Nanchi Mipashi ke Bantu Bajingako Pano pa Ntanda ne Kufwa Nyi?
Mipashi koiji. Kuji mipashi yawama ne yatama. Nanchi ino mipashi bantu bajingako pano pa ntanda ne kufwa nyi?
Ine, kechi ibyo ne. Umvwe muntu wafwa, kechi uya ku mpunzha ya mipashi byonka bilanguluka bantu bavula ne. Twayuka byepi bino? Mambo Baibolo kechi byobyo yaamba ne. Mu Baibolo muji bukine bwafuma kwi Lesa wa kine aye Yehoba. Yehoba walengele bantu ye wayuka kimweka inge bafwa.—Salamo 83:18; 2 Timoti 3:16.
Adama bamulengele kufuma ku lukungu, kabiji ku lukungu ko ko abwelele
Baibolo waamba’mba Lesa walengele mwanamulume mutanshi aye Adama kufuma ku “lukungu lwa panshi.”(Ntendekelo 2:7) Lesa wamubikile mu Paladisa mu bujimi bwa Edena. Adama inge wakookejile mizhilo ya Yehoba, inge kechi wafwile ne, ne lelo jino inge koaji. Bino byo abujile kukookela mizhilo ya Lesa, Lesa wamwambijile’mba: “Ukabwela ku mushiji, mambo ku mushiji ko ko wafumine. Mambo wi lukungu ne ku lukungu ko ko ukabwela.”—Ntendekelo 3:19.
Kino kilumbulula ka? Adama wajinga kwepi Yehoba saka akyangye kumulenga kufuma ku lukungu? Kechi wajingako ne. Kabiji kechi wajinga kilengwa kya mupashi mwiulu ne. Onkao mambo, Yehoba byo aambijile Adama amba “ukabwela ku mushiji,” walumbulwilenga’mba Adama ukafwa. Kechi wayile ku mpunzha ya mipashi ne. Adama byo afwile, kechi wajinga na bumi ne, walekele kwikalako. Lufu yo mpelo ya bumi.
Pano kiji byepi ku bantu bafwa? Nanchi ne abo bafwako nyi? Baibolo wakumbula’mba:
“Bonse [bantu ne banyama] bayatu kuntu kumo. Bonse bafumine ku maloba kabiji bonse babwela ku maloba.”—Musapwishi 3:20.
“Bantu bafwa kafwako kintu nangwa kimo kyo bayuka ne.”—Musapwishi 9:5.
“Butemwe bwabo, lupato lwabo ne kichima kyabo byonse byaonaika.”—Musapwishi 9:6.
“Mu Shelo [kilende], mo mubena kuya kechi muji kwingila mingilo, kulanguluka, kuyuka kintu nangwa kwikala na maana ne.”—Musapwishi 9:10.
“[Muntu] ubwela ku mushiji; pa jonkaja juba milanguluko yanji yonaika.”—Salamo 146:4.
Bantu bomi bo bonkatu bakonsha kuba bino
Nanchi kimukatazha kuswa byaamba bino binembelo nyi? Inge ibyo, langulukai pa kino: Mu bisemi byavula, mwanamulume ye uji na mwingilo wa kumwena kisemi kyanji. Umvwe mwanamulume wafwa, kisemi kyanji kikala na makatazho bingi. Kimo kimye, mwanamukazhi ne baana kechi bekala na mali avula a kupotamo bya kuja ne. Kabiji inge mwatawanji wajinga na balwanyi, batendeka kumanyika kisemi kyanji. Iipuzhai amba: ‘Inge uno mwanamulume uji ku mpunzha ya mipashi, mambo ka o abujila kukwashisha kisemi kyanji? Kabiji mambo ka o abujila kuzhikijila kisemi kyanji ku bantu batama?’ Ene mambo ke a kuba’mba binembelo byaamba kine. Uno mwanamulume kechi wikala na bumi ne, kabiji kafwako kintu kiji kyonse kyo akonsha kuba ne.—Salamo 115:17.
Bantu bafwa kechi bakonsha kupana kajo ku bantu bomi nangwa kwibazhikijila ku bantu bamanyikañana ne
Nanchi kino kibena kulumbulula’mba bantu bafwa kechi bakekala na bumi jibiji nenyi? Ine, kechi byo byo kilumbulula ne. Tusakwisamba pa lusanguko kulutwe. Bino bantu bafwa kafwako kintu nangwa kimo kyo bayuka ne. Kechi bakonsha kumona, kumvwa nangwa kwamba na bantu bomi ne. Onkao mambo, kechi mwafwainwa kwibachiinanga ne. Kechi bakonsha kwimukwasha nangwa kwimukatazha ne.—Musapwishi 9:4; Isaya 26:14.