Ntanda Ikekala Paladisa

Yehoba ukafumyapo bintu byonse byatama byaleta Satana. Yehoba watongola Yesu kwikala Mfumu wa pano pa ntanda ponse. Kimye kyo akalamanga, ntanda yonse ikekala ke paladisa.—Danyela 7:13, 14; Luka 23:43.

Yehoba walaya bino bintu byalondelapo:

• KAJO KAKAVULA: “Ntanda ikamenesha kajo kayo; Lesa, Lesa wetu uketupesha.” Kabiji “kajo kakavula bingi pano pa ntanda; kakekala ne peulu ya mitumba.”—Salamo 67:6; 72:16.

• KECHI KUKEKALA NKONDO JIBIJI NE: “Iyai mwimwene mingilo ya Yehoba, byo auba bintu bya kukumya pano pa ntanda. Upwisha nkondo pa ntanda ponse.”—Salamo 46:8, 9.

• KECHI KUKEKALA BANTU BABI NE: “Mambo bantu babi bakebonauna . . . Kwashalatu pacheche, babi kechi bakekalako ne; ukatajisha po baikalanga, kabiji kechi bakekalapo ne.”—Salamo 37:9, 10.

• 

  KECHI KUKEKALA BIKOLA, BULANDA NANGWA LUFU NE: “Pa kyokya kimye, meso a bampofu akalaba, ne matwi a bashinka matwi akashinkuka. Pa kyokya kimye, bantu balemana bakakilauka nobe balupaala, ne bakamaama bakabijika na lusekelo.”—Isaya 35:5, 6.

  “Ne Lesa mwine ukekala nabo. Kabiji ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”—Lumwekesho 21:3, 4.

Kupusanako na Satana ne bandemona, Yehoba aye kechi ubepa ne. Ufikizha byonse byo alaya. (Luka 1:36, 37) Yehoba wimutemwa bingi kabiji ukeba’mba mukekale mu Paladisa yo akaleta. Onkao mambo, monai Bakamonyi ba kwa Yehoba pa kuba’mba bemufunjishe bukine buji mu Mambo a Lesa. Umvwe kemulondele bintu byo mubena kufunda mu bwikalo bwenu, mukakasuluka ku mafunjisho a bubela ne ku bandemona. Kabiji kulutwe, bakemupokolola ku bundengamambo ne ku lufu. Yesu waambile’mba: “Mukayuka bukine, ne bukine bukemukasulula.”—Yoano 8:32.