Fundainga Mambo A Lesa

Lesa Wakebelenga’mba Pano pa Ntanda Pekale Byepi?

Kino kibaba kyaamba pa mepuzho kampe o mwakiipuzhapo kala kabiji kyamwesha ne po mwakonsha kutana mikumbu mu Baibolo wenu. Bakamonyi ba kwa Yehoba bakatemwa bingi kwisamba nenu pa ino mikumbu.

1. Lesa wakebelenga’mba pano pa ntanda pekale byepi?

Ino ntanda ye muzhi wa bantu. Panyuma ya kulenga bamalaika amba bekalenga mwiulu, Lesa walengele bantu amba bekalenga pano pa ntanda. (Yoba 38:4, 7) Onkao mambo, Yehoba wabikile muntu mutanshi mu paladisa wawama watelwanga amba Edena ne kumupa aye pamo na baana banji bakasemwanga kulutwe luketekelo lwa kwikala myaka ne myaka pano pa ntanda.—Ntendekelo 2:15-17; tangai Salamo 115:16.

Bujimi bwa Edena bwajingatu lubaji lucheche pano pa ntanda. Bamulume ne mukazhi batanshi, ba Adama ne Evwa bafwainwe kwikala na baana. Kisemi byo kyabailenga, bafwainwe kujima ntanda ne kwiyalula ke paladisa. (Ntendekelo 1:28) Ntanda kechi ikonaunwa ne.—Tangai Salamo 104:5.

2. Mambo ka ntanda o yabujila kwikala paladisa pa kino kimye?

Ba Adama ne Evwa basatukijile Lesa, kino kibalengejile kwibapanga mu Edena. Paladisa wapwile kabiji kafwako muntu nangwa umo wakonsha kumubwezha ne. Baibolo waamba’mba: “Pano pa ntanda papewa mu kuboko kwa mubi.”—Yoba 9:24; tangai Ntendekelo 3:23, 24.

Pano bino Yehoba kechi walubako nkebelo yanji itanshi yo alengejile bantu ne, kabiji Lesa kechi ukakankalwa ne. (Isaya 45:18) Ukalengela bantu kwikala byonka byo akebelenga amba bekale.—Tangai Salamo 37:11.

3. Lesa ukabwezha byepi mutende pano pa ntanda?

Pa kuba’mba bantu bakeyowe mutende, Lesa patanshi wafwainwa kufumyapo bantu batama. Pa nkondo ya Amagedonyi, bamalaika ba Lesa bakonauna bantu bonse bamukana Lesa. Satana bakamukasa myaka 1,000, pakuba bantu batemwa Lesa bakapuluka ne kwikala balusekelo mu ntanda ipya.—Tangai Lumwekesho 16:14, 16; 20:1-3; 21:3, 4.

4. Nga buyanji bukapwa kimye ka?

Mu kimye kya myaka 1,000, Yesu ukalamanga ino ntanda saka aji mwiulu ne kwiilengela kwikala ke paladisa. Kabiji aba bonse batemwa Lesa ukebalekelako mambo abo. Kabiji ukafumyapo bikola, kukota ne lufu.—Tangai Isaya 11:9; 25:8; 33:24; 35:1.

Kimye ka Lesa kyo akafumyapo bubi pano pa ntanda? Yesu wapaine “kiyukilo” kikamweshanga amba pano mpelo iji pa bwipi. Bintu bibena kubiwa mu ntanda lelo jino bibena kulengela bantu kwikala na moyo amba kwendapo bafwa kabiji bibena kumwesha amba tuji mu moba a “mpelo ya buno bwikalo.”—Tangai Mateo 24:3, 7-14, 21, 22; 2 Timoti 3:1-5.

5. Bañanyi bakekalanga mu Paladisa kimye kya kulutwe?

Yesu wakambizhe baana banji ba bwanga kulenga baana ba bwanga ne kwibafunjisha mashinda a Lesa a butemwe. (Mateo 28:19, 20) Yehoba ubena kukwasha bantu bavula mwaya ntanda yonse kuba’mba bakekale na bumi mu ntanda ipya. (Zefwaniya 2:3) Pa Mazubo a Bufumu a Bakamonyi ba kwa Yehoba, bantu bafunda bya kwikala bamulume ne mukazhi bawama kabiji ne bya kwikala bansemi bawama. Baana ne bansemi bafunjila pamo bishinka bibalengela kuketekela amba bakekala bulongo kulutwe.—Tangai Mika 4:1-4.

Umvwe mwaya pa Nzubo ya Bufumu, mukatana bantu batemwa Lesa kabiji bakeba kumutokesha ku muchima.—Tangai Bahebelu 10:24, 25.

Umvwe mukeba kuyukilako byavula, monai kitango 3 kya uno buku, wanembwa na Bakamonyi ba kwa Yehoba.