ke tutange pa Paladisa, twafwainwa kulanguluka pa ka?

[Bipikichala pa jipa 190]

Bantu bakasangulwa bakekalanga pi, kabiji bakobanga ka?