FUNJISHAINGA BAANA BENU
Bintu ka byo Twakonsha Kufunjilako ku Kapondo?
Kapondo ye twakonsha kufunjilako ke uno ye ubena kumona ubena kwaamba ne Yesu. Uno kapondo wizhachisha pa byubilo byanji byatama. Waambila Yesu amba “mukamvuluke kimye kyo mukeya mu Bufumu bwenu.” Byonka byo ubena kumona pa kipikichala, Yesu ubena kwaamba na uno kapondo. Nanchi wayuka Yesu byo abena kwamba na kapondo nyi?—a Yesu ubena kumulaya amba: “Kine nakwambila lelo namba, Ukekala ne amiwa mu Paladisa.”
Nanchi ulanguluka amba Paladisa ukekala byepi?— Pa kuba’mba tutane mukumbu, twayai twisambe pa Paladisa mutanshi Lesa mo abikile wamulume ne wamukazhi, aye Adama ne Evwa. Nanchi uno Paladisa wajinga kwepi? Mwiulu nyi, inyi pano pa ntanda?—
Umvwe waamba’mba wajinga pano pa ntanda, ko kuba’mba waamba kine. Umvwe twaswisha kuba’mba uno kapondo ukekala “mu Paladisa,” ko kuba’mba ukekala ponka pano pa ntanda kimye ntanda kyo ikekala ke Paladisa. Uno Paladisa ukekala byepi?— Twaya tumone byo akekala.
Panyuma ya kuba Yehoba walenga bantu batanshi, Adama ne Evwa, Baibolo wamba’mba wibabikile mu Paladisa pano ponka pa ntanda. Uno muzhi bamutelanga amba “bujimi bwa Edena.” Nanchi wakonsha kufwanyikizha byawamine buno “bujimi bwa Edena” nyi?— Kwambatu kine, yajinga mpunzha yawama bingi kwikalamo bantu bavula yo bakyangye kumonapo kala.
Walangulukapo amba ka? Nanchi Yesu ukekala pano pa ntanda na uno kapondo wizhachishe na mambo a byubilo byanji byatama nyi?— Ine, Yesu ukekala mwiulu kasa alama nobe mfumu pa bantu bakekala mu Paladisa pano pa ntanda. Yesu ukekala na uno kapondo mambo ukamusangula ku bafu ne kumuta muchima mu Paladisa pano pa ntanda. Pano mambo ka Yesu o akalekela muntu wajinga kapondo kwikala mu Paladisa?— Twaya twisambepo pa kino.
Ibyo kuba’mba uno kapondo waubile bintu byatama bingi, byonkatu byuba ne bantu bavula bajinga pano pa ntanda. Nangwa byonkabyo, bavula baubile bintu byatama bingi na mambo a kuba’mba kechi bebafunjishe pe Yehoba ne kuyuka bintu byo akeba amba bobenga ne.
Bantu ba uno mutundu kubikakotu ne uno kapondo ye esambilenga nanji Yesu kimye kyo ajinga pa kichi kya lumanamo, bakasangulwa ne kwikala pano ponka pa ntanda mu Paladisa. Bakebafunjisha kuyuka kyaswa muchima wa Lesa. Popo bakamwesha inge bamutemwa Yehoba.
Nanchi wayuka byo bafwainwa kumwesha amba bamutemwa Lesa nyi?— Kupichila mu kuba bintu bikeba Lesa amba bobenga. Byo kikawamapo kwikala mu Paladisa na bantu batemwa Yehoba kabiji betemwa abo bene na bene!
Tangai mu Baibolo wenu
[Tubyambo twa mushi]
a Umvwe kya kuba’mba mubena kutanga na mwana kabiji mwatana paji kakishilwa, kabena kulumbulula amba mwafwainwa kukitulumanako ne kupembela mwana wakumbula.