Nanchi Twafwainwa Kulombanga ku Bafu Nyi?

ATWEBA bonse tulefulwa kabiji tukeba muntu wa kwitutekenesha. Umvwe twalefulwa tukeba kwisamba na mulunda wayuka lukatazho lo tuji nalo kabiji uji na lusa. Mulunda inge kya kuba’mba uji na lusa ne kuyuka bulongo lukatazho lo tuji nalo kilengela kumutemwa.

Bino byo biumvwa bamo kimye kyo bafuukulapo kulomba. Mu kifulo kya kulomba kwi Lesa awo ye bamona kuba’mba kechi wakonsha kwibakwasha ne na mambo a kwikala na kifulo kikatampe, kwibalengela kulomba ku bafu. Balanguluka kuba’mba bafu bapita mu makatazho apitamo bantu bonse kabiji amba inge balomba bakonsha kwibomvwa. Kyakumwenako, bantu inge baela kintu kyanema bingi bakonsha kuya na kulomba ku muntu wafwa nabiji Anthony wa ku Padua ukwasha bantu kutana bintu byaeleka nangwa byo baiba. Umvwe babena kulombela nyama wakolwa, baya ku “mufu” aye Francis wa ku Assisi nangwa Jude Thaddeus umvwe bakankalwa kuchinchika pa lukatazho lo baji nalo.

Pano twakonsha kuyuka byepi inge Binembelo byaswisha kulomba ku bafu? Byo kiji kuba’mba milombelo ke kwisamba na Lesa, twafwainwa kukeba kuyuka inge Lesa umvwa milombelo yetu. Kabiji twafwainwa ne kwiipuzha kuba’mba: Nanchi Lesa umvwa byepi kulomba ku bafu?

BYAMBA BINEMBELO PA KULOMBA KU BAFU

Muteeto wa kulomba ku bafu waimena pa lufunjisho lwa kulomba kupichila mu bafu alo lufunjisha Kipwilo kya Bakatolika. Paimena kino kishinka “ke kulomba kwi Lesa pa kuba’mba emubile lusa kupichila mu muntu wafwa,” kwesakana na byamba buku wa New Catholic Encyclopedia. Onkao mambo, ubena kulomba ku bafu uketekela kuba’mba basa kumubila lusa kupichila mu muntu wafwa mambo bamupesheshe kwi Lesa.

Nanchi Baibolo byobyo afunjisha nyi? Bamo bamba’mba mutumwa Paulo wamwesheshe kuba’mba kulomba ku bafu kwajingatu bulongo kupichila mu byambo byo anembele. Kyakumwenako, kimye kyo anembejilenga bena Kilishitu mu Loma waambile amba: “Pano nemusashijila, anwebakwetu, monka mwi Nkambo yetu Yesu Kilishitu, ne mu butemwe bwa Mupashi, namba mwikwachishe pamo ne amiwa mu milombelo yenu yo mundombela kwi Lesa.” (Loma 15:30) Nanchi Paulo wabujilenga bena Kilishitu bakwabo kuba’mba bafwainwa kulomba kwi Lesa kupichila mwi aye nyi? Ine. Umvwe paji byo babena kukeba, baambilanga Paulo mutumwa wa kwa Kilishitu kwibalombelako kwi Lesa. Paulo wamwesheshenga kuba’mba kijitu bulongo kwambila mukwetu mwina Kilishitu kwitulombelako kwi Lesa. Ke kintu kyapusana bingi kulomba ku muntu ye mwayuka amba uji mwiulu kwitulombelako kwi Lesa. Mambo ka o kyaikela bino?

Mu Mambo Awama a mutumwa Yoano, Yesu waambile’mba: “Amiwa ne jishinda ne bukine ne bumi. Kafwako wiya kwi Batata ne, poso wapichila mwi amiwa.” (Yoano 14:6) Kabiji wanungilepo amba: “Kyonse kyo mukalomba Batata mu jizhina jami, bakemupekyo.” (Yoano 15:16) Yesu kechi waambile kuba’mba tulombenga kwi aye bino witwambilako kwi Lesa ne. Pa kuba’mba Lesa omvwe milombelo yetu, twafwainwa kulomba kwi Lesa kupichilatu mwi Yesu.

Kimye baana banji bwanga kyo bamwambijile Yesu kuba’mba ebafunjishe bya kulomba, wibambijile amba: “Pa kulomba, saka mwamba amba: ‘Tata, jizhina jenu jizhile.’” (Luka 11:2) Onkao mambo, kimye kyonse kyo tubena kulomba, kechi twafwainwa kulomba kwi Yesu nangwa ku muntu mukwabo ne, kanatu kwi Lesa mwine. Kulanguluka pa bino byafunjishe Yesu, nanchi kechi twakonsha kuswa kuba’mba twafwainwa kulomba kupichila mwi Yesu Kilishitu kechi ku “bafu” ne nyi?

Kulomba ke lubaji lwanema bingi mu mpompwelo yetu. Baibolo ufunjisha kuba’mba twafwainwa kulombangatu kwi Lesa kechi ku muntu ungi ne. (Yoano 4:23, 24; Lumwekesho 19:9, 10) O ene mambo o twafwainwa kulombangatu kwi Lesa.

NANCHI MWAKONSHA KUCHIINA KULOMBA KWI LESA NYI?

Mu jashi janji ja pa mutumba, Yesu waambile pa kyakumwenako kya mwana ubena kulomba bya kuja kwi bashanji. Nanchi bashanji basakumupa mwana jibwe mu kifulo kya shinkwa nyi? Nangwa muloolo mu kifulo kya kumupa jisabi nyi? (Mateo 7:9, 10) Kyafwainwa kutama bingi umvwe nsemi wa butemwe wauba bino.

Monai kyakumwenako kikwabo kipasha na kino. Fwanyikizhai kuba’mba mwanenu ubena kulomba bintu bimo kwi anweba. Mumvwañana bingi nanji kabiji wimukasulukila. Pano bino, na mambo a kuba’mba ubena kuchiina kwimulomba, waambila mukwabo kuba’mba a mulombeleko byo abena kukeba kwi anweba. Mukomvwa byepi? Ibyepi inge kimye kyonse kyo akeba kwamba ne anweba ke ambile mu muntu ungi kabiji kyamweka kuba’mba kechi usa kuleka kuba bino ne? Nanchi mwakonsha kumvwa bulongo nyi? Kishinka ke kya kuba’mba kechi mukomvwa bulongo ne. Bansemi bonsetu bakeba baana babo kwibasolomoka abo bene saka bakasuluka inge paji byo bakeba kechi kwingijisha muntu mukwabo ne.

Pa kulumbulula kishimpi kya mwana walombelenga kajo, Yesu waambile ku mabumba’mba: “Onkao mambo, umvwe anweba byo muji babi mwayuka kupana byawama ku baana benu, ko kuba amba Shenu wa mwiulu ukakilapo kupana byawama ku boba bamulomba!” (Mateo 7:11) Kwa kubula nangwa kuzhinaukatu ne, nsemi ukebesha kupa bintu byawama mwananji. Shetu wa mwiulu ukebesha kumvwa ne kukumbula milombelo yetu.

Lesa ukeba amba tumusolomokenga mu milombelo nangwa kya kuba tuji na makatazho. Kechi wapa muntu mukwabo kumutelekelako milombelo yetu ne. Baibolo witutundaika amba: “Utwike Yehoba kisendwa kyobe, ne aye ukakukosesha: Kechi ukamuleka mololoke amba atenkene nangwa jimotu ne.” (Salamo 55:22) Mu kifulo kya kulombanga kupichila mu bafu nangwa ku muntu uji yense, twafwainwa kumuyuka bulongo Yehoba Lesa ne kulombangatu kwi aye.

Shetu wa mwiulu wituta muchima atweba bonse pa muntu pa muntu. Witukwasha inge twaikala na makatazho kabiji witwambila amba twafwainwa kufwenya kwipi ne aye. (Yakoba 4:8) Kitusangajika bingi kuyuka kuba’mba twafwainwa kumusolomoka Lesa kabiji Shetu ‘umvwa milombelo.’—Salamo 65:2. ▪

[Kipikichala pa peja 13]

Byonka byubatu nsemi wa butemwe na mwananji, Lesa ukeba amba twisambenga nanji