Nanchi Muji na Mupashi Ubula Kufwa Nyi?
MUTUMWA Paulo wanembele’mba: “binembelo byonse byanembeshiwa kwi Lesa, kabiji byo byawamina mu kwibafunjisha bantu, ne mu kwibalengulula ne mu kwibolola, ne mu kwibafunda mu bololoke.” (2 Timoti 3:16) Ee kine, Baibolo ke buku wa bukine bufuma kwi Lesa wa kine, Yehoba.—Masalamo 83:18.
Yehoba byo aji Mulenga wa bintu byonse, kuvwangakotu ne bantu, wayuka kitumwekela umvwe twafwa. (Bahebelu 3:4; Lumwekesho 4:11) Kabiji mu byambo byanji byanembeshiwa biji mu Baibolo, mo moakumbwila mepuzho a kishinka pa mambo a kimweka umvwe twafwa.
Mupashi ye Muka?
Mu Baibolo, byambo byatuntululwa’mba “mupashi” bilumbulula “muya.” Pano bino, kechi bilumbululatu kupema konka ne. Kya kumwenako, Yakoba munembeshi wa Baibolo, waamba’mba: ‘Mubiji pa kubula mupashi ufwa.’ (Yakoba 2:26) Onkao mambo, mupashi ke bulume bulengela mubiji kwikala mumi.
Buno bulume kechi muyatu nangwa mwela wenda mu mapwapwa ne. Mambo ka? Kwesakana na byaamba buku wa The World Book Encyclopedia, muntu inge waleka kupema, mu ma cells (maselo) anji a mubiji mushala bulume kimye kicheche. Na mambo a kino, umvwe muntu wapungila wakonsha kupapuka. Pano umvwe bulume bwa bumi bwapwa mu maselo a mubiji, nangwa awo muntu bamukwashe byepi, kechi kyakonsheka ne. Kafwako nangwa muya umo wakonsha kupapula maselo nangwatu jimo kwikala ke jumi ne. Onkao mambo, mupashi ke bulume nangwa’mba lusase wa bumi ubula kumweka ulengela maselo ne muntu mwine kwikala mumi. Buno bulume bwa bumi bulamwa mu kupema.—Yoba 34:14, 15.
Abya uno mupashi ujitu mu bantu bonka nyi? Baibolo itukwasha kukumbula bulongo jino jipuzho. Solomone Mfumu wa maana waambile’mba bantu ne banyama “bonsetu bajitu na [Mupashi, NW] umo,” Kabiji waipwizhe’mba: “Ñanyi wayuka’mba mupashi wa muntu uya kwiulu kabiji ne mupashi wa nyama wikila munshi ya ntanda?” (Musapwishi 3:19-21) Banyama ne bantu bonse baji na mupashi. Kiji byepi byo byo?
Mupashi nangwa’mba bulume bwa bumi bwakonsha kwesakanyiwa ku malaichi aji mu mashinyi nangwa mu kipe kingijisha malaichi. Malaichi abula kumweka engijishiwa mu mingilo yapusana-pusana, kwesakana na musango wa kipe o kibena kupa bulume. Kya kumwenako, kitofu kyakonsha kukaba, kompyuta yakonsha kumwesha byambo ne kubala bibelengelo, kabiji televizhonyi nayo yakonsha kumwesha bipikichala ne kwamba. Bino malaichi kechi aluka ke kyo kyo kipe kyo abena kupa bulume ne. Ekalatu bulume. Byonkabyo, ne bulume bwa bumi nabo kechi bwaluka ke kintu mu kilengwa mobuji ne. Kechi kintu ne, kabiji kechi bulanguluka ne. Bantu ne banyama “bajitu na mupashi umo.” (Musapwishi 3:19, NW) Inge muntu wafwa, mupashi wanji kechi wikala ke kilengwa kya mupashi kiya na kwikala kungi ne.
Nanchi bafu baji byepi? Kika kyubiwa ku mupashi umvwe muntu wafwa?
“Ku Lukungu ko Ukabwela”
Kimye muntu mutanshi Adama kyoalajile muzhilo wa Lesa kyanshiji, Wamwambijile’mba: “Kabiji monka mu jisulwila ja mu kilungi kyobe mo ukamwenanga kajo kobe, poso wabwela ku mushiji jibiji; mambo ku mushiji ko ko bakufumishe; kabiji obewa wi lukungu ne ku lukungu ko ukabwela.” (Ntendekelo 3:19) Nanchi Adama wajinga pi Yehoba saka akyangye kumulenga kufuma ku lukungu? Kechi wajingako ne! Wajinga ufwako. Onkao mambo, Yehoba Lesa byo aambile’mba Adama ‘ukabwela ku mushiji,’ walumbulwile’mba Adama ukafwa ne kwikala ke lukungu. Adama kechi wayile kwiulu ne. Byo afwile waikele ke ufwako. Lufu—bumbulwabumi bo bwajinga mpanyishi yanji, kechi wayile na kwikala kungi ne.—Loma 6:23.
Nga aba bafwa kiji byepi? Bwikalo bwa bafu byo buji, bwalumbululwa bulongo pa Musapwishi 9:5, 10, po tutanga’mba: ‘Bafu kafwako kyo bayuka ne . . . Mambo mu Kalunga ka bafu kafwamo mwingilo nangwa kulanguluka nangwa maana nangwa milangwe ne.’ Onkao mambo, lufu ke bumbulwa kwikalako. Nyimbi wa masalamo wanembele amba muntu inge wafwa, “[mupashi, NW] wanji ulupuka, ne kubwela ubwela ku mushiji; mu jonkaja juba milanguluko yanji yonaika.”—Masalamo 146:4.
Kwakubula nangwa kuzhinauka ne, bafu kechi bomi ne. Kafwako kyo bayuka ne. Kechi bakonsha kwimumona, kwimumvwa nangwa kwamba nenu ne. Kechi bakonsha kwimukwasha nangwa kwimukatazha ne. Onkao mambo, kechi mwafwainwa kuchina bafu ne. Pano bino, kiji byepi kuba’mba mupashi “ulupuka” mu muntu inge wafwa?
Mupashi ‘Ubwela kwi Lesa’
Baibolo yamba’mba muntu inge wafwa, ‘mupashi ubwela kwi Lesa yenka wamupaine.’ (Musapwishi 12:7) Abya kino kibena kulumbula kuba’mba mupashi wenda mu lwelele ne kuya kwi Lesa nyi? Ine! Jishinda Baibolo jo yaingijishishamo kyambo kya ‘kubwela’ kechi kilumbulula kwenda kufuma ku mpunzha imo kuya ku ikwabo ne. Kya kumwenako, bena Isalela babujile bukishinka bebabujile’mba: “Pano bwelai kwi amiwa, ne amiwa nkabwela kwi anweba, byo byaamba Yehoba wa mabumba.” (Malakai 3:7) ‘Kubwela’ kwa bena Isalela kwi Yehoba kwalumbulwile’mba baleke byubilo byatama ne kuba byawama kwesakana na jishinda ja Lesa ja bololoke. Ne Yehoba naye pa ‘kubwela’ ku bena Isalela kwalumbulwile kwibobila bibusa jibiji bantu banji. Mu mbaji yonse ibiji ‘kubwela’ kwalumbulwile byubilo, kechi kwenda kufuma ku mpunzha imo kuya ku ikwabo ne.
Byonkabyo, pa lufu mupashi kechi ‘ubwela’ kwi Lesa, kwenda kufuma pano pa ntanda ne kuya mwiulu ne. Umvwe buno bulume bwafuma mu muntu, Lesa yenka ye wakonsha kwibubwezhamo. Mupashi ‘ubwela kwi Lesa’ mu mulanguluko wa kuba’mba luketekelo lwa yewo muntu lwa kukekala mumi jibiji mu kimye kya kulutwe luji mu maboko a Lesa.
Kya kumwenako, akilangulukai Binembelo byo byaamba pa mambo a lufu lwa kwa Yesu. Munembeshi wa mambo awama aye Luka washimikizha’mba: “Yesu wabijikizhe na jiwi jikatampe amba, Tata, natula mupashi wami mu maboko enu. Ponkapo pa kwamba byobyo walekele ku mweo.” (Luka 23:46) Mupashi wa Yesu byo alupukilemo kechi wayile mwiulu ne. Yesu kechi wasangwilwe ku bafu ne, poso mu juba ja busatu. Kabiji papichile moba 40 saka akyangye kuya mwiulu. (Byubilo 1:3, 9) Pa kimye kya lufu lwanji, Yesu watujile mupashi wanji mu maboko a Shanji, saaketekejile na muchima yense amba Yehoba ye uji na bulume bwa kumusangula ke mumi.
Ee, Lesa bunketu ye wakonsha kusangula muntu kwikala ke mumi. (Masalamo 104:30) Kino byo kiletapo mashuko akatampe!
Luketekelo lwa Kine
Baibolo yamba’mba: “Juba jibenakwiya, jo bakomvwa bonse baji mu bilende [bya kivuluko, NW] jiwi janji [Yesu], kepo bakafumamo.” (Yoano 5:28, 29) Kya kine, Yesu Kilishitu walaya kuba’mba bonse Yehoba boavuluka bakasangulwa ne kwibabwezha ku bumi. Pakachi ka bano bantu pakekala ne bakalume ba Yehoba baubilenga byaoloka. Pano bino, kuji ne bantu bavula bafwatu kwakubula kashinshi ka kuba’mba bakonsha kukokela mizhilo yaoloka ya Lesa nangwa ne. Kampe na mambo a kuba kechi bayukile mizhilo ya Yehoba ne kwikalapo na kimye kyabaya kya kupimpwilamo bwikalo bwabo ne. Bantu ba uno mutundu nabo Lesa ukebavuluka kabiji bakasangulwa, mambo Baibolo yamba: “Kukekala lusanguko lwa baoloka ne babula koloka.”—Byubilo 24:15.
Lelo jino, ntanda yayula na lupato ne lutobo, bumbanzhi ne bukapondo, kutamisha mwela ne myalo. Umvwe kya kuba bafwa babwelanga ke bomi pa ino ntanda, lusekelo lwabo lwafwainwa kwikalatu lwa ka kimye kacheche. Pano bino Mulenga walaya kuba’mba, katatakatu afumyepo buno bwikalo bujipo buji mu maboko a kwa Satana Diabola. (Byambo bya Mana 2:21, 22; Danyela 2:44; 1 Yoano 5:19) Kepo akapingizhapo bantu baoloka pa “ntanda ipya.”—2 Petelo 3:13.
Pa kyokya kimye ‘kafwako nangwa umo ukekalangamo ukamba’mba: Nakolwa, ne.’ (Isaya 33:24) Nangwatu lufu kechi lukekalamo ne, mambo Lesa “ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne: bintu bitanshi byapichijila.” (Lumwekesho 21:4) Byo jijipo jishuko ku boba baji mu “bilende bya kivuluko”!
Kimye Yehoba kyo akafumyapo bubi pano pa ntanda, kechi ukepaya baoloka ne, ukepayatu babi. (Masalamo 37:10, 11; 145:20) “Jibumba jikatampe” jiji na bantu bafuma “mu bisaka byonse ne mitundu yonse ne njimi yonse ya bantu” jikapuluka “malwa akatampe,” akonauna bantu babi. (Lumwekesho 7:9-14) Onkao mambo, jino jibumba jikatampe jikokozha bingi kutambwila bafwa bakasangulwa.
Nanchi mutonga kumona jibiji batemwe benu nyi? Abya mukeba kwikala myaka ne myaka mu Paladisa pano pa ntanda? Umvwe mukeba, mwafwainwa kufunda maana a kuyuka Lesa ne nkebelo yanji. (Yoano 17:3) Kyaswa muchima wa Lesa ke kya kuba’mba “bantu bonse bapuluke, bakayukishe bya bukine.”—1 Timoti 2:3, 4.
[Kipikichala pa peja 29]
“Kabiji obewa wi lukungu ne ku lukungu ko ukabwela”
[Kipikichala pa peja 30]
Mupashi wakonsha kwesakanyiwa ku malaichi
[Kipikichala pa peja 32]
Lusanguko lukaleta lusekelo lukabula kupwa