Lufuunjisho 3

Yesu Kilishitu Ye Ñanyi?

Mamboka Yesu kyoatelelwa’mba Mwaana wa “bubeji” wa kwa Lesa? (1)

Mamboka o atelelwa ’mba “Mambo”? (1)

Yesu waishijileka panopantanda nobe muntu? (2-4)

Mamboka o amwesheshe bya kukumya? (5)

Yesu ukobaka kulutwe kwafwenya kala pepi? (6)

1. Yesu wajinga mwiulu nobe muntu wa mupashi sakaakyangye kwiya panopantanda ne. Ye wajinga mutanshi kulengwa wa kwa Lesa, kyokyo atelelwa kuba’mba Mwaana wa “bubeji” wa Lesa. (Kolose 1:15; Lumwekesho 3:14) Yesu ye Mwanatu bunke Lesa yeebumbijile aye mwine. Yehoba waingijishe Yesu sakaakyangye kwikala muntu nobe “sendwe” wanji mu kubumba bintu byonse bya mwiulu ne bya panopantanda. (Byambo bya Mana 8:22-31; Kolose 1:16, 17) Kabiji Lesa wamwingijishe nobe Wakumwambilako wanji mukatampe. Kino kyo kyalengela kuba’mba Yesu atelwe’mba “Mambo.”—Yoano 1:1-3; Lumwekesho 19:13.

2. Lesa watumine Mwaananji panopantanda byoavilwijile buumi bwanji munda ya kwa Maliya. Ko kubamba Yesu kechi wajingapo na shanji wa buntunshine. Kyokyo abujile kuswanapo bundengamambo nangwa bumbulakoloka ne. Lesa watumine Yesu panopantanda na mambo a bino bintu bisatu: (1) Kwitufunjisha atweba kiine kya Lesa (Yoano 18:37), (2) kusunga bukishiinka bwaoloka, kwitushila kimwesho kyotwafwainwa kulondela (1 Petelo 2:21), ne (3) kupana buumi bwanji ke kya kwitukuula ku bundengamambo ne lufu. Ñanyi mambo kino byokyajinga kyafwainwa?—Mateo 20:28.

3. Kubula kumvwina mukambizho wa Lesa, muntu mutanshi, Adama, walengele kitelwa mu Baibolo ’mba “bundengamambo.” Lesa wamuzhachishile ku lufu. (Ntendekelo 3:17-19) Kechi watwajijile kwikala pa kipimo kya Lesa kyoakebele ne, ko kuba’mba kechi wajinga waoloka jibiji ne. Pachepache wakotelenga ne kufwa. Adama wasambwishe baana banji bonse bundengamambo. Kyokyo tukotela ne atweba, kubeela, ne kufwa. Pano nga mutundu wa muntu ukapulushiwa byepi?—Loma 3:23; 5:12.

4. Yesu wajinga muntu waoloka byonka byajinga Adama. Pano bino kupusanako ne Adama, nangwa byonkabyo, Yesu waumvwijile Lesa mujishinda jaoloka nangwatu mukachi ka lweseko lukatampe. Byonkabyo aye yewafwainwe kupana mweo wanji waoloka kitapisho kya kulipila bundengamambo bwa Adama. Kino kyo itela Baibolo amba “kyakukuula.” Kokuba mba pano baana ba Adama bakuulwa kuluzhachisho lwa lufu. Bonse baji na lwiitabilo mwi Yesu balekelwa bubi bwabo ne kutambula buumi bwa myaka.—1 Timoti 2:5, 6; Yoano 3:16; Loma 5:18, 19.

5. Kimye kyoajinga panopantanda Yesu wabukile bakolwa, wajishishe banzala, wakainye lubesha. Wabushishe ne bafu. Mambo ka kyo aubijile byakukumya? (1) Waumvwijile bantu bayanda lusa, kabiji wakebele kwibakwasha. (2) Byakukumya byanji byamuyuukishe mba wajinga Mwaana Lesa. (3) Byamwesheshe byoakobila mutundu wa bantu bomvwina kimye akalamanga ntanda nobe Mfumu.—Mateo 14:14; Mako 2:10-12; Yoano 5:28, 29.

6. Yesu wafwile kabiji Lesa wamubushishe nobe kilengwa kya mupashi, kabiji wa bwelele jibiji kwiulu. (1 Petelo 3:18) Kufumatu kyokyo kimye, Lesa wamubikile pa Bufumu. Bukumotu Yesu akafumyepo bubi bonse ne buyanji panopantanda.—Masalamo 37:9-11; Byambo bya Mana 2:21, 22.

[Bipikichala pa peja 7]

Mingilo ya Yesu yavwangilemo kufuunjisha, kubabya kukumya, ne kupana buumi bwanji mambo aatweba