Yesu Kilishitu ye Ñanyi?

1. Bumi bwa kwa Yesu bwatendekele byepi?

Yesu wapuseneko na bantu bonse, waikalanga mwiulu mu bumupashi saka akyangye kusemwa pano pa ntanda. (Yoano 8:23) Yesu ye wajinga mutanshi kulengwa kwi Lesa pa bilengwa byonse, kabiji waingijileko mwingilo wa kulenga bilengwa bikwabo byonse. Ye yenkatu ye balengele kwi Yehoba mwine, kyokyo atelelwa’mba Mwana Lesa “yenkawa umotu.” (Yoano 1:14) Kabiji wajinga wakumwambilako Lesa, kyokyo atelelwa’mba, “Mambo.”—Tangai Byambo bya Mana 8:22, 23, 30; Kolose 1:15, 16.

2. Mambo ka Yesu o aishijile pano pa ntanda?

Lesa watumine Mwananji pano pa ntanda kupichila mu kuvilwila bumi bwanji munda ya kisungu Muyudea aye Maliya. Onkao mambo, Yesu kechi wajingapo na shanji wa bumuntu ne. (Luka 1:30-35) Yesu waishile pano pa ntanda (1) na kufunjisha bukine pe Lesa, (2) kwitushila mwakulondela pa kuba kyaswa muchima wa Lesa ne (3) kupana bumi bwanji ke kya “kukuula” bavula.—Tangai Mateo 20:28.

3. Mambo ka o tukebela bukuzhi?

Bukuzhi ke kintu kyo bapana pa kupokolola muntu ye babena kukeba kwipaya. (Kulupuka 21:29, 30) Lesa kechi wakebelenga’mba bantu bakakotenga ne kufwa ne. Twayuka byepi? Lesa waambijile mwanamulume mutanshi Adama amba inge akalenge ‘mambo,’ ukafwa. Inge Adama wabujile kulenga mambo inge kechi tufwa ne. (Ntendekelo 2:16, 17; 5:5) Kwesakana na byaamba Baibolo, lufu “lwakumbene” ku bantu bonse pano pa ntanda na mambo a kwa Adama. Onkao mambo, Adama waletelejile baana banji bundengamambo bwaleta lufu. Kyokyo tukebela bukuzhi bwa kwitukula ku bundengamambo ne lufu lo twaswana kwi Adama.—Tangai Loma 5:12; 6:23.

Ñanyi wafwainwe kupana bukuzhi bwa kwitukula ku lufu? Atweba bantu tufwa na mambo a bundengamambo bwetu. Kafwako muntu mbulwa kulumbuluka wakonsha kukula bakwabo ku bundengamambo ne.—Tangai Salamo 49:7-9.

4. Mambo ka Yesu o afwijile?

Kupusanako ne atweba bonse, Yesu wajinga walumbuluka. Onkao mambo kechi wafwile na mambo a bundengamambo bwanji ne, mambo kechi walengelepo mambo ne. Yesu wafwijile bantu bandengamambo. Lesa wamwesheshe butemwe bwanji bukatampe bo etutemwa byo atumine Mwananji kwiya na kwitufwila. Yesu naye wamwesheshe’mba witutemwa pa kukokela Bashanji ne kupana bumi bwanji na mambo a bundengamambo bwetu.—Tangai Yoano 3:16; Loma 5:18, 19.

5. Nga Yesu ubena kuba ka pa kino kimye?

Byo ajinga pano pa ntanda, Yesu wabukilenga bakolwa, kusangula bafwa ne kupulusha bantu bajinga mu bizumba. Wamwesheshenga byo akobila bantu bonse balukokelo kulutwe. (Mateo 15:30, 31; Yoano 5:28) Yesu byo afwile, Lesa wamusangwile mu bukilengwa kya mupashi. (1 Petelo 3:18) Yesu wakekajile ku kilujo kya Lesa na kupembelela kufika ne kimye Yehoba kyo amupele bulume bwa kwikala Mfumu wa kulama pano pa ntanda ponse. (Bahebelu 10:12, 13) Pano luno Yesu ke Mfumu mwiulu kabiji baana banji ba bwanga pano pa ntanda babena kubijika mbila ya mambo awama pano pa ntanda ponse.—Tangai Danyela 7:13, 14; Mateo 24:14.

Yesu byo aji Mfumu, katatakatu akafumyepo buyanji ne kuzhiisha bonse bamanyika bakwabo. Bonse baji na lwitabilo mwi Yesu bamukokela bakekala na bumi bwa myaka ne myaka mu paladisa pano pa ntanda.—Tangai Salamo 37:9-11.