Bandemona Bepayañana!
Satana ne bandemona ke bambanzhi kufumatu ne kala. Mu myaka ya kala, Satana waipayile banyama ne bakalume ba kwa Yoba. Kepo aipayile baana ba kwa Yoba jikumi byo aletele “mwela mukatampe” ne kukundula nzubo yo bajingamo. Kabiji Satana wamanyikile Yoba na “bipute byakatazha kufumatu ku maulu anji kufika ne pa lumbwichi.”—Yoba 1:7-19; 2:7.
Mu moba ajingako Yesu, bandemona balengejile bantu bamo kwikala bampofu ne bakamaama. (Mateo 9:32, 33; 12:22) Bamanyikile mwanamulume umo byo bamulengejile kwichibaula na mabwe aye mwine. (Mako 5:5) Kabiji balengejile ne kalombwana kujila, kumutaya panshi ne “kumuvulañanya.”—Luka 9:42.
Mu kimye kya kala, bandemona balengejile bantu bamo kukolwa ne kwibavulañanya
Lelo jino, Satana ne bandemona bamanyika bingi bantu. Kabiji bakilamo kushinta kufumatu kimye kyo bebapangile mwiulu. Masawakya abena kufuma mwaya ntanda amwesha’mba kine bambanzhi. Bamanyika bantu bamo na bikola. Bakwabo bebalukuka bufuku, kwibatongeka nangwa kwibalotesha biloto byatama. Bakwabo balaajila bantu ku tulo. Bakwabo nabo balengela bantu kukonya ne kwiipaya.
Lelo jino, bandemona balengela bantu kwikala bakapondo, bakwabo bebalukuka bufuku ne kwibalotesha biloto byatama
Lintina, wikala mu kyalo kya Suriname waambile’mba, ndemona nangwa’mba mupashi watama waipayile balongo banji 16 kabiji wamumanyikile pa myaka 18. Na mambo a bintu byo apichilemo, waambile’mba, “bandemona batemwa kumanyika bantu babula mambo ne kwibepaya.”
Nangwa byonkabyo, Yehoba uji na bulume bwa kuzhikijila bakalume banji kwi Satana.—Byambo bya Maana 18:10.