Kitango 1

Mwakonsha Kwikala na Kimye Kya Kulutwe Kya Lusekelo!

1, 2. Nanchi ñanyi kintu Mulenga wenu kyoakeba amba mwikale nakyo?

KUKUMBATWA kwa butemwe kumulunda nenu wa pa muchima. Kuseka mingalalela kimye kya kuja byawama na batemwe benu ba pa muchima. Kisangajimbwe kyakumona bana benu sabasangalala pa kukaya. Bimye byauno mutundu bisangajika bingi mu bumi. Nangwa kikale byonkabyo, ku bavula, bumi bumweka kuleta bingi lukatazho lukatampe lulondankana. Inge byobyo kiji kwi anweba, chinchikai.

² Lesa ukeba kuba’mba mwiyowe lusekelo lwa myaka ne myaka mu bwikalo bwawama mu mapunzha anengela. Kino kechi kilototu ne, mambo akuba’mba Lesa kine kine wimupa kii wa kimye kya kulutwe kyawama. Uno kii ko kuyuka.

3. Ñanyi kuyuka kwaikala kii walusekelo, kabiji mambo ka o twafwainwa kushiinwa amba Lesa wakonsha kukokozha koko kuyuka?

³ Tubena kwamba pa mutundu wa kuyuka wakila pa mana a muntu. O “mana a kumuyuka Lesa.” (Byambo bya Mana 2:5) Pepi na myaka 2,000 yapitapo, munembeshi wa Baibolo waambile kuba’mba: “Mambo mazubo onse aji ne beashimika; kabiji aye washimika byonse ye Lesa.” (Bahebelu 3:4) Kashika langulukai kuyuka Mulenga wa bintu byonse ko afwainwa kwikala nako! Baibolo yamba kuba’mba Lesa ubala tubangabanga tonse ne kwitutumba mazhina. Byo aikalapo mulanguluko wa kukumya, mambo mu mwelawetu wanshansha muji tubangabanga bitota mabilyoni, kabiji ne bamfunji batubangabanga bamba kuba’mba kuji nobe mabilyoni bitota bya myelayanshansha ikwabo! (Masalamo 147:4) Kabiji Lesa yewayuka byonse pe atweba, onkao mambo ñanyi mukwabo wakonsha kwitupa mikumbu yawama ku mepuzho anema apa bumi?—Mateo 10:30.

4. Mambo ka o twafwainwa kuketekela Lesa kwitupa mikambizho yakwitukwasha, kabiji ñanyi buku ufikizha bino?

⁴ Fwanyikizhai bana balume babiji babena kweseka kulungisha myotoka yabo. Umo kyamufita ku muchima waleka kulungisha. Mukwabo mu kutekanya walungisha, watwezhamo kii wavumya ne injini, kabiji wamwemwesela injini byo yavuma ne kwingila bulongo. Kechi kikemushupe na kuzhinauka pa bano bana balume babiji amba kana ñanyi pe abo wajinga na buku wa mikambizho kufuma kubalenga myotoka ne. Nanchi kechi kya mana kuba’mba Lesa wakonsha kwitukokozhezha mikambizho yakwitutangijila mu bumi nenyi? Byonka byomwafwainwa kuyuka, Baibolo iitongola kwikala yenkao buku—wa mikambizho ne buntangi kufuma kwi Mulenga wetu, yakokozhewa kwitufunjisha kuyuka Lesa.—2 Timoti 3:16.

5. Nanchi kuyuka kuji mu Baibolo kwanema mutunduka?

⁵ Inge kwamba kwa Baibolo kwa kine, langulukai buneme bwa kuyuka buji mu uno buku! Pa Byambo bya Mana 2:1-5, petukambizha kukeba mana, ne kwiapoya byonka byo twafwainwa kupoya bya buneme byafyamika—kechi mumushiji wa mu milanguluko ya muntu ne, pano bino ke mu Kyambo kya kwa Lesa. Inge twakeba kebamo, tukatanamo “mana a kumuyuka Lesa.” Pakuba Lesa byo omvwisha kupelelelwa ne kukajilwa kwetu, witupa mikambizho itukwasha kwikala na bumi bwamutende, busangajika. (Masalamo 103:14; Isaya 48:17) Kabiji ne kunungapotu, kuyuka Lesa kwitupa mambo awama asangajika.

BUMI BWA MYAKA!

6. Ñanyi mulaye Yesu Kilishitu ye apaine pa mambo a kuyuka Lesa?

⁶ Muntu wayukanyikwa bulongo mu mpito ya bwikalo aye Yesu Kilishitu walumbulwile luno lubaji lwa kuyuka Lesa mu mawi aumvwanyika. Waambile kuba’mba: “Kabiji buno bo bumi bwa myaka, namba bemuyuke anweba, Lesa yenka wa kine, ne Yesu Kilishitu ye mwatumine.” (Yoano 17:3) Angilangulukaitu—kuyuka kutangijila ku bumi bwa myaka!

7. Ñanyi kiyukilo kijipo kimwesha kuba’mba Lesa kechi wakebele amba tufwenga ne?

⁷ Kange mukane bumi bwa myaka bukijibukiji nobe kilototu ne. Mukifulo kya byobyo, talai mubuji wa muntu byoalengwa. Walengwa bingi bulongo na mana a kutompa, kumvwa bwema, kumona, kabiji ne kumvwa pa kwikunkula. Paji bintu byavula bingi panopantanda bisangajika mana etu—kajo kawama, nyimbo yawama yimba bañonyi, maluba anunkila bulongo, mapunzha awama, ne bulunda bwa lusekelo! Kabiji ne bongo bwetu bwakukumya bwakijishatu pa ngovu ya kompyuta, mambo bwitulengela kusanta ne kwiyowa bino bintu byonse. Nanchi mulanguluka kuba’mba Mulenga wetu ukeba’mba tufwe ne kusha bino bintu byonse nyi? Nanchi kechi kya mana kulanguluka kuba’mba aye ukeba atweba kwikala balusekelo ne kwiyowa bumi myaka ne myaka nenyi? Kyawama, bino byo byakonsha kulumbulula kuyuka Lesa kwi anweba.

BUMI MU PALADISA

8. Nanchi Baibolo yambapo mbaka pa kimye kya kulutwe kya bantu?

⁸ Baibolo byo yamba pa kimye kya kulutwe kya ino ntanda ne bantu byafwainwa kwipipishiwa mu kyambotu kimo—Paladisa! Yesu Kilishitu wiyambilepo kimye kyo abujile mwana mulume wajinga pepi na kufwa amba: “Mukekala ne amiwa mu Paladisa.” (Luka 23:43, NW) Kwakubula nangwa kuzhinaukatune kutongolwa kwa Paladisa kwavulwile yewo mwana mulume bwikalo bwalusekelo bwa bansemi yetu batanshi, ba Adama ne Evwa. Kimye Lesa kyo ebalengele, bajinga bapwijijika kabiji bajinga mu paka wauba nobe mashamba awo Mulenga yealengele ne kujimba. Kyamulingijile kutelwa mba bujimi bwa Edena, jizhina jilumbulula lusangajiko.

9. Nanchi bumi bwajinga byepi mu Paladisa mutanshi?

⁹ Abo bujimi byo bwasangajikilengapo! Bwajinga paladisa mwine mwine. Pa bichi byawama byajingamo pajinga byapangilenga bipangwa byatobala bingi. Ba Adama ne Evwa byo bafwakashanga munyaunda yabo, ne kutomamo mema awama, ne kwapa bipangwa ku bichi byayo, kechi bajingapo na kijikila nangwa moyo ne. Nangwatu banyama kechi bebachiinyenga ne, mambo Lesa wapele mwana mulume ne mukazhanji luusa lwa butemwe pa byonse. Mu kunungapo, bantu babiji batanshi bajinga na butuntulu bwa mubiji bwa ngovu. Bumi bwa myaka ne myaka bwa lusekelo, bwajinga kulutwe yabo kikulutu inge batwajijile kunekenena Lesa. Bebapele mwingilo wikusha wa kusunga muzhi wabo wawama wa Paladisa. Kikwabo, Lesa wapele ba Adama ne Evwa mukambizho wa ‘kusema ne kusemununa, ne kukumbana ponse pantanda ne kwiikokesha.’ Abo ne bana babo bafwainwe kufungulula mipaka ya Paladisa kufikilatu pulaneti wetu yense waaluka ke mpunzha yawama ne yalusangajiko.—Ntendekelo 1:28.

10. Yesu kimye kyo aambile pa Paladisa, walumbulwile ka?

¹⁰ Nangwa kikale byonkabyo, Yesu byo aambile pa Paladisa, kechi waipwizhenga mwana mulume wafwilenga kulanguluka pa byapita bya kimye kya kala ne. Ine, Yesu waambilenga pa kimye kya kulutwe! Wayukile kuba’mba ino ntanda yetu yonse ikaluka ke paladisa. Kokuba’mba Lesa ukafikizha nkebelo yanji itanshi ku bantu ne ku ino ntanda yetu. (Isaya 55: 10, 11) Ee, Paladisa ukabwezhiwa! Pano bino ukekala byepi? Lekai Kyambo kya kwa Lesa, Baibolo Wazhila, akumbule.

BUMI MU PALADISA WA BWEZHIWA

11. Mu Paladisa wabwezhiwa, kika kikobiwa ku malwazhi, bukote, ne lufu?

¹¹ Malwazhi, bukote, ne lufu kechi bikekalako jibiji ne. “Ponkapo meso a bampofu akalaba, ne matwi a bashinka matwi akashinkuka. Kabiji ne yewa walemana kulu ukakilauka nobe lupala, ne kamama ukembanga na lusekelo.” (Isaya 35:5, 6) “Lesa mwine ukekala [na bantu], ne kwikala ke Lesa wabo: kabiji aye ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne: bintu bitanshi byapichijila.”—Lumwekesho 21:3, 4.

12. Mambo ka o twafwainwa kuketekela kuba’mba kechi kukekala bumbanzhi, malwañano, ne bubi mu Paladisa wa kimye kya kulutwe ne?

¹² Bumbanzhi, malwañano, ne bubi bikafumishiwapo kikupu. “Mambo boba bibi bakachibiwako ku bumi . . . Bino pakishala pacheche ne babi bakekala ke kafwako . . . ukekala ke kafwapo. Pakuba bakimote bakaswana ntanda.” (Masalamo 37:9-11) “Bino babi bakebafumyamo mu ntanda, ne ba bongozhi nabo bakebangatamo.” —Byambo bya Mana 2:22.

13. Nanchi Lesa ukaleta byepi mutende?

¹³ Mutende ukakumbana pantanda ponse. “Aye [Lesa] upwisha makondo ne kwapela ntanda; Uchimuna buta bwa mukanda, ne kuchibankanya jifumo.” (Masalamo 46:9) “Mu moba anji baoloka bakamona bingi bulongo, Ne mutende ukavula poso ñondo akazhimañane.”—Masalamo 72:7.

14, 15. Baibolo yambapo mbaka pa mazubo, mingilo, kabiji ne kajo mu Paladisa wabwezhiwa?

¹⁴ Mazubo akavimbilwa ne mingilo ikekushanga. “Kabiji bakashimika mazubo abo ne kwikalamo . . . Kechi bakashimika mazubo, mwaikala ungi ne; kabiji kechi bakajimba miñanzañanza, ne ungi waja bipangwa byayo ne; mambo byonka bivula myaka ya bichi byo bikavula ne myaka ya bantu bami, kabiji bantu bami basalululwa bakamwenamo lusekelo myaka ne myaka mu mingilo ya maboko abo. Kechi bakengila kwa kubula kumwenamo ne, kabiji bana bo bakasema kechi bakamona bya malwa ne.”—Isaya 65:21-23.

¹⁵ Kajo kawama kakavula bingi. “Kukekalanga kuvula bingi kwa kajo panopantanda peulu ya mitumba.” (Masalamo 72:16) “Ntanda yapanga kala bipangwa byayo: Ne aye Lesa, yenkaye Lesa wetu, uketubila bibusa.”—Masalamo 67:6.

16. Mambo ka bumi mu Paladisa o bukekela bwa kusangajika?

¹⁶ Bumi bwa myaka ne myaka mu paladisa panopantanda bukekala bwa lusekelo. “Baoloka bakaswana ntanda, Ne kwikalamo myaka ne myaka.” (Masalamo 37:29) “Bisanzangala ne ntanda yauma bikasekela; ne biselebwa nabyo bikasangalala, mambo mukekala maluba awamisha.”—Isaya 35:1.

KUYUKA NE KIMYE KYENU KYA KULUTWE

17. (a) Kika kyo mwakonsha kuba inge bumi bwa mu Paladisa mwibukomoka? (b) Twayuka byepi kuba’mba Lesa ukaleta lupimpu lukatampe pano pantanda?

¹⁷ Inge bumi bwa mu Paladisa mwibukomoka, kange muleke kintu nangwa kimo kimukanye kunonka kuyuka Lesa ne. Lesa watemwa bantu kabiji ukaleta lupimpu lukebewa lwa kwalula ino ntanda kwikala paladisa. Nepano, inge mwajinga na ngovu yakufumyapo bulanda ne bumbulwakoloka bwakumbana muno muntanda, nanchi inge kechi mwibufumyamo nenyi? Nanchi twakonsha kuketekela kuba’mba Lesa wakonsha kukankalwanyi? Kine kine, Baibolo yamba mu mawi aumvwanyika pa kimye Lesa kyo akafumyapo bino byubilo byayulamo malwañano ne kwiipingishapo na bukalama bwapwijijika, bwaoloka. (Danyela 2:44) Bino Baibolo itubula byavula kukila pa kwitubulatu bino byonka. Itumwesha byotwakonsha kupuluka ne kutwela mu kyalo kipya Lesa kyoalaya.—2 Petelo 3:13; 1 Yoano 2:17.

18. Nanchi kuyuka Lesa kwakonsha kwimubila ka pa kino kimye?

¹⁸ Kabiji kuyuka Lesa kwakonsha kwimubila byavula pakino kimye. Mambo mepuzho apa bumi azhika ne kukatazha aasukwa mu Baibolo. Kuswa kutangijila kwayo kukemukwasha kunungulula bulunda bwenu ne Lesa. Jino jishuko byo jabayapo! Kabiji kino kikemulengela kwiyowa mutende upanyiwatu ne Lesa. (Loma 15:13, 33) Byomutendeka kufunda kuno kuyuka kwanema, ko kuba’mba mubena kutendeka mwingilo wakilapo kunema kabiji wa mfweto. Kechi mukomvwe bulanda nangwatu pacheche ne, pakunonka kuyuka Lesa kutangijila ku bumi bwa myaka.

19. Ñanyi jipuzho jo tusakulangulukapo mu kitango kyalondelapo?

¹⁹ Twatazha ku Baibolo kwikala buku muji kuyuka Lesa. Pano bino, twayuka byepi namba ibyo, kechi buku wa mana a muntutu ne, bino ke kintu kimo kyakijishapo? Tusakulangulukapo pajino jipuzho mu kitango kyalondelapo.

MONAI INGE MWAYUKA

Mambo ka kuyuka Lesa o kwa konshesha kwimutangijila kulusekelo lwa myaka?

Bumi bukekala byepi mu Paladisa wa panopantanda ubena kwiya?

Mambo ka o musakumwenamo pa kufunda kuyuka Lesa pakino kimye?