Lufunjisho 10
Byo Mwafwainwa Kutana Bupopweshi Bwa Kine
Inge musaka kwikala mulunda na Lesa, mwafwainwa kuba byubilo bya bupopweshi bwaswishiwa na Lesa. Yesu waambile kuba’mba “bapopweshi ba kine” bakapopwela Lesa monka mwayila “bukine.” (Yoano 4:23, 24) Kujitu jishinda jimo jaoloka ja kumupopwelamo Lesa. (Efisesa 4:4-6) Bupopweshi bwa kine butangijila ku bumi bwa myaka ne myaka, kabiji bupopweshi bwa bubela butangijila kulonaiko.—Mateo 7:13, 14.
Mwakonsha kuyuka bupopweshi bwa kine kupichila mu kumona byubilo bimwesha bantu baji mu buno bupopweshi. Pakuba Yehoba byo awama, bapopweshi bakine nabo bakonsha kwikala bawama. Byonka biji kichi kya maolingi kyawama byo kipanga maolingi awama, ne bupopweshi bwa kine nabo bwikala na bantu bawama.—Mateo 7:15-20.
Balunda na Yehoba bashingika bingi Baibolo. Bayuka kuba’mba Baibolo yafuma kwi Lesa. Baswisha byo yamba kutangijila bwikalo bwabo, kupwisha makatazho abo, ne kwibakwasha kufunda byambo bya kwa Lesa. (2 Timoti 3:16) Beseka kuba byonka byo basapwila.
Balunda na Yehoba betemwa bene na bene. Yesu wamwesheshe butemwe ku bantu kupichila mu kwi bafunjisha byambo bya kwa Lesa, ne kubuka balwazhi. Abo baji mu bupopweshi bwa kine nabo batemwa bakwabo. Byonka biji Yesu, kechi basula bayanji, nangwa mushobo ungi ne. Yesu waambile kuba’mba bantu bakayuka bana banji ba bwanga inge betemwa bene na bene.—Yoano 13:35.
Balunda na Lesa banemeka jizhina ja kwa Lesa, Yehoba. Umvwe muntu wakana kwingijisha jizhina jenu, nanchi awo muntu wakonsha kwikala mulunda nenu nyi? Ine! Inge tuji na mulunda, twingijisha jizhina janji ne kumutakaika pa bantu. Onkao mambo abo bakeba kwikala balunda na Lesa bafwainwa kwingijisha jizhina janji ne kwamba pe aye ku bantu. Yehoba usaka atweba kuba byobyo.—Mateo 6:9; Loma 10:13, 14.
Byonka biji Yesu, balunda na Lesa bafunjisha bantu pa Bufumu bwa kwa Lesa. Bufumu bwa kwa Lesa ye kamfulumende wa mwiulu ukalenga ntanda kwikala paladisa. Balunda na Lesa basapwila ano mambo awama a Bufumu bwa kwa Lesa.—Mateo 24:14.
Bakamonyi ba kwa Yehoba beseka kwikala balunda na Lesa. Bashingika Baibolo kabiji betemwa bene na bene. Kabiji bengijisha ne kunemeka jizhina ja kwa Lesa ne kufunjisha bakwabo Bufumu bwa kwa Lesa. Lelo jino Bakamonyi ba kwa Yehoba baji mu bupopweshi bwa kine pano pa ntanda.