“Ukekala ne Amiwa mu Paladisa”

1. Ñanyi byambo Yesu byo aambile ku mbanzhi wajinga pamo ne aye saka akyangye kufwa? (Luka 23:39-43)

YESU ne bambanzhi babiji bapichile mu misongo ikatampe bingi saka bakyangye kufwa. (Luka 23:32, 33) Bano bambanzhi babiji bamwendelekelenga Yesu. Kino kyamwesheshe’mba kechi bajinga baana banji ba bwanga ne. (Mat. 27:44; Mako 15:32) Bino umo wapimpwile byubilo byanji ne kwamba’mba: “Anweba Yesu, mukamvuluke kimye kyo mukeya mu Bufumu bwenu.” Yesu wamwambijile’mba: “Kine nakwambila lelo jino namba, ukekala ne amiwa mu Paladisa.” (Tangai Luka 23:39-43.) Kafwako bishinka bibena kumwesha’mba uno mbanzhi waitabijile mu “Bufumu bwa mwiulu” bwasapwijilengapo Yesu mu mwingilo wanji ne. Kabiji Yesu kechi waambile’mba usakwikala ne amiwa mu Bufumu bwa mwiulu ne. (Mat. 4:17) Yesu waambilenga pa Paladisa ukekala pano pa ntanda. Mambo ka o twaambila bino?

2. Ñanyi bishinka bimwesha’mba awa mbanzhi walapijile wajinga Muyudea?

² Kyamweka mbanzhi walapijile wajinga Muyudea. Uno mbanzhi waambijile mukwabo amba: “Nanchi obewa kechi wakamwa Lesa byo uji mu luzhachisho lumo na uno muntu nenyi?” (Luka 23:40) Bayudea bapopwelangatu Lesa umo bino bantu ba mu bisaka bikwabo baitabijile mu balesa bavula. (Lupu. 20:2, 3; 1 Ko. 8:5, 6) Umvwe bano bambanzhi kechi bajinga Bayudea ne, awa mbanzhi inge kampe waipwizhe’mba: “Nanchi obewa kechi wakamwa balesa nenyi?” Yesu kechi bamutumine ku bisaka bikwabo ne, bino bamutumine “ku mikooko yaeleka ya kisaka kya Isalela.” (Mat. 15:24) Lesa walengejile bena Isalela kuyuka’mba ukasangula bafwa. Uno mbanzhi walapijile wafwainwa wayukile kino kishinka. Kabiji byambo byanji byamwesheshenga’mba wayukile’mba Yehoba ukasangula Yesu ne kumwikazha pa Bufumu bwa Lesa. Kabiji kyamweka uno muntu waketekejile kuba’mba naye bakamusangula.

3. Ñanyi kintu kyalangulukilenga uno mbanzhi walapijile kimye Yesu kyo aambile pa Paladisa? Lumbululai. (Ntendekelo 2:15)

³ Na mambo a kuba’mba wajinga Muyudea, uno mbanzhi walapijile wafwainwa wayukile Adama, Evwa ne Paladisa Yehoba mo ebabikile. Onkao mambo, uno mbanzhi wayukile’mba Paladisa watongwele Yesu ukawama bingi.—Tangai Ntendekelo 2:15.

4. Byambo byaambile Yesu ku mbanzhi bitulengela kulanguluka pa ñanyi bintu?

⁴ Byambo byaambile Yesu ku mbanzhi byafwainwa kwitulengela kulanguluka pa bikekala bwikalo mu Paladisa. Twafwainwa kufunda byavula pa Paladisa umvwe ketulanguluke pa bantu byo baikele mutende mu bukalama bwa Mfumu Solomone. Baibolo waamba’mba Yesu wakila Solomone. Onkao mambo, twafwainwa kuketekela’mba Yesu ukengijila pamo na bo akalamanga nabo kuwamisha ino ntanda kwikala ke Paladisa. (Mat. 12:42) Kwa kubula nangwa kuzhinaukatu ne, “mikooko ikwabo” yafwainwa kubanga bintu byafwainwa kwibalengela kufikilamo kwikala na bumi bwa myaka ne myaka mu Paladisa.—Yoa. 10:16.

BWIKALO BUKEKALA BYEPI MU PALADISA?

5. Mwalanguluka’mba bwikalo bukekala byepi mu Paladisa?

⁵ Nanchi mulanguluka’mba bwikalo bukekala byepi mu Paladisa? Kampe mufwanyikizha mpunzha yawama iji nobe byajinga bujimi bwa Edena. (Nte. 2:7-9) Kabiji kampe muvuluka bungauzhi bwaamba pa bantu ba Lesa bwanembele Mika bwa kuba’mba: “Muntu yense ukekala munshi ya muñanzañanza wanji ne munshi ya kichi kyanji kya mukuyu.” (Mika 4:3, 4) Mwakonsha kuvulukapo byepelo bimo biji mu Baibolo byaamba’mba kajo kakavula bingi. (Sala. 72:16; Isa. 65:21, 22) Fwanyikizhai muji mu Paladisa mwaikala ku tebulu na kuja kajo kawama kabiji mubena kumvwa bwema bwawama bubena kufuma ku bichi ne maluba, mubena kusangalela pamo na balunda nenu, kisemi kyenu, kubikapo ne bantu basangulwa. Bino byonse bikamweka pano pa ntanda kechi mañambilatu ne. Kabiji mingilo yo tukengilanga mu Paladisa iketuletelanga bingi lusekelo.

6. Ñanyi bintu byo tukobanga mu Paladisa? (Monai Kipikichala.)

⁶ Yehoba witulengele’mba tukamwenenga lusekelo mu mingilo yetu. (Sapwi. 2:24) Tukapayankana bingi mu kimye kya Bukalama bwa Myaka Kiumbi bwa Kilishitu. Bantu bakapuluka pa malwa akatampe, kuvwangako ne bakasangulwa bakakebanga bivwalo, kajo ne pa kwikala. Tukengila mingilo yavula bingi pa kuba’mba tukanengezhe bino byonse. Byonkatu Adama ne Evwa byo bebakambizhe kujima bujimi bwa Edena, ne atweba tukengila mwingilo wawama bingi wa kuwamisha ino ntanda kwikala ke Paladisa. Fwanyikizhai byo kikawama kufunjisha bantu bakasangulwa babujile kuyuka byavula pe Yehoba ne pa kyaswa muchima wanji, ne bantu ba kishinka bafwile Yesu saka akyangye kwiya pano pa ntanda.

7. Ñanyi kintu kyo twafwainwa kuketekela kabiji mambo ka?

⁷ Twakonsha kuketekela’mba bwikalo mu Paladisa bukekala bwa mutende kabiji bintu byonse byo tukeba bikekala monka. Mambo ka? Mambo Yehoba witubuujila jimo bwikalo byo bukekala mu bukalama bwa Mwananji. Tushiinwa’mba byo kikekala inge twalanguluka bwikalo byo bwajinga mu bukalama bwa Mfumu Solomone.

BUKALAMA BWA MFUMU SOLOMONE BWITUKWASHA KUYUKA BIKEKALA BWIKALO MU PALADISA

8. Byambo byanembele Mfumu Davida biji pa Salamo 37:10, 11, 29 byafikile byepi? (Monai “Mepuzho Afuma ku Batanga” mu kyonka kino Kyamba kya Usopa.)

⁸ Mfumu Davida watangijilwe na mupashi wa Lesa kunemba bikekala bwikalo kimye kikalamanga mfumu wa kishinka kabiji wa maana. (Tangai Salamo 37:10, 11, 29.) Umvwe tubena kwisamba na bakwetu pa bwikalo byo bukekala mu paladisa, javula twibatangila Salamo 37:11. Tuba bino, mambo Yesu naye waambilepo mu Jashi Janji ja pa Mutumba, kumwesha’mba bikafika mu kimye kya kulutwe. (Mat. 5:5) Nangwa byonkabyo, byambo bya kwa Davida byaambilenga ne pa bwikalo byo bukekala mu bukalama bwa Mfumu Solomone. Solomone byo alaminenga mu Isalela, bantu ba Lesa baikele ku matwi nzoo kabiji bajinga bingi na bunonshi mu ntanda “yavula mukaka ne buki.” Lesa wibambijile’mba: “Umvwe mukatwajijile kulama malamuna ami . . . , nkabika mutende mu kyalo kabiji mukalaalanga kwa kubula muntu wa kwimulengesha moyo.” (Levi 20:24; 26:3, 6) Ino milaye yafikile kimye Mfumu Solomone kyo alaminenga mu Isalela. (1 Moba 22:9; 29:26-28) Kabiji Yehoba wibalaile’mba bantu babi “kechi bakekalapo ne.” (Sala. 37:10) Onkao mambo, byambo biji pa Salamo 37:10, 11, 29 byafikile mu moba a kala kabiji bikafika ne mu kimye kya kulutwe.

9. Mfumu wamukazhi wa ku Sheba waambile’mba ka pa bukalama bwa Mfumu Solomone?

⁹ Mfumu wamukazhi wa ku Sheba waumvwine nkuwa ya mutende ne bunonshi mu kisaka kya bena Isalela mu moba alaminenga Solomone. Uno mfumu waendele museke walepa bingi kuya ku Yelusalema kuba’mba akemwene aye mwine. (1 Mfu. 10:1) Bintu byo amwene mu bufumu bwa kwa Solomone, byamulengejile kwamba’mba: “Bintu byo bambuujile byajingatu bicheche. . . . Bantu benu bo ba lusekelo, kabiji bakalume benu bemana kimye kyonse kwi anweba na kuteleka ku maana enu, bo ba lusekelo!” (1 Mfu. 10:6-8) Bwikalo byo bwajinga mu bukalama bwa kwa Solomone bwitulengela kuyuka bwikalo byo bukekala kulutwe. Pano bino, bintu biketubila Yehoba kulutwe kimye Mwananji Yesu kyo akalamanga bikakilapo bingi kuwama.

10. Mu ñanyi mashinda Yesu mo akijila Solomone?

¹⁰ Yesu wakila Solomone mu mashinda onse. Solomone wajinga mbulwa kulumbuluka kabiji waubile bintu byatama byaletele malwa pa bantu ba Lesa. Pakuba Yesu ke Kalama walumbuluka ubula kulubankanya. (Luka 1:32; Hebe. 4:14, 15) Yesu watwajijile kwikala wa kishinka kwi Lesa kimye kyo apichile mu meseko abaya bingi afumine kwi Satana. Kilishitu wamweshatu patoka kuba’mba kechi ukalengapo mambo ne. Kabiji kechi ukobapo kintu kikaletela malwa bangikazhi banji ba kishinka ne. Kafwako Mfumu mukwabo waesakana nanji ne.

11. Bañanyi bakakwasha Yesu kulama?

¹¹ Yesu ukengijila pamo na ba 144,000 kukwasha bisaka bya bantu ne kufikizha kyaswa muchima wa Yehoba pano pa ntanda. (Lum. 14:1-3) Bano bachinchikile meseko avula bingi ne kupita mu makatazho kimye kyo bajinga pano pa ntanda. Onkao mambo, bakakonsha kuyuka bulongo bipitamo bantu pano pa ntanda. Ñanyi mwingilo ukengilanga bantu bakalama pamo ne Kilishitu?

ÑANYI MWINGILO UKENGILANGA BASHINGWA?

12. Ñanyi mwingilo Yehoba ye apa ba 144,000?

¹² Mwingilo ukengila Yesu ne bo akalamanga nabo ukabaya bingi kukila waingijile Solomone. Mfumu wa bena Isalela aye Solomone walamine bantu bavula bajinga pa mpunzha imotu. Bino bakalama ba mu Bufumu bwa Lesa bakalamanga bantu bavula bingi bakekala pano pa ntanda ponse. Yehoba wapa ba 144,000 uno mwingilo wanema bingi.

13. Ñanyi mwingilo wanema bingi ukekala na bakalamanga pamo ne Yesu?

¹³ Ba 144,000 bakekala bamfumu kabiji bañanga byonkatu biji Yesu. (Lum. 5:10) Kwesakana na Mizhilo ya Mosesa, bañanga bo bakwashishenga kisaka kya bena Isalela kyonse kwizhikijila ku bintu byakonsheshe kwibalengela kukolwa, kabiji bebakwashanga kukosesha bulunda bwabo ne Yehoba. Mizhilo byo yajinga “kimvule kya bintu byawama bikeya,” twakonsha kwamba’mba bano bantu bakalamanga pamo ne Yesu bakekala na mwingilo wanema wa kukwasha bantu ba Lesa kwikala na butuntulu bwa mubiji bwawama kabiji bakebakwasha kwikala na bulunda bwawama ne Lesa. (Hebe. 10:1) Kechi twakiyuka bano bamfumu kabiji bañanga byo bakambanga na bangikazhi ba mu Bufumu bwa Lesa bakekalanga pano pa ntanda ne. Bino twaketekela kuba’mba bantu bakekalanga mu Paladisa pano pa ntanda bakamwenamo byawama bingi mu lutangijilo lonse lukanengezha Yehoba.—Lum. 21:3, 4.

ÑANYI BINTU BYAFWAINWA KUBA “MIKOOKO IKWABO” PA KUBA’MBA BAKEKALE BANGIKAZHI BA MU PALADISA?

14. “Mikooko ikwabo” yakwatankana byepi na balongo ba kwa Kilishitu?

¹⁴ Yesu watelele bo akalama nabo amba “kajitanga kacheche.” (Luka 12:32) Kabiji waambile pa jibumba ja bubiji jo atelele’mba “mikooko ikwabo.” Ano mabumba abiji aikala ke jitanga jimo. (Yoa. 10:16) Bonse baji mu ano mabumba babena kwingijila pamo. Kabiji bakatwajijila kwingijila pamo ino ntanda inge ikaluke ke Paladisa. Pa kyokya kimye ba mu “kajitanga kacheche” bakekala mwiulu kabiji ba “mikooko ikwabo” bakekala na luketekelo lwa kwikala pano pa ntanda myaka ne myaka. Nangwa byonkabyo, “mikooko ikwabo” yafwainwa kuba bintu bimo bikebakwasha kufikilamo kwikala bangikazhi ba mu Paladisa.

15. (a) “Mikooko ikwabo” ingijila pamo byepi na balongo ba kwa Kilishitu? (b) Ñanyi bintu byo mwakonsha kufunjilako ku byaubile mulongo mu shitolo? (Monai kipikichala.)

¹⁵ Mbanzhi walapijile wafwile kwa kubula kubapo bintu byafwainwe kumwesha’mba wasanchile bingi pa bintu byamubijile Kilishitu. Bino atweba “mikooko ikwabo” tuji na bya kuba byavula bingi bimwesha’mba twamutemwa bingi Yesu. Tumwesha’mba twamutemwa bingi mu bintu byo tubila balongo banji bashingwa. Yesu waambile’mba ukachibila mambo mikooko kwesakana na byo yubila bashingwa. (Mat. 25:31-40) Twakonsha kukwasha balongo ba kwa Kilishitu inge saka tusapwila ne kufunjisha bantu kwikala ke baana banji ba bwanga. (Mat. 28:18-20) O ene mambo o kyanemena kwingijisha mabuku a kwingijisha pa kufunjisha o betunengezhezha, nabiji buku wa Mukekala Myaka ne Myaka! Umvwe kechi mufunjishapo Baibolo muntu nangwa umo ne, mwafwainwa kwibikako papelela bulume bwenu kwikala na bantu bakufunjisha.

16. Ñanyi bintu byo twafwainwa kuba pa kuba’mba tukekale bangikazhi ba mu Bufumu bwa Lesa?

¹⁶ Kechi twafwainwa kupembelela’mba kana tukatendeke kwikala mu Paladisa apa bino tukekale na byubilo Yehoba byo akeba’mba twikale nabyo ne. Kino kyo kimye kyo twafwainwa kwikala ba kishinka mu ñambilo ne mu byubilo ne kwikala na mweno yawama ya bintu. Kabiji twafwainwa kwikala ba kishinka kwi Yehoba, ku benakwetu ne ku bakwetu bena Kilishitu. Inge ketukookele Yehoba mu ino ntanda yatama, kiketupeelela bingi kumukookela ne mu Paladisa. Kabiji twafwainwa kufundapo mingilo imo ne kwikala na byubilo bimwesha’mba tubena kwinengezha kukekala mu ntanda ipya. Monai mutwe wa kuba’mba “Nanchi Mwinengezha ‘Kuswana Ntanda’ Nyi?” uji mu kyonka kino Kyamba kya Usopa.

17. Nanchi twafwainwa kwizhachishanga pa mambo o twalengele kala nyi? Lumbululai.

¹⁷ Kabiji twafwainwa kwibikako kuleka kwizhachisha pa mambo o twalengele kala. Ibyo kuba’mba kechi twafwainwa kwalula kitapisho kya bukuzhi kwikala ke jishinda ja kulengelamo “mambo kyanshiji” ne. (Hebe. 10:26-31) Nangwa byonkabyo, twafwainwa kuketekela kuba’mba inge twalapila pa mambo o twalengele kabiji twalomba kwi Yehoba kwitukwasha ne kukeba bukwasho ku bakulumpe mu kipwilo kabiji twapimpula byubilo byetu ko kuba’mba Yehoba witulekelako mambo etu. (Isa. 55:7; Byu. 3:19) Vulukai Yesu byo aambijile Bafaliseo amba: “Naishile na kwita bandengamambo kechi bantu baoloka ne.” (Mat. 9:13) Kitapisho kya bukuzhi kiji na bulume bwa kuvweta pa mambo etu onse.

MUKEKALA MYAKA NE MYAKA MU PALADISA

18. Ñanyi bintu byo mwakonsha kutemwa kwisamba na mbanzhi wafwijile pamo ne Yesu?

¹⁸ Fwanyikizhai kuba’mba muji mu Paladisa, kabiji mubena kwisamba na mbanzhi waambilenga ne Yesu. Kwa kubula nangwa kuzhinaukatu ne, bonse babiji mwakonsha kumusanchila bingi Yesu pa kitapisho kyanji. Kampe mwakonsha kumwipuzha kuba’mba emulumbulwile byo kyajinga byo kwashajiletu pacheche Yesu kufwa ne byo aumvwinenga ku muchima Yesu byo aswile kumubila kintu kyo alombele. Kabiji kampe ne aye wakonsha kwimwipuzha kuba’mba mumubuule byo kyajinga kwikala mu moba apelako mu ntanda ya kwa Satana. Kikawama bingi kufunjisha mambo a Lesa bantu baji byonka byajinga uno mwanamulume.—Efi. 4:22-24.

19. Mambo ka bwikalo mu Paladisa o bukabujila kuletanga mukose? (Monai kipikichala kiji pa nkupiko.)

¹⁹ Bwikalo mu Paladisa kechi bukaletanga mukose ne. Mambo tukamonañana na bantu bo tukyangye kumonañanapo nabo kala. Kabiji tukengilanga mingilo yawama bingi. Pa juba pa juba tukafundanga bintu biketulengela kuyuka bulongo Shetu wa mwiulu ne kwiyowa bintu byo etunengezhezha. Tukekala na bintu byavula bingi bya kufunda pe aye ne bilengwa byanji. Kabiji butemwe bo twatemwa Lesa bukayangatu na kubaya. Tumusanchila bingi Yehoba ne Yesu pa kwitulaya kuba’mba tukekala myaka ne myaka mu Paladisa.