Lesa Wakebelenga’mba Pano pa Ntanda Pekale Byepi?

1. Mambo ka Lesa o alengejile ntanda?

Yehoba wapaine ino ntanda ku bantu. Ye muzhi wetu. Onkao mambo, bamulume ne mukazhi batanshi, ba Adama ne Evwa kechi wibalengele’mba bakekalenga mwiulu ne. Bamalaika bobo alengele’mba bakekalenga mwiulu. (Yoba 38:4, 7) Lesa wabikile muntu mutanshi mu paladisa wawama watelwanga’mba Edena. (Ntendekelo 2:15-17) Yehoba wamupele aye pamo na baana banji bakasemwanga kulutwe luketekelo lwa kwikala myaka ne myaka pano pa ntanda.—Tangai Salamo 37:29; 115:16.

Kuntendekelo, bujimi bwa Edena bo bwajingatu Paladisa. Bamulume ne mukazhi batanshi bafwainwe kusema ne kuyuzha ntanda. Kabiji bafwainwe kuwamisha ntanda ne kwiyalula ke paladisa. (Ntendekelo 1:28) Ntanda kechi ikonaika ne. Ye muzhi wa bantu myaka ne myaka.—Tangai Salamo 104:5.

2. Mambo ka ntanda o yabujila kwikala paladisa?

Ba Adama ne Evwa basatukijile Yehoba, kino kibalengejile kwibafumya mu Edena. Paladisa wataikile kabiji kafwako muntu nangwa umo wakonsha kumubwezha ne. Baibolo waamba’mba: “Pano pa ntanda papewa mu kuboko kwa mubi.”—Yoba 9:24.—Tangai Ntendekelo 3:23, 24.

Nanchi Yehoba walubako kyo akebelenga patanshi byo alengele bantu nyi? Ine. Lesa Wabulume bonse. Kechi ukakankalwa ne. (Isaya 45:18) Ukabwezha bwikalo bo akebelenga’mba bantu bekale.—Tangai Salamo 37:11, 34.

3. Lesa ukabwezha byepi Paladisa pano pa ntanda?

Paladisa ukabwela jibiji mu bukalama bwa kwa Yesu byo aji Mfumu watongolwa kwi Lesa. Pa nkondo itelwa’mba Amagedonyi, Yesu ukakambizha bamalaika ba Lesa konauna bonse basatukila Lesa. Yesu ukakasa Satana pa myaka 1,000. Bantu ba Lesa bakapuluka luno lonaiko mambo Yesu ukebatangijilanga ne kwibazhikijila. Bakekala na bumi bwa myaka mu Paladisa pano pa ntanda.—Tangai Lumwekesho 20:1-3; 21:3, 4.

4. Nga buyanji bukapwa kimye ka?

Ñanyi kimye Lesa kyo akafumyapo bubi pano pa ntanda? Yesu waambile pa “kiyukilo” kikamwesha’mba mpelo iji pa bwipi. Bintu bibena kubiwa mu ntanda lelo jino bibena kulengela bantu kwakamwa’mba kwandapo bafwa, kabiji bibena kumwesha’mba tuji mu moba a “mpelo ya buno bwikalo.”—Tangai Mateo 24:3, 7-14, 21, 22.

Yesu byo akalamanga ino ntanda saka aji mwiulu pa myaka 1,000, ukapwisha buyanji pano pa ntanda ponse. (Isaya 9:6, 7; 11:9) Yesu kechi ukekalatu mfumu ne, ukekala Ñanga Mukatampe, kabiji ukalekela mambo bonse batemwa Lesa. Kupichila mwi Yesu, Lesa ukapwisha bikola, bukote ne lufu.—Tangai Isaya 25:8; 33:24.

5. Bañanyi bakekalanga mu Paladisa?

Bantu bakokela Lesa bo bakekala mu Paladisa. (1 Yoano 2:17) Yesu watumine baana banji ba bwanga kukeba bantu bakoka michima ne kwibafunjisha byo bakonsha kutokesha Lesa ku muchima. Lelo jino, Yehoba ubena kukonkanya bantu bakekala mu Paladisa pano pa ntanda. (Zefwaniya 2:3) Pa Mazubo a Bufumu a Bakamonyi ba kwa Yehoba bantu bafunda bya kwikala bulongo mu masongola ne bya kwikala bansemi bawama. Bansemi bapopwela Lesa pamo na baana babo ne kufunda byo bakonsha kumwenamo mu mambo awama.—Tangai Mika 4:1-4.