Mepuzho Afuma ku Batanga

Nyimbi wa masalamo aye Davida byo aambile byambo biji pa Salamo 61:8 amba ukatotanga jizhina ja Lesa “myaka ne myaka,” nanchi walumbulwilenga’mba kechi ukafwa nenyi?

Ine. Byanembele Davida byajinga bya kine.

Akilangulukai byo anembele pa kino kyepelo ne byepelotu bikwabo. Wanembele’mba: “Nkembanga nyimbo ya kutota jizhina jenu myaka ne myaka byo nkafikizhanga pa juba pa juba bintu byo nachipile.” “Nemutota na muchima wami yense anweba Yehoba Lesa wami, kabiji nkatumbijikanga jizhina jenu myaka ne myaka.” “Nkatotanga jizhina jenu myaka ne myaka.”—Sala. 61:8; 86:12; 145:1, 2.

Davida byo anembele bino byambo, kechi walangulukilenga’mba kechi ukafwa ne. Wayukile kuba’mba Yehoba waambile’mba bantu bakafwanga na mambo a bundengamambo kabiji Davida naye wayukile kuba’mba wajinga ndengamambo. (Nte. 3:3, 17-19; Sala. 51:4, 5) Kabiji wayukile kuba’mba nangwatu banabalume ba kishinka nabiji Abalahama, Izaka ne Yakoba bafwile. Kabiji Davida wayukile kuba’mba naye juba jimo ukafwa. (Sala. 37:25; 39:4) Byambo biji pa Salamo 61:8 bimwesha kuba’mba Davida wasakishe bingi kutota Yehoba myaka ne myaka, ko kuba’mba mu myaka ya bumi bwanji yonse.—2 Sam. 7:12.

Bimye bimo Davida wanembele bintu byo apichilemo mu bwikalo bwanji byonka byo twakonsha kumona tubyambo twa peulu pa Salamo 18, 51, ne 52. Mu Salamo 23, Davida walumbulula Yehoba amba kafunga utangijila, ukokolosha ne kuzhikijila. Davida wajinga kafunga wawama kabiji wakebelenga kwingijila Lesa mu ‘moba onse a bumi bwanji.’—Sala. 23:6.

Vulukai’mba, Yehoba ye watangijile Davida kunemba bino byonse. Pa byo anembele pajinga ne bungauzhi bwafwainwe kufika palutwe kacheche. Pa Salamo 110, Davida waambile pe nkambo yanji kimye kyo ‘akekala ku kuboko kwa Lesa kwa kilujo’ mwiulu ne kutambula luusa. Luusa lwa kuba ñanyi kintu? Ke luusa lwa kushinda balwanyi ba Lesa ne ‘kuchibila mambo bisaka bya bantu’ pano pa ntanda. Davida wajinga mushakulu wa kwa Yesu aye Mesiasa. Mesiasa ukalamanga pano pa ntanda saka aji mwiulu kabiji ‘ukekala ñanga myaka ne myaka.’ (Sala. 110:1-6) Yesu waambile’mba bungauzhi buji mu Salamo 110 bwaamba pe aye kabiji bukafika kulutwe.—Mat. 22:41-45.

Yehoba watangijile Davida kunemba byamwekele mu moba anji ne bikamweka kulutwe kimye kyo akasangulwa kabiji ukatotanga Yehoba myaka ne myaka. Onkao mambo, Salamo 37:10, 11, 29 waamba pa bungauzhi bwafikile mu moba a bena Isalela ne pa byo bukafika kulutwe kimye Yehoba kyo akafikizha milaye yanji.—Monai jifuka 8 pa mutwe wa kuba’mba “Ukekala ne Amiwa mu Paladisa” mu kyonka kino Kyamba kya Usopa.

Onkao mambo, byambo biji pa Salamo 61:8 ne pa byepelo bikwabo bimwesha’mba Davida wakebelenga kutota Yehoba mu Isalela kufikatu ne byo afwile. Kabiji bimwesha Davida kyo akoba kulutwe inge Yehoba wamusangula ne kwikala na bumi jibiji