Nanchi Paladisa ye Batongola mu Baibolo Ukekela Pi? — BUTALA BWA MABUKU BWA PA INTANETI

Bantu Bepuzha’mba . . .

Nanchi Paladisa ye Batongola mu Baibolo Ukekela Pi?

▪ Yesu waambijile mwanamulume wajinga pepi na kufwa byambo byamwesheshe’mba waitabila mwi aye amba: “Ukekala ne amiwa mu paladisa.” (Luka 23:43, NW) Uno mwanamulume ukekala pi? Nanchi uno Paladisa ukekela mwiulu nyi, pano pa ntanda, inyi ku mpunzha ikwabo?

Bashakulu betu batanshi baikelepo mu Paladisa. Baibolo witubula’mba: “Kabiji Yehoba Lesa wajimine bujimi bwa bichi ku musela, mu Edena, mo mo amubikile muntu ye abumbile. . . . Kabiji Yehoba Lesa wamutwajile muntu ne kumubika mu bujimi bwa Edena amba engilenga monka ne kwibulama.” (Ntendekelo 2:8, 15) Bino byambo byo bebituntulwile mu mulaka wa Kingiliki, kyambo kya “bujimi” kilumbulula “paladisa.”

Byonkatu bansemi byo babaishako nzubo inge baana bavula, ne bansemi betu batanshi nabo pa kubaya kisemi bafwainwe kubaisha Paladisa, ko kuba’mba kubaisha bujimi bwa Edena. Lesa wibambijile’mba: “Semainga ne kusemununa, muvule ne kukumbana ponse pa ntanda ne kwiikokesha.”—Ntendekelo 1:28.

Mulenga wetu wakebelenga kuba’mba bantu bekalenga myaka yavula ne kusemununa mu Paladisa pano pa ntanda. Bafwainwe kwikala na bumi mu ntanda yawama kwakubula kufwa. Ntanda yafwainwe kwikala muzhi wabo wa kwikalapo myaka ne myaka. O ene mambo pano pa ntanda o paikela bilengwa bya kitambo. Twalengelwe kwikala myaka ne myaka mu ntanda yawama.

Nanchi Lesa waalula mulanguluko wanji nyi? Ine. Mambo aye mwine Yehoba waamba’mba: “Byambo byami bilupuka mu kanwa kami; kechi bikabwelatu byatu kwi amiwa ne, poso kuba kyonkakya kyo nafukula, ne kulumbulukila mu kyonkakya kintu kyo nebitumijile.” (Isaya 55:11) Byo papichile myaka kukila pa 3,000 panyuma ya kulengwa kwa muntu mutanshi, Baibolo waamba pe aye mwine “walengele bya mwiulu, yenka wabumbile ntanda ne kwiilenga, ne kwiikajika” amba “kechi wiilengele ke yavulañanatu ne, kana yafwainwa kwikalapo bilengwa byanji.” (Isaya 45:18) Lesa kechi waalula mulanguluko wanji ne. Ino ntanda ikekala ke paladisa.

Bibaba bya mu Baibolo byavula byaamba pa paladisa bilumbululatu bikekala bwikalo pano pa ntanda. Nabiji byambo byaambile Ngauzhi Isaya amba: “Bakashimika mazubo abo ne kwikalamo; kabiji bakajimba majimi abo a miñanzañanza, ne kuja bipangwa byabyo.” (Isaya 65:21) Kwepi ko bashimika mazubo ne kujimba miñanzañanza? Kwepi ko baja bipangwa? Pano pa ntanda. Kinembelo kya Byambo bya Mana 2:21 kyamba’mba: “Mambo baoloka bakekala mu ntanda, kabiji ne balumbuluka bakakelwa monka.”

Yesu naye waambile’mba Paladisa ukekala pano pa ntanda. Kabiji walayilepo ne bamo bachechetu kuba’mba ukalama nabo mu paladisa wa mwiulu. (Luka 12:32) Umvwe bafwa, basangulwa ne kuya na kutana Yesu mu Paladisa wa mwiulu amo mobakekala pamo ne Kilishitu na kulama Paladisa wa pano pa ntanda. (Lumwekesho 5:10; 14:1-3) Bano bakalamanga Paladisa wa pano pa ntanda bakamona kuba’mba walamwa bulongo kwesakana na mizhilo ya Lesa.

Yesu wayukile kuba’mba kino kyo kyaswa muchima wa Lesa pano pa ntanda. Wayukile kino mambo wajinga mwiulu ne Shanji kimye kyo banengezhenga bujimi bwa Edena. Bantu bonse baji na jishuko ja kwikala mu paladisa kikulutu baikala na lwitabilo. (Yoano 3:16) Bano bobo alayile Yesu amba: ‘Mukekala ne amiwa mu paladisa.’—Luka 23:43.

[Byambo biji pa Kipikichala pa peja 15]