Lufunjisho 3

Mwafwainwa Kufunda Pe Lesa

Pa kwikala mulunda na Lesa, mwafwainwa kufunda pe aye. Nanchi balunda nenu jizhina jenu bejiyuka ne kwijingijisha nyi? Ee. Lesa usaka anweba kuyuka jizhina janji ne kwijingijisha. Jizhina ja kwa Lesa ke Yehoba. (Masalamo 83:18; Mateo 6:9) Kabiji mwafwainwa kufunda byo atemwa ne byo ashikwa. Mwafwainwa kuyuka balunda nanji ne balwanyi banji. Pa kuyuka muntu papitako ka kimye. Baibolo itubula kuba’mba, kya mana kupulushako kimye kya kufunda pe Yehoba.—Efisesa 5:15, 16.

Balunda na Lesa boba bimutokesha pa muchima. Angilangulukai pa balunda nenu. Inge nekumvwañana nabo bulongone kabiji saka muba byo bashikwa, nanchi bakatwajijila kwikala balunda nenu nyi? Ine kwalepeshatu! Mu kupashako, umvwe musaka kwikala balunda na Lesa, mwafwainwa kuba bimutokesha pa muchima.—Yoano 4:24.

Kechi bupopweshi bonse butangijila ku bulunda na Lesa ne. Yesu, aye wakijishapo mu bulunda na Lesa, waambile pa mashinda abiji. Jishinda jimo jabaya kabiji mutanwa bantu bavula. Jo jishinda jiya ku lonaiko. Jishinda jikwabo jakepa kabiji bantu bendamo bo bacheche. Jino jitangijila ku bumi bwa myaka ne myaka. Akino kyatala mu kuba’mba umvwe mukeba kwikala balunda ne Lesa, mwafwainwa kufunda mashinda a luñama a kumupopwelamo.—Mateo 7:13, 14.