Mwakonsha Kuba Byepi pa Kuba’mba Lesa Omvwenga Milombelo Yenu?

LOMBAINGA KWI YEHOBA KUPICHILA MU JIZHINA JA YESU

“Umvwe mukalombe kintu kwi Batata, abo bakemupakyo mu jizhina jami.”—Yoano 16:23.

Abye byambo byaambile Yesu bimwesha’mba Yehoba ukeba atweba kulombatu kwi aye kwapwa kechi kulomba bipashañano, bazhijikwa, bamalaika nangwa bashakulu bafwile kala ne. Bino twafwainwa kulomba kwi aye kupichila mu jizhina ja Yesu. Akino kibena kulumbulula’mba inge tubena kulomba kwi Lesa, twafwainwa kulomba kupichila mu jizhina ja Yesu. Mambo kuba bino kumwesha’mba twasanta bingi pa bintu bitubila Yesu. Yesu waambile’mba: “Kafwako wiya kwi Batata ne, poso wapichila mwi amiwa.”—Yoano 14:6.

LOMBAINGA KUFUMA PANSHI YA MUCHMA

“Mubuulai biji ku michima yenu.”—Salamo 62:8.

Inge tubena kulomba kwi Yehoba, twafwainwa kwambanga byonkatu byo tuba na bansemi betu betutemwa. Kechi twafwainwa kutanganga milombelo mu buku nangwa yo twalaminatu ku mutwe ne, pakuba twafwainwa kulombanga kwi aye mu mushingi kabiji kufuma panshi ya muchima.

LOMBAINGA MWAYILA KYASWA MUCHIMA WA LESA

“Kintu kyonse kyo twakonsha kumulomba mwayila kyaswa muchima wanji, aye witumvwa.”—1 Yoano 5:14.

Yehoba Lesa witubuula mu Baibolo bintu byo aketubila ne bintu byo akeba atweba kubanga. Pa kuba’mba Lesa akumbule milombelo yetu, twafwainwa kulomba “mwayila kyaswa muchima wanji.” Onkao mambo, twafwainwa kutanganga Baibolo pa kuba’mba tumuyuke bulongo. Inge ketube bino, milombelo yetu ikekala yafwainwa kwi aye.

ÑANYI BINTU BYO TWAFWAINWA KULOMBAPO?

Mwafwainwa Kulomba Bintu Byonse byo Mukeba. Twafwainwa kulomba kwi Lesa kwitupa bintu byo tukeba pa juba pa juba nabiji kajo, bya kuvwala ne mwa kulaala. Kabiji twafwainwa ne kulomba maana a kwitukwasha kufuukulanga bintu bulongo ne bulume bwa kwitukwasha kuchinchika makatazho o tubena kupitamo. Twafwainwa kulomba kuba’mba twikale na lwitabilo, etulekeleko mambo ne kuba’mba Lesa etukwashe.—Luka 11:3, 4, 13; Yakoba 1:5, 17.

Lombelaingako Bakwenu. Bansemi bomvwa bingi bulongo inge bamona baana babo saka betemwa bene na bene. Yehoba naye ukeba bingi baana banji pano pa ntanda kwitemwa bene na bene ne kwita muchima. Kyanema bingi kulombelangako bamwatawetu ne bakazhi betu, balongo betu, baana betu ne balunda netu. Mwana wa bwanga Yakoba wanembele’mba: ‘Ilombelaingako anwe bene na bene.’—Yakoba 5:16.

Sanchilainga Lesa. Baibolo waamba pa Mulenga wetu amba: “Waubile byawama kupichila mu kwimupa mvula ne kimye kipilamo kajo saka emupa kajo kavula ne kulengela michima yenu kusangalala.” (Byubilo 14:17) Onkao mambo, inge twalanguluka pa bintu byonse bitubila Lesa, twafwainwa kumusanchilanga mu milombelo yetu. Twafwainwa ne kumwesha’mba twamusanchila Lesa inge saka tukookela mikambizho yanji mu bwikalo bwetu bonse.—Kolose 3:15.

TEKANYAI NE KUTWAJIJILA KULOMBA

Bimye bimo, twakonsha kulefulwa na mambo a kubula kutambwila bintu byo tubena kulombapo. Abya kino kilumbulula’mba Lesa kechi wituta muchima nenyi? Ine mwane ne. Monai bino byamwekele byo byamwesha kuba’mba twafwainwa kutwajijilatu na kulomba pa kintu kyo tubena kukeba.

Steve ye baambapo mu mutwe mutanshi, waambile’mba: “Inge nalekele kulomba kwi Lesa, umvwe nekujikile.” Ñanyi kintu kyamukwashishe? Steve watendekele kufunda Baibolo kabiji wafunjile ene mambo o kyawamina kulomba kwi Lesa. Steve waambile’mba: “Ndomba kwi Lesa ne kumusanchila pa bukwasho bonse bwankwasha balunda nami. Aluno nji bingi na lusekelo kukila byo najinga kala.”

Kyajinga byepi kwi Jenny walangulukilenga’mba Lesa kechi wakonsha kumvwa milombelo yanji ne? Waambile’mba: “Inge natendeka kulanguluka’mba kechi nannema ne, nalombanga kwi Lesa kunkwasha kuyuka kyo mbena kulangulukila bino.” Kulomba bino kwamukwashishe byepi? Waambile’mba, “Kulomba kwi Lesa kwankwasha bingi kumonanga bintu byonkatu Lesa byo ebimona, nangwa kya kuba muchima wami unzhachisha, Lesa aye kechi unzhachisha ne. Kashika kuba bino kwankwasha bingi kuyuka’mba nannema kwi Lesa.” Ñanyi bintu byawama byafumamo? Kulomba kwi Lesa kwankwasha kumonanga Yehoba amba koaji, kabiji wa butemwe, wata muchima bantu, Tata kabiji mulunda nami ukankwashanga kimye kyonse inge natwajijila kuba kyaswa muchima wanji.”

Kabiji monai kyamwekejile ba Isabel. Byo baimichile, badokotala bebabuujile’mba mwana uji munda ukasemwa kilema. Akino kibakolele bingi ku muchima. Bantu bamo bebambijilenga’mba bafumyetu jimi. Baambile’mba, “Kumvwa bino kwandengejile kulanguluka’mba nsa kufwa na bijikila.” Pano ba Isabel baubile byepi? Baambile’mba: “Nalombanga bingi kwi Lesa kuba’mba ankwashe kuchinchika.” Kechi papichile ne moba avula ne, ba Isabel basemene mwana wa mulume Gerard kabiji wajinga kilema. Nanchi ba Isabel baswile’mba Lesa wakumbwile milombelo yabo nyi? Ee, baswile. Mu ñanyi jishinda? Ba Isabel baambile’mba: “Byo mmona mwanami wa mulume, aluno wafikizha ne myaka 14 saka asangalala nangwa kya kuba kilema, mvuluka’mba Lesa wakumbula milombelo yami mambo mwanami ke mapesho ampa Yehoba Lesa.”

Byambo bya uno mutundu bya kufuma panshi ya muchima bitulengela kuvuluka byambo byaambile nyimbi wa masalamo bya kuba’mba: “Anweba Yehoba mukomvwa misashijilo ya bakimote. Mukalengela michima yabo kuchinchika kabiji mukebata muchima.” (Salamo 10:17) Abino byo bishinka byanema bingi byakonsha kwitulengela kulombanga kwi Lesa kimye kyonse!

Mu Baibolo tutaanamo milombelo yavula bingi yalombele Yesu. Mulombelo wayukanyikwa ke yewa ye afunjishe baana banji ba bwanga. Twakonsha kufunjilako ka ku luno lulombelo?