Nanchi Mwinengezha ‘Kuswana Ntanda’ Nyi?

ATWEBA bonse tukebesha bingi kufika kwa mulaye wa kwa Yesu wa kuba’mba: “Bo ba lusekelo aba bakooka michima, mambo bakaswana ntanda.” (Mat. 5:5) Bashingwa bakaswana ntanda byo bakekala Bamfumu ne kulama pamo ne Yesu mwiulu. (Lum. 5:10; 20:6) Bena Kilishitu bakine bavula lelo jino, batengela kuswana ntanda ne kwikalapo myaka ne myaka saka balumbuluka, mu mutende ne lusekelo. Pa kuba’mba kino kikobiwe, bakekala na mingilo yavula yanema bingi. Langulukai pa bino bintu bisatu: kuwamisha ntanda kwikala ke paladisa, kunengezhezha bakasangulwa bikebewa mu bwikalo, ne kufunjisha boba bakasangulwa. Kabiji langulukai pa byo twakonsha kuba luno pa kuba’mba tumweshe’mba tukebesha kukoba bino bintu mu ntanda ipya.

NANCHI MWINENGEZHA KWALULA INO NTANDA KE PALADISA NYI?

Yehoba byo akambizhe bantu ‘kuyuzha ntanda ne kwiijima,’ wamwesheshe’mba ntanda yonse ikekala ke paladisa. (Nte. 1:28) Aba bakaswana ntanda bakakookelanga uno yenka mukambizho. Ku ntatwilotu ntanda kechi ikekala paladisa ne, mambo bujimi bwa Edena bwazhiile kala. Nkondo ya Amagedonyi inge yapwatu, kukekala mwingilo mukatampe wa kuwamisha mapunzha a pano pa ntanda o baonauna. Kikakebewanga kwingila na ngovu!

Kino kituvululamo mwingilo mukatampe waingijile bena Isalela byo babwelele kufuma mu buzha mu Babilona. Mu ntanda yabo, kafwako nangwa umo waikelemo pa myaka 70. Bino ngauzhi Isaya wibabujile’mba Yehoba ukebakwasha kuwamisha ntanda yabo kwikala ke yawama jibiji. Waambile’mba: “Ukalula kiselebwa kyanji kwikala nobe Edena ne kisanzangala kyanji nobe bujimi bwa Yehoba.” (Isa. 51:3) Yehoba wakwashishe bena Isalela kuwamisha ntanda yabo. Kabiji Yehoba ukapesha boba bakaswana ntanda kwiiwamisha ikekale ke paladisa. Kabiji kuji bintu byo mwakonsha kuba luno pa kuba’mba mumweshe’mba mukebesha bingi kukengilako uno mwingilo.

Jishinda jimo jo mwakonsha kumwesheshamo bino, ke kwibikako kuwamisha po mwikala. Mwakonsha kuba bino nangwa kya kuba bo mwikala nabo kipi kipi kechi bawamisha po bekala ne. Mwakonsha kukwashako ne mwingilo wa kuwamisha ne kulama bulongo Nzubo ya Bufumu ne Nzubo ya Kubuñenamo. Kabiji umvwe kyakonsheka, mwakonsha kunembeshako mwingilo wa kukwasha baponenwa na bya malwa. Kino kikamwesha’mba mubena kukebesha kukwasha balongo ne banyenga. Mwafwainwa kufundapo mingilo imo yo mukengilako umvwe Yehoba wimuswisha kwikala mu ntanda ipya myaka ne myaka.

Balongo ne banyenga babena kuwamisha pafwafwafwa, kupyanga mu Nzubo ya Bufumu ne kuwamisha pa lubanza ne mu maluba.

NANCHI MWINENGEZHA KUKWASHA BAKASANGULWA NYI?

Yesu byo asangwiletu kashimbi mwana Yelusa, wibambijile’mba bamupe kajo. (Mako 5:42, 43) Kechi kyakonsheshe kukatazha kukebela mwana wa myaka 12 kajo ne. Bino akilangulukai pa mwingilo byo akabaya, Yesu byo akafikizha mulaye wanji wa kuba’mba ‘aba bonse baji mu bilende bakomvwa jiwi janji ne kufumamo.’ (Yoa. 5:28, 29) Nangwa kya kuba Baibolo kechi witubulatu byonse ne, bino twayuka kuba’mba aba bakasangulwa bakakebewanga kwibakwashako kwikala na kajo, mwa kwikala ne bivwalo. Nanchi mumwesha kuba’mba mwinengezha kukebakwasha nyi? Mwafwainwa kulanguluka pa mepuzho alondelapo.

Ñanyi bintu byo mwafwainwa kubanga luno pa kumwesha’mba mubena kwinengezhezha jimo kuswana ntanda?

Balongo ne banyenga baji ku kibanza kya ndeke kabiji baji bingi na lusekelo babena kutambwila bantu babena kwiya ku kushonkena kukatampe mu muzhi wa Paris.

Umvwe babijika’mba kalama wa mwanzo ukafwakesha kipwilo kyenu, nanchi mukamwitako ku nzubo kwenu kuba’mba mukajiile nanji pamo kajo nyi? Umvwe balongo bengijila pa Betele bafuma pa Betele ne kwiya mu kipwilo kyenu nangwa inge kalama wa mwanzo mwingilo wanji wapwa, nanchi mwakonsha kwibakwasha kutaana pa kwikala nyi? Umvwe mukekala na kushonkena nangwa kupwila kukatampe mu mpunzha yenu, nanchi mwakonsha kwipana kwingilako mingilo kushonkena saka kukyangye kutendeka nangwa inge kwapwa, nangwa kutambwila benyi bakatanwa ku kushonkena nyi?

NANCHI MWINENGEZHA KUFUNJISHA BAKASANGULWA NYI?

Kwesakana na byo tutanga pa Byubilo 24:15, twayuka’mba bantu bakasangulwa bakavula bingi. Bavula bakasangulwa ke boba babujile kufunda pe Yehoba ne kumuyuka. Bino umvwe basangulwa bakebapa kimye kya kufunda.a Bakalume ba Lesa ba kishinka, bakengilako uno mwingilo wa kwibafunjisha. (Isa. 11:9) Ba Charlotte baingilapo uno mwingilo wa kusapwila mu Europe, mu South America, ne mu Africa, batengela bingi kino kimye. Baambile’mba: “Nkebesha bingi kukengilako uno mwingilo wa kufunjisha bantu bakasangulwa. Inge natanga jishimikila ja muntu wajingako kala, javula ndanguluka’mba, ‘Umvwe uno muntu wayukile Yehoba, byubilo byanji inge byawamine.’ Ntengela kimye kya kulutwe kyo nkabuulanga bantu bakasangulwa pe Yehoba ne bwikalo bwabo byo bukawama inge bafuukulapo kumwingijilanga.”

Nangwatu bakalume ba kishinka ba Yehoba bajingako Yesu saka akyangye kwiya pano pa ntanda nabo bakekala na bya kufunda byavula. Akifwanyikizhai lusekelo lo tukekala nalo byo tukalumbulwilanga Danyela kufika kwa bungauzhi bo anembele bino bo abujile kumvwisha. (Da. 12:8) Nangwa kukwasha Luta ne Naomi kuyuka kuba’mba mu kisemi kyabo mo mwaishijile Mesiasa. Tukafunjishanga bantu pano pa ntanda ponse, kabiji kechi kukekalanga meseko nangwa bya kwituvulañanya bijiko mu ntanda lelo jino ne!

Nyenga ubena kupa mwanamukazhi talakiti mu kibamba mwa kuchapila.

Ñanyi bintu byo mwafwainwa kuba luno pa kuba’mba mwinengezhezhe jimo kufunjisha bantu bakasangulwa? Pa kuba’mba twinengezhezhe jimo twafwainwa kubanga bintu byakonsha kwitulengela kwikala bafunjishi bafikilamo ne kusapwilanga kimye kyonse. (Mat. 24:14) Umvwe mubena kukankalwa kusapwila byonka byo mwasapwilanga kala na mambo a kukoma nangwa na mambo a bintutu bikwabo, mwakonsha kumwesha’mba mukebesha bingi kukengilako mwingilo wa kufunjisha bantu bakasangulwa inge luno kemwibikeko kwingila mwingilo wa kusapwila papelela bulume bwenu.

Kyanema bingi kulanguluka pa ano mepuzho: Nanchi mutengela kukaswana ino ntanda nyi? Nanchi mubena kutengela kukengilako mwingilo wa kuwamisha ino ntanda kwikala ke paladisa, kukwasha bantu bakasangulwa kwikala na bya mu bwikalo ne kwibafunjisha pe Yehoba nyi? Ano moba inge ketwingile mingilo yo tukengilangapo mu ntanda yo tukaswana, tumwesha’mba tubena kwinengezhezha jimo kwikala na bumi bwa myaka ne myaka pano pa ntanda!

a Monai mutwe wa kuba’mba “Bakakwashanga Bakwabo Kuyuka Kuba Bintu Byaoloka” uji mu Kyamba kya Usopa kya September 2022.