Lufunjisho 8

Nanchi Balwanyi Ba Kwa Lesa Bo Bañanyi?

Mulwanyi mukatampe wa kwa Lesa ke Satana Diabola. Ye kilengwa kya mupashi kya satukijile Yehoba. Satana watwajijila kwilwisha na Lesa ne kuleta lukatazho lukatampe ku bantu. Satana mubi. Ye wa bubela kabiji ye mbanzhi.—Yoano 8:44.

Bilengwa bya ku mupashi bikwabo byakwatankene pamo ne Satana mu lusatuko lwanji lwa kusatukila Lesa. Baibolo ibatela’mba bapashi babipa. Byonka biji Satana bapashi babipa nabo balwanyi na bantu. Batemwa kumanyika bantu. (Mateo 9:32, 33; 12:22) Yehoba ukonauna Satana ne bapashi banji babipa kikupu. Bajitu na ka kimye kacheche kashalako ka kumanyikilamo bantu.—Lumwekesho 12:12.

Umvwe musaka kwikala mulunda na Lesa, kechi mwafwainwa kuba bisaka Satana’mba mube ne. Satana ne bapashi babipa bamushikwa Yehoba. Bano bo balwanyi ba Lesa, kabiji basaka kulenga anweba kwikala mulwanyi wa kwa Lesa. Pe Satana ne Yehoba mwakonsha kusalapo wakutokesha pa muchima—Satana nangwa Yehoba. Umvwe musaka bumi bwa myaka ne myaka, mwafwainwa kusala kuba kyaswa muchima wa kwa Lesa. Satana uji na bujimbijimbi ne mashinda avula bingi a kujimbaikilamo bantu. Bantu bavula bingi bajimbaikwa kwi aye.—Lumwekesho 12:9.